អគារសិក្សាថ្មី នៃសាលាមត្តេយ្យ វត្តព្រិនមួយខ្នង មានបួនបន្ទប់ អស់ថវិកាសរុប ៦២.១៥០ ដុល្លារអាមេរិក ដែលជាអំណោយរបស់សប្បុរសជនក្នុងសង្កាត់ជ្រាវ ត្រូវបានសម្ពោធដាក់ឲ្យប្រើប្រាស់ជាផ្លូវការហើយ កាលពីព្រឹកថ្ងៃទី២១ខែវិច្ឆិកាឆ្នាំ២០១៩នេះ ក្រោមវត្តមាន លោក នួន ពុទ្ធារ៉ា អភិបាលក្រុងសៀមរាប និង លោក រស់ ស សមាជិកក្រុមប្រឹក្សាក្រុងសៀមរាប ដោមមានការនិមន្តចូលរួមពីព្រះសង្ឃ ចៅសង្កាត់ជ្រាវ ប្រជាពលរដ្ឋ លោកគ្រូ អ្នកគ្រូ និង សិស្សានុសិស្ស ជាច្រើននាក់ ។
លោក ក្អោប រ៉ន ចៅសង្កាត់ជ្រាវ បានឲ្យដឹងថា ទីធ្លាសាលារៀននេះ ព្រះចៅអធិការវត្តព្រិនផ្តល់ឲ្យ រីឯសំណង់សាលាទាំងមូល គឺជា ការ បរិច្ចាករបស់សប្បុរសជន ប្រជាពលរដ្ឋ ក្នុងស្កាត់ជ្រាវ ខណៈ បច្ចប្បន្ននេះ មានសិស្សបានមកចុះឈ្មោះចូលរៀនចំនួន១៥០នាក់ មកពីបីភូមិក្នុងសង្កាត់ជ្រាវ ។
មានប្រសាសន៍ក្នុងឱកាសនោះ លោក នួន ពុទ្ធារ៉ា អភិបាលក្រុងសៀមរាប បានថ្លែងអំណរគុណយ៉ាងជ្រាលជ្រៅបំផុត ចំពោះ សប្បុរសជនទាំងអស់ ដែលបានចំណាយថវិកាផ្ទាល់ខ្លួន ដោយទឹកចិត្តដ៏សប្បុរស ដែលជាការបង្ហាញពីការសាមគ្គី និងចូលរួមទាំងគ្នា បានបង្កើតឡើងនូវអគារសាលាមត្តេយ្យ រួមទាំងការរៀបចំទីធ្លាសាលាទាំងមូល ហើយការបរិច្ចាកនេះ គឺបានអនុវត្តតាមគោលនយោបាយរបស់រាជរដ្ឋាភិបាល ជាពិសេសការយកចិត្តទុកដាក់របស់ សម្តេចអគ្គមហាសេនាបតី តេជោ ហ៊ុន សែន និង សម្តេច កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានយកចិត្តទុកដាក់យ៉ាងខ្លាំង ចំពោះការអប់រំកុមាតូច ។
លោក នួន ពុទ្ធារ៉ា មានប្រសាសន៍បន្ថែមថា អគារសិក្សាសាលាមត្តេយ្យនេះ ជាមូលដ្ឋានយុទ្ធសាស្ត្រ សម្រាប់រយៈពេលវែង ជាថ្នាលផលិតនូវគុណភាពរបស់អ្នកបន្តវេនរបស់យើង ក្នុងរយៈពេល២០ទៅ៣០ឆ្នាំក្រោយទៀត ព្រោះថាពេលវេលានៃការអប់រំនូវថ្នាក់មត្តេយ្យ ជាពេលចាំបាច់ខ្លាំងបំផុត ចាំបាច់ជាងការសិក្សាថ្នាក់បន្តបន្ទាប់ ជាមូលដ្ឋានកំណត់ពីការសិក្សាទៅថ្នាក់បន្តបន្ទាប់ទៀត និង ជាមូលដ្ឋានកំណត់អំពីភាពរឹងមាំ គុណភាពរបស់ក្មួយៗទៅទៅថ្ងៃអនាគតផងដែរ ជាពិសេសតាមការស្រាវជ្រាវ នូវពេលដែរយើងបណ្តុះបណ្តាលកុមារនៅថ្នាក់មត្តេយ្យបានល្អប្រសើរនោះ ធ្វើឲ្យពួកគេរឹងមាំ វាងវៃ រហាស់រហួន មានកំរិតអាយឃ្យូខ្ពស់ ជាងក្មួយៗដែលមិនបានចូលរៀននៅថ្នាក់មត្តរយ្យ នៅពេលដែលពួកគេបន្តចូលរៀននៅថ្នាក់បឋម អនុវិទ្យាល័យ វិទ្យាល័យ និង មហាវិទ្យាល័យ ៕
អត្ថបទ និង រូបថត ៖ លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
