ក្នុងឱកាសដែលមន្ត្រីជំនាញកាំកុងត្រូលខេត្តសៀមរាប សហការជាមួយមន្ត្រីមន្ទីរពាណិជ្ជកម្មខេត្ត និងអ្នកពាក់ព័ន្ធ ចុះត្រួតពិនិត្យសុវត្ថិភាពលើចំណីម្ហូបអាហារនឹងផុតកំណត់នៃសុពលភាពគ្រឿងកំប៉ុង នៅក្នុងផ្សារលើធំថ្មី ភូមិបន្ទាយចាស់ សង្កាត់ស្លក្រាម ក្រុងសៀមរាប កាលពីព្រឹកថ្ងៃទី២០ ខែវិច្ឆិកា ឆ្នាំ២០១៩ម្សិលមិញនេះ លោក ព្រៅ ខេមរិទ្ធ ប្រធានសាខាកាំកុងត្រូលខេត្តសៀមរាប បានអះអាងថា មន្ត្រីជំនាញរបស់លោក ពុំបានរកឃើញនូវសារធាតុគីមីហាមឃាត់ ដែលបានផ្ទុកនៅក្នុងម្ហូបចំណីគ្រប់ប្រភេទ និង ទំនិញគ្រឿងឧបភោគបរិភោគមួយចំនួនដែលបានដាក់តាំងលក់នៅក្នុងផ្សារឡើយ បន្ទាប់ពីបានធ្វើតេស្តបឋមនឹងការពិសោធន៍ រកសារធាតុគីមីនៅក្នុងម្ហូបអាហារគំរូមួយចំនួន រួមមានដូចជា៖ សណ្តែកបណ្តុះ សរសៃមីលឿង សរសៃគុយទាវ ប្រហិត បង្កងថៃ ម៉ឹកថៃ ទំពាំងត្រាំ និង គ្រឿងឧបភោគបរិភោគសម្រាប់ការប្រើប្រាស់ប្រចាំថ្ងៃពុំមានហួសកាលបរិច្ឆេតនោះទេ គឺសំដៅដល់គ្រឿងកំប៉ុងនិងឥវ៉ាន់ចាប់ហួយនៅតាមតូបនានាក្នុងផ្សារជាដើម ។
លោក ព្រៅ ខេមរិទ្ធ មានប្រសាសន៍បន្ថែមថា ទោះជាយ៉ាងនេះក្ដី ក៏មន្ត្រីជំនាញ បានធ្វើការណែនាំត្រួតពិនិត្យរបស់បងប្អូនអាជីវករមួយចំនួនដែលបានលក់ដូរនៅទីនោះ ដើម្បីឲ្យចូលរួមសហការជាមួយនឹងការចុះត្រួតពិនិត្យទំនិញម្ហូបអាហារ ដោយផ្តោតលើការយកចិត្តទុកដាក់ ជាពិសេសចំពោះសុខភាពបងប្អូនប្រជាពលរដ្ឋជាដើម ព្រមទាំងបានអប់រំណែនាំពន្យល់អំពីបញ្ហាការវិចខ្ចប់ ការទុកដាក់ឲ្យមានអនាម័យល្អ ឬការលក់ដូរធ្វើយ៉ាងណាឲ្យមានការប្រុងប្រយ័ត្នជាមុនទើបជាការប្រសើរនឹងអំពាវនាវដល់ក្រុមអាជីវករលក់ដូរ ប្រជាពលរដ្ឋ អ្នកប្រើប្រាស់ និង សាធារណៈជនទាំងអស់ សូមរួមគ្នាទប់ស្កាត់ និង បញ្ឈប់ការប្រើប្រាស់សារធាតុគីមីផងដែរ ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ស៊ាន សុផាត និង លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
