ជណ្តើរឈើនៅរមណីយដ្ឋានក្បាលស្ពានដែលសាងសង់ឡើងកាលពីឆ្នាំ២០០៧ បានទទួលរងនូវការពុកផុយ ចាស់ទ្រុឌទ្រោមដោយសារអាយុកាល កម្តៅ និងទឹកភ្លៀងនោះ ពេលនេះត្រូវបានសាងសង់ថ្មីឡើងវិញនៅតាមទីតាំងចាស់ ដោយនាយកដ្ឋានអភិរក្សប្រាសាទក្រៅឧទ្យានអង្គរ នៃអាជ្ញាធរជាតិអប្សរា ដើម្បីសម្រួលដល់ការធ្វើដំណើរឡើងចុះទៅទស្សនារមណីយដ្ឋានមួយនេះ។
លោក ពុទ្ធ សុទ្ធ មន្ត្រីបច្ចេកទេសនៃនាយកដ្ឋានអភិរក្សប្រាសាទក្រៅឧទ្យានអង្គរ បានឱ្យដឹងថា ដំណើរការសាងសង់ស្ពានឈើថ្មីនៅរមណីយដ្ឋានក្បាលស្ពាន ត្រូវបានចាប់ដំណើរការកាលពីថ្ងៃទី១៥ ខែវិច្ឆិកា កន្លងទៅហើយគ្រោងនឹងបញ្ចប់ត្រឹមចុងខែធ្នូ ឆ្នាំ២០១៩នេះ ។
ប្រធានគម្រោងរូបនេះបញ្ជាក់ថា ជណ្តើរឈើថ្មីដែលកំពុងសាងសងនេះ គឺធ្វើឡើងនៅទីតាំងចាស់ដដែល មាន៣ចំណុច គឺនៅរោងជម្រកទី១ រោងជម្រកទី២ និងចំណុចទឹកធ្លាក់ ។ ហើយក្នុងនោះចំពោះឈើដែលប្រើមានចំនួន៩ម៉ែត្រគូប ជាប្រភេទឈើផ្ចឹកនិងរាំង ដែលអាចធន់បានពី១០ទៅ១៥ឆ្នាំ ។
គួរឲ្យដឹងដែរថា ទាក់ទងនឹងដំណើរការជួសជុលនេះដែរ អាជ្ញាធរជាតិអប្សរា ក៏បានរៀបចំត្រួសត្រាយធ្វើផ្លូវវាងសម្រាប់ភ្ញៀវមកទស្សនាដើរបណ្តោះអាសន្នផងដែរ ។ ហើយក្នុងនោះដែរក្រុមការងារ ក៏សុំធ្វើការអធ្យាស្រ័យ និងសូមការយោគយល់ពីសំណាក់ភ្ញៀវទេសចរជាតិ-អន្តរជាតិ ខណៈក្រុមការងារកំពុងបំពេញភារកិច្ច ហើយក្រុងការងារក៏សង្ឃឹមថាការងារនេះនឹងមានភាពល្អប្រសើរនៅរយៈពេលខ្លីខាងមុខនេះ ៕
អត្ថបទ និងរូបភាព ៖ បូ សាវី
កែម្រួល៖ អ៊ុន ណារាជ្យ
