ក្នុងឱកាសបើកវគ្គបំប៉នជំនាញភ្នាក់ងារសន្តិសុខឯកជនលើកទី២៣ នៅសណ្ឋាគារអង្គរហូវើដ នាព្រឹកថ្ងៃទី២១ ខែវិច្ឆិកា ឆ្នាំ២០១៩នេះ លោកឧត្តមសេនីយ៍ទោ ទិត្យ ណារ៉ុង ស្នងការ នៃស្នងការដ្ឋាននគរបាលខេត្តសៀមរាប បានមានប្រសាសន៍ថា ភ្នាក់ងារសន្តិសុខឯកជន ពុំមាននាទីត្រឹមតែជាអ្នកការពារទ្រព្យសម្បត្តិឯកជនស្របច្បាប់ ឬសហគ្រាសគ្រឹះស្ថានប៉ុណ្ណោះទេ តែក៏មានកាតព្វកិច្ចចូលរួមការពារសន្តិសុខសង្គម សណ្ដាប់ធ្នាប់សាធារណៈ និងអាយុជីវិតរបស់ប្រជាពលរដ្ឋផងដែរ ពិសេសគឺមានតួនាទីដ៏សំខាន់ ជាកម្លាំងជំនួយរបស់អាជ្ញាធរមានសមត្ថកិច្ច ដូច្នេះចាំបាច់ត្រូវមានសមាសភាពស្អាតស្អំ មានភាពស្មោះត្រង់ និងប្រកបការងារដោយវិជ្ជាជីវ:ច្បាស់លាស់ ។
លោកឧត្តមសេនីយ៍ទោ ទិត្យ ណារ៉ុង បានប្រសាសន៍បន្ថែមថា តួនាទីភារកិច្ចរបស់ភ្នាក់ងារសន្តិសុខឯកជន គឺប្រកបការងារដោយវិជ្ជាជីវៈច្បាស់លាស់ , ចូលរួមថែរក្សាសន្តិសុខ សណ្តាប់ធ្នាប់សង្គម , ចូលរួមចំណែកកាត់បន្ថយអំពើចោរកម្មនៅតាមគោលដៅ ដែលខ្លួនទទួលខុសត្រូវ និងចូលរួមសហការជាមួយកម្លាំងសមត្ថកិច្ចបានល្អប្រសើរ ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
