សិក្ខាសាលា ចាប់ពីថ្ងៃទី១៨ ដល់ ទី២០ ខែវិច្ឆិកា ឆ្នាំ២០១៩ នៅក្នុងខេត្តសៀមរាប ដែលរៀបចំដោយ ក្រសួងទេសចរណ៍កម្ពុជា ក្រោមកិច្ចសហប្រតិបត្តិការជាមួយអង្គការទេសចរណ៍ពិភពលោក ហៅកាត់ថា UNWTO នឹងផ្ដោតសំខាន់លើ ការអភិវឌ្ឍន៍វិស័យទេសចរណ៍ប្រកបដោយចីរភាព ជាពិសេសការគាំទ្រដល់កម្ពុជា។
សិក្ខាសាលា តំបន់អាស៊ី-ប៉ាស៊ីហ្វិក នៃបណ្តាញអង្គភាពអភិវឌ្ឍន៍ទេសចរណ៍ប្រកបដោយចីរភាព ហៅកាត់ថា INSTO បានរៀបចំបើកក្រោមអធិបតីភាព ឯកឧត្តម ទិត ចន្ថា រដ្ឋលេខាធិការប្រចាំការ តំណាង ឯកឧត្តមបណ្ឌិត ថោង ខុន រដ្ឋមន្ត្រី ក្រសួងទេសចរណ៍ ឯកឧត្តម ជូ សានជុង (Zhu Shanzhong) នាយកប្រតិបត្តិអង្គការទេសចរណ៍ពិភពលោក ថ្នាក់ដឹកនាំ អង្គការ UNWTO តំណាងប្រទេសនៃតំបន់អាស៊ី-ប៉ាស៊ីហ្វិកចំនួន១០ សាកលវិទ្យាល័យជាតិ និងអន្តរជាតិ ព្រមទាំងអ្នកជំនាញអន្តរជាតិ សរុបប្រមាណ២០០នាក់។
សិក្ខាសាលាលើកទីមួយនេះ នឹងពិនិត្យលទ្ធភាពទទួលយកគោលដៅទេសចរណ៍កម្ពុជាមួយចំនួន ជាសមាជិកនៃបណ្តាញអង្គភាពអន្តរជាតិអភិវឌ្ឍទេសចរណ៍ប្រកបដោយចីរភាព (INSTO) ដែលនេះជាការគាំទ្រថ្មីមួយទៀតរបស់អង្គការទេសចរណ៍ពិភពលោក ដល់ការអភិវឌ្ឍទេសចរណ៍នៅកម្ពុជា។
សិក្ខាសាលា INSTO អាស៊ី-ប៉ាស៊ីហ្វិកនាពេលនេះ ក៏នឹងធ្វើការផ្លាស់ប្តូរបទពិសោធន៍ ការស្រាវជ្រាវថ្មីៗទាក់ទងនឹងការអភិវឌ្ឍន៍ទេសចរណ៍ប្រកបដោយចីរភាព នៅអាស៊ី-ប៉ាស៊ីហ្វិក ដែលនឹងដាក់ចេញនូវគោលការណ៍ណែនាំ និងគោលនយោបាយនានាដល់ប្រទេសសមាជិកអង្គការទេសចរណ៍ពិភពលោក សម្រាប់អភិវឌ្ឍទេសចរណ៍ប្រកបដោយចីរភាព។
ឯកឧត្តម ទិត ចន្ថា បានថ្លែងអំណរគុណដល់អង្គការទេសចរណ៍ពិភពលោក និងប្រទេសនានាទាំងអស់ ដែលបានចូលរួមសិក្ខាសាលាខាងលើ ក៏ដូចជាការគាំទ្រដល់ការដឹកនាំ និងការអភិវឌ្ឍវិស័យទេសចរណ៍កម្ពុជា។
ឯកឧត្តមបន្ថែមថា ក្រសួងទេសចរណ៍តែងតែយកចិត្តទុកដាក់អនុវត្តនូវគម្រូអភិវឌ្ឍនានា សំដៅលើកកម្ពស់ជីវភាពរស់នៅរបស់ប្រជាពលរដ្ឋឲ្យប្រសើរ យោងតាមគោលការណ៍ចីរភាព និងគ្រប់ជ្រុងជ្រោយឆ្លើយតបនឹងគោលនយោបាយអភិវឌ្ឍរបស់រាជរដ្ឋាភិបាល និងផែនការយុទ្ធស្ត្ររបស់ក្រសួងទេសចរណ៍។
សូមជម្រាបថា អង្គសិក្ខាសាលាអន្តរជាតិនេះ នឹងពិភាក្សាអំពីការដាក់ចេញនូវរង្វាស់ទេសចរណ៍ប្រកបដោយចីរភាព (Measurement of Sustainable Tourism -MST) ដែលជាកម្រងសូចនាករ វាស់វែងការអភិវឌ្ឍទេសចរណ៍ប្រកបដោយចីរភាព សម្រាប់គោលដៅទេសចរណ៍ទាំងអស់ក្នុងពិភពលោក ព្រមទាំងពិភាក្សាលើបទពិសោធន៍នៃការដាក់បញ្ចូលនូវគោលការណ៍អភិវឌ្ឍន៍ទេសចរណ៍ប្រកបដោយចីរភាពតាមរយៈការប្រើប្រាស់ និងការផលិតទៅក្នុងគោលនយោបាយជាតិនៃប្រទេសនានា សំដៅចូលរួមសម្រេចគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាតិឆ្នាំ២០៣០។
អត្ថបទ និង រូបភាព ៖ លោក បូ សាវី
កែសម្រួល៖ សេង ផល្លី
