នៅថ្ងៃទី១៤ខែវិច្ឆិកាឆ្នាំ២០១៩ ក្រុមប្រឹក្សាជាតិកម្ពុជាដើម្បីអភិវឌ្ឍយុវជន សហការជាមួយក្រសួងអប់រំយុវជននិងកីឡា និងក្រសួងការងារនិងបណ្តុះបណ្តាលវិជ្ជាជីវៈ បានរៀបចំសិក្ខាសាលាស្តីពីការតម្រង់ទិសការសិក្សា និងការងារសម្រាប់យុវជន ជូនដល់យុវសិស្សនៅវិទ្យាល័យអង្គរខេត្តសៀមរាបចំនួនប្រមាណជា៣០០នាក់។កន្លងមកក្រុមការងារអគ្គលេខាធិការដ្ឋាន បានសហការរៀបចំសិក្ខាសាលាបែបនេះចំនួន ១០ខេត្តរួចហើយ ក្នុងគោលដៅ ដើម្បីផ្សព្វផ្សាយព័ត៌មានសំខាន់ៗដល់យុវជន ជាពិសេសសិស្សានុសិស្សនៅកម្រិតមធ្យមសិក្សាសំដៅធ្វើយ៉ាងណាឱ្យពួកគេអាចកំណត់ឱ្យបានច្បាស់អំពីផែនការក្នុងការសិក្សា ការៀបចំខ្លួនចូលថ្នាក់ឧត្តមសិក្សា ដើម្បីទទួលបានជោគជ័យ និងសម្រេចតាមបំណងប្រាថ្នារបស់ខ្លួន ក្នុងបរិបទដែលសកលលោកទាំងមូលកំពុងផ្តោតការយកចិត្តទុកដាក់លើផលិតកម្ម ដើម្បីទ្រទ្រង់សេដ្ឋកិច្ចជាតិ គឺត្រូវទាមទារឲ្យមានការអភិវឌ្ឍធនធានមនុស្សប្រកបដោយសមត្ថភាព។
ថ្លែងបើកអង្គសិក្ខាសាលា ឯកឧត្តមបណ្ឌិត ហួ ឈុនគ្រី អគ្គលេខាធិការរងក្រុមប្រឹក្សាជាតិកម្ពុជាដើម្បីអភិវឌ្ឍយុវជនមានប្រសាសន៍ថា៖ រាជរដ្ឋាភិបាលកម្ពុជាបានកំណត់ថា “ ការកសាងសមត្ថភាព និងអភិវឌ្ឍធនធានមនុស្ស គឺជាកត្តាចម្បងក្នុងការរួមចំណែក កសាងប្រទេសជាតិមាតុភូមិឲ្យរីកចម្រើន ហើយដើម្បីឈានទៅអភិវឌ្ឍធនធានមនុស្ស ដែលប្រកបដោយសមត្ថភាពបច្ចេកទេស ប្រសិទ្ធភាពនៃការបណ្តុះបណ្តាលសមត្ថភាពបានកំណត់នូវជំនាញបីប្រភេទសំខាន់ៗ ដែលយុវជនទាំងអស់ត្រូវការគឺ ៖ ជំនាញជាមូលដ្ឋាន រួមមានជំនាញអក្សរ និងលេខ ដែលត្រូវការជាចាំបាច់ដើម្បីទទួលបានការងារធ្វើ អាចផ្តល់ប្រាក់កំរៃគ្រប់គ្រាន់សម្រាប់បំពេញតម្រូវប្រចាំថ្ងៃ ហើយដែលជាបុរេលក្ខខណ្ឌមួយសម្រាប់បន្តការអប់រំ ការបណ្តុះបណ្តាលឲ្យទទួលនូវជំនាញដែលអាចផ្ទេរបាន ឈានទៅរកជំនាញបច្ចេកទេស និងវិជ្ជាជីវៈ ដើម្បីបង្កើនលទ្ធភាពទទួលបានការងារល្អៗថែមទៀត ។ជំនាញដែលអាចផ្ទេរបាន មានដូចជា សមត្ថភាពដោះស្រាយបញ្ហា ធ្វើការប្រាស្រ័យទាក់ទងគំនិត និងព័ត៌មានប្រកបដោយប្រសិទ្ធភាព មានភាពច្នៃប្រឌិត បង្ហាញពីភាពដឹកនាំនិងមនសិកា ព្រមទាំងបង្ហាញពីសមត្ថភាពសហគ្រិន។
ឯកឧត្តម បន្តថា៖មនុស្សត្រូវការនូវសមត្ថភាពទាំងនេះដើម្បីអាចសម្របខ្លួនទៅនឹងបរិយាកាសការងារផ្សេងៗ ដែលផ្តល់នូវអត្ថប្រយោជន៍សម្រាប់ពួកគេ ។ជំនាញបច្ចេកទេស និងវិជ្ជាជីវៈ ការងារជាច្រើនតម្រូវឲ្យមានចំណេះធ្វើ មានបច្ចេកទេសជាក់លាក់ ចាប់ពីការងារដែលធ្វើដោយកំលាំងកាយរហូតដល់ការប្រើប្រាស់ម៉ាស៊ីន ឬការប្រើប្រាស់តាមបែបបច្ចេកវិទ្យាទំនើប ។ យុវជនអាចទទួលជំនាញទាំងបីប្រភេទនេះ តាមរយៈការអប់រំក្នុងប្រព័ន្ធអប់រំចំណេះទូទៅ និងអប់រំបច្ចេកទេស និងអាចទទួលការបណ្តុះបណ្តាលក្នុងពេលបំពេញការងារជាក់ស្តែងនៅក្នុងជីវភាពរស់នៅប្រចាំថ្ងៃរបស់ពួកគេ។ ឯកឧត្តមបានជំរុញដល់សិស្សានុសិស្សនិយុវជនទាំងអស់ ត្រូវខ្នះខ្នែងប្រឹងប្រែងជំរុញការសិក្សាទ្រឹស្តីដើរទន្ទឹមគ្នាជាមួយនិងការអនុវត្តដើម្បីអភិវឌ្ឍប្រទេសជាតិយើងឱ្យស្របតាមកម្មវិធីនយោបាយរបស់រាជរដ្ឋាភិបាល។
សិក្ខាសាលាស្តីពីការតម្រង់ទិសការសិក្សា និងការងារសម្រាប់យុវជន
សិក្ខាសាលាស្តីពីការតម្រង់ទិសការសិក្សា និងការងារសម្រាប់យុវជន#ប័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Thursday, November 14, 2019
