ឯកឧត្តម ទូ ជាហាវ (Du Jia Hao) សមាជិកគណៈកម្មាធិការមជ្ឈឹមបក្ស និងជាលេខាធិការនៃគណៈកម្មាធិការមជ្ឈឹមបក្សកុម្មុយ និស្តចិន ខេត្តហ៊ូណាន នៃសាធារណរដ្ឋប្រជាមានិតចិន បានដឹកនាំប្រតិភូជាច្រើនរូប មកទស្សនកិច្ចផ្លូវការនៅខេត្តសៀមរាប ក្នុង រយ:ពេល២ ថ្ងៃ គឺចាប់ពីថ្ងៃទី១៦ ដល់ថ្ងៃទី១៧ ខែវិច្ឆិកា ឆ្នាំ២០១៩ នេះ ដើម្បីលើកកម្ពស់នូវកិច្ចសហប្រតិបត្តិការ រវាងរដ្ឋបាលខេត្តសៀមរាប នៃព្រះរាជាណាចក្រកម្ពុជា ក៏ដូចជាការអភិវឌ្ឍនិងការទំនាក់ទំនង រវាងខេត្តយើងទាំងពីរ ឲ្យកាន់តែស៊ីជម្រៅថែមទៀត នូវចំណងមិត្តភាព នឹងកិច្ចសហប្រតិបត្តិការ ផ្លាស់ប្តូរនូវបទពិសោធន៍ពីគ្នាទៅវិញទៅមកនឹងដើម្បីផលប្រយោជន៍រួមសម្រាប់ប្រជាជននៃប្រទេសទាំងពីរផងដែរ។
ក្នុងដំណើរទស្សនកិច្ចរបស់គណៈប្រតិភូខេត្តហ៊ូណាន នៃសាធារណរដ្ឋប្រជាមានិតចិននៅខេត្តសៀមរាបនាពេលនេះ ត្រូវបានទទួលការស្វាគមន៍យ៉ាងរាក់ទាក់ និង កក់ក្ដៅពីសំណាក់ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប និង ឯកឧត្តម ទៀ សីហា អភិបាល ខេត្តសៀមរាប ដោយមានការចូលរួមពីសំណាក់ឯកឧត្ដម លោកជំទាវ លោក លោកស្រី ជាសមាជិកក្រុមប្រឹក្សាខេត្ត អភិបាល រងខេត្ត ថ្នាក់ដឹកនាំមន្ទីរ អង្គភាពនានាក្នុងខេត្ត និង មន្ត្រីអ្នកមុខអ្នកការក្នុងខេត្តជាច្រើនរូបទៀត ។
ក្នុងឱកាសជួបសំណេះសំណាលជាមួយគណៈប្រតិភូខេត្តហ៊ូណាន ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍ថា ៖ រដ្ឋបាលខេត្តសៀមរាប និង ខេត្តហ៊ូណាន បានពង្រឹងនូវការទំនាក់ទំនងនិងកិច្ចសហប្រតិបត្តិការជាយូរណាស់មកហើយ ជាពិសេស គឺការផ្លាស់ប្តូរវប្បធម៌ ទំនាក់ទំនងវិស័យសេដ្ឋកិច្ច ពាណិជ្ជកម្មនិងការបង្កើតឱកាសវិនិយោគនូវទីផ្សារការងារ ដើម្បីផលប្រយោជន៍ រវាងប្រជាជននៃប្រទេសទាំងពីរនេះ ឲ្យកាន់តែជិតស្និទ្ធទាំងផ្នែកនយោបាយ និង ការទូត ជាពិសេសនៅក្នុងឱកាសនៃកិច្ចជំនួបនេះ គឺពិតជាបានផ្តល់នូវសមិទ្ធផលថ្មីៗបន្ថែមទៀត គឺបានមកពីលទ្ធផលជាផ្លែផ្កា ដែលថ្នាក់ដឹកនាំកំពូលៗ នៃប្រមុខរដ្ឋាភិបាលទាំងពីរ បានខិតខំប្រឹងប្រែងរួមគ្នាកន្លងមក និងឈានដល់ចំណុចកំពូលក្នុងការរឹតចំណងសាមគ្គីភាព និងពង្រឹងពង្រីកទំនាក់ទំនងទ្វេភាគីឲ្យក្លាយជាដៃគូយុទ្ធសាស្ត្រគ្រប់ជ្រុងជ្រោយ “ផ្លូវមួយ ខ្សែក្រវ៉ាត់មួយ វិថីសូត្រ” ក្នុងការបន្តពង្រឹងនិងពង្រីកឥតឈប់ឈរនូវទំនាក់ទំនងដ៏ល្អប្រសើរ រវាងព្រះរាជាណាចក្រកម្ពុជា និង សាធារណរដ្ឋប្រជាមានិតចិន ឲ្យកានតែរឹងមាំទ្វេឡើងថែមទៀត។
ឯកឧត្តម ទូ ជាហាវ (Du Jia Hao) សមាជិកគណៈកម្មាធិការមជ្ឈឹមបក្ស និងជាលេខាធិការនៃគណៈកម្មាធិការមជ្ឈឹមបក្សកុម្មុយ និស្តចិន ខេត្តហ៊ូណាន បានមានប្រសាសន៍ថា៖ ខេត្តសៀមរាប គឺជាខេត្តមួយដែលប្រកបទៅដោយសក្តានុពលសេដ្ឋកិច្ចផ្នែកទេសចរណ៍ និងដំណាំកសិកម្មផ្សេងៗទៀត មានការរីកចម្រើនគួរឲ្យសម្គាល់ក្នុងរយ:ពេលប៉ុន្មានឆ្នាំចុងក្រោយនេះ ហើយការទំនាក់ទំនងប្រទេសយើងទាំងពីរកម្ពុជានិងចិន មានប្រវត្តិទំនាក់ទំនង និងសាមគ្គីភាពជាភាតរៈជាប្រវត្តិសាស្ត្រមានតាំងពីយូរណាស់មកហើយ ដែលប្រទេសយើងទាំងពីរជាប្រទេសជិតខាង និងជាបងប្អូនល្អនឹងគ្នាទៀតផង ។
ឯកឧត្តម ទូ ជាហាវ បានសម្ដែងនូវការកោតសរសើរពីភាពរីក ចម្រើនលូតលាស់ជឿនលឿនលើគ្រប់វិស័យរបស់កម្ពុជា ដែលបានធ្វើឱ្យកំណើនសេដ្ឋកិច្ចប្រជាជនកម្ពុជាកើនឡើងពីមួយឆ្នាំទៅឆ្នាំ ។
ក្នុងឱកាសបំពេញទស្សនកិច្ចនៅខេត្តសៀមរាប ឯកឧត្តម ទូ ជាហាវ និង ប្រតិភូ បានអញ្ជើញទៅទស្សនាប្រាង្គប្រាសាទនានាក្នុងខេត្ត រួមមាន៖ ប្រាសាទអង្គរវត្ត , ប្រាសាទបាយ័ន និង ប្រាសាទ តាព្រហ្ម ដែលជាសម្បត្តិបេតិកភ័ណ្ឌពិភពលោកដ៏អស្ចារ្យ ដែលដូនតាខ្មែរបានបន្សល់ទុកឲ្យមនុស្សនៅក្នុងពិភពលោក បានឃើញបានស្គាល់ពីអរិយធម៌ និង វប្បធម៌ខ្មែរដ៏រុងរឿងនេះ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
