បច្ចុប្បន្នសហគមន៍ជនជាតិដើមភាគតិចចំនួន១៥០ លើ ៤៥៥ ត្រូវបានចេញលិខិតទទួលស្គាល់ដោយក្រសួងអភិវឌ្ឍន៍ជនបទ ខណៈសហគមន៍ជនជាតិដើមភាគតិចជានីតិបុគ្គលបានចំនួន១៤១ សហគមន៍ ត្រូវបានចេញលិខិតទទួលស្គាល់ដោយ ក្រសួងមហាផ្ទៃ។
នេះបើតាមការលើកឡើងរបាយការណ៍របស់ ក្រសួងអភិវឌ្ឍន៍ជនបទ បានបង្ហាញនៅក្នុង សិក្ខាសាលា ស្វែងរកតម្រូវការអាទិភាព សម្រាប់អភិរក្ស និងអភិវឌ្ឍន៍ជនជាតិដើមភាគតិច ដែលធ្វើឡើងនៅខេត្តសៀមរាប នាព្រឹកថ្ងៃទី២០ ខែវិច្ឆិកា ឆ្នាំ២០១៩នេះ។
មានប្រសាសន៍ក្នុងឱកាសនោះ ឯកឧត្ដម វ៉ាន់ ស៊ីវឿន អនុរដ្ឋលេខាធិការក្រសួងអភិវឌ្ឍន៍ជនបទ បានបង្ហាញថា ក្រសួងអភិវឌ្ឍន៍ជនបទ បានស្នើដល់គ្រប់ភាគីពាក់ព័ន្ធ រិះរកមធ្យោបាយធ្វើយ៉ាង ដើម្បីជួយពន្លឿនការកំណត់អត្តសញ្ញាណសហគមន៍ជនជាតិដើមភាគតិច ការចុះបញ្ជីជានីតិបុគ្គល និងការចុះបញ្ជីដីសហគមន៍ជនជាតិដើមភាគតិច បញ្ជ្រាបទស្សនយេនឌ័រ បង្កើតឲ្យមានមជ្ឈមណ្ឌលវប្បធម៌ និងភូមិគំរូ ដើម្បីគាំទ្រដល់ដំណើរការបណ្ដុះបណ្ដាលដល់យុវជន និងយុវនារីនៃជនជាតិដើមភាគតិចនៅកម្ពុជា។
ឯកឧត្ដមបានបន្ដថា ក្រសួងអភិវឌ្ឍន៍ជនបទ បញ្ជាក់ថា ការអភិវឌ្ឍជនបទ បានរួមចំណែកជាមួយរាជរដ្ឋាភិបាល តាមរយៈការពង្រឹងស្ថាប័ន ការកសាងសមត្ថភាព និងអភិវឌ្ឍន៍ធនធានមនុស្ស ការលើកកម្ពស់សុខមាលភាព ការអប់រំ ការធ្វើឲ្យប្រសើរឡើងនូវលក្ខខណ្ឌរស់នៅ ការបង្កើនការងារ មុខរបរ សហគ្រិនភាព និងសកម្មភាពពិពិធកម្មសេដ្ឋកិច្ចដទៃទៀតនៅតាមទីជនបទ សំដៅធ្វើយ៉ាងណាឲ្យទទួលបាននូវប្រសិទ្ធភាពខ្ពស់។
ឯកឧត្ដម វ៉ាន់ ស៊ីវឿន បានបញ្ជាក់បន្ថែមថា ជនជាតិដើមភាគតិច នៅក្នុងព្រះរាជាណាចក្រកម្ពុជា មានចំនួន ២៤ជនជាតិ ស្មើនឹង ១.៤ភាគរយ នៃចំនួនប្រជាជនកម្ពុជាសរុប និងកំពុងរស់នៅក្នុងខេត្តចំនួន១៥ ។ ជាមួយនោះ ការប្រកបរបរចិញ្ចឹមជីវិតរបស់ពួកគាត់ ពឹងផ្អែកស្ទើរតែទាំងស្រុងលើការធ្វើស្រែ ឬចម្ការតាមប្រពៃណី (ចម្ការវិលជុំ) ការប្រមូលផលអនុផលព្រៃឈើ ដូចជាទឹកឃ្មុំ ជ័រទឹក ជ័រអុង បន្លែព្រៃ និងការនេសាទ ដែលទាំងនេះ ដែលបានផ្សារភ្ជាប់ចំណេះដឹងនៃការអនុវត្តនិងគ្រប់គ្រងខាងលើប្រកបដោយនិរន្តរភាពគួរឲ្យកោតសរសើរ។ លើសពីនេះ ជនជាតិដើមភាគតិច មានទំនាក់ទំនងជាពិសេសលើការប្រើប្រាស់ដីតាំងពីដូនតា ព្រៃជំនឿ ព្រៃតម និងមានប្រពៃណីវប្បធម៌ ការប្រើប្រាស់ដីធ្លីកម្មសិទ្ធិសមូហភាព ។ឯកឧត្ដម បានបន្ដថា ក្នុងរយៈពេលប៉ុន្មានឆ្នាំចុងក្រោយនេះ ក្រសួងអភិវឌ្ឍន៍ជនបទ សម្រេចបាននូវការងារ របស់ខ្លួនគួរជាទីមោទន: ដែលសកម្មភាពទាំងអស់សុទ្ធតែបានឆ្លុះបញ្ចាំងទៅនឹងអនុសញ្ញាអន្តរជាតិផងដែរ។
មានវត្តមានក្នុងសិក្ខាសាលានោះ លោកស្រី ចូនី ស៊ីមសុន តំណាងអង្គការ អាយឡូ (ILO) បានមានប្រសាសន៍ថា ទោះបីជាជនជាតិដើមភាគតិច បានប្រឈមទៅនឹងឧបសគ្គនៃការដាក់បញ្ចូលពួកគេទៅក្នុងសេដ្ឋកិច្ច និងសង្គមឲ្យបានពេញលេញក៏ដោយ ក៏ពួកគេមានដំណោះស្រាយ និងជាអ្នករួមចំណែកនៅក្នុងសេដ្ឋកិច្ច និងសង្គមនៃប្រទេសរបស់ខ្លួនផងដែរ។
លោកស្រីបានបន្ដថា ស្ដ្រីនិងបុរសវ័យក្មេង ដែលមានជំនាញនិងសមត្ថភាព ក្នុងការចាប់យកឱកាស និងការងារនាពេលខាងមុខ ត្រូវការយល់ដឹងច្បាស់លាស់អំពីអាទិភាពអភិវឌ្ឍន៍របស់ជនជាតិដើមភាគតិច តាមរយៈភាពជាអ្នកដឹកនាំដ៏ខ្លាំងក្លា និងប្រកបដោយបរិយាប័ន្ននៅថ្នាក់សហគមន៍ រួមមានស្ដ្រីនិងតំណាងដ៏រឹងមាំនៃជនជាតិដើមភាគតិចនៅថ្នាក់ជាតិ។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
