កាលពីរសៀលថ្ងៃទី២១ ខែវិច្ឆិកា ឆ្នាំ២០១៩នេះ អគ្គនាយកដ្ឋានជំរុញពាណិជ្ជកម្ម នៃអគ្គនាយកដ្ឋានពាណិជ្ជកម្មក្នុងប្រទេសនៃក្រសួងពាណិជ្ជកម្ម និង រដ្ឋបាលខេត្តសៀមរាប បានសហការជាមួយដៃគូពាក់ព័ន្ធ រៀបចំព្រឹត្តិការណ៍ពិព័រណ៍ផលិតផលបន្លែ ផ្លែឈើលើកទី ១២ និងព្រឹត្តិការណ៍សូត្រខ្មែរលើកទី២ ឆ្នាំ២០១៩ នៅមុខសួនច្បារព្រះរាជដំណាក់ក្នុងក្រុងសៀមរាប ក្រោមអធិបតីភាពឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម , លោក ពៅ ពិសិដ្ឋអភិបាល រងខេត្ត តំណាងដ៍ខ្ពង់ខ្ពស់ឯកឧត្តម ទៀ សីហា អភិបាលនៃគណអភិបាលខេត្តសៀមរាប និង ឯកឧត្តម Patrick Devedjian ប្រធានក្រុមប្រឹក្សាខេត្តអូឱសែន ប្រទេសបារាំង ដោយមានការចូលរួមពីសំណាក់ឯកឧត្តម លោកជំទាវ អ្នកឧកញ៉ា លោក លោកស្រី ជាថ្នាក់ដឹកនាំអង្គភាពមន្ទីរនានាជុំវិញខេត្ត និងអអ្គការដៃគូពាក់ព័ន្ឋមួយចំនួន ខណៈដែលពិធីនេះ បានប្រព្រឹត្តទៅក្នុងរយៈពេល០៤ថ្ងៃ គឺពីថ្ងៃទី២១ ដល់ថ្ងៃទី២៤ ខែវិច្ឆិកា ឆ្នាំ២០១៩ ។
លោក ពៅ ពិសិដ្ឋ អភិបាលរងខេត្តសៀមរាប បានលើកឡើងថា សក្តានុពលនៃវិស័យទេសចរណ៍របស់ខេត្តសៀមរាប គឺជាប៉ូលទេសចរណ៍ដ៍សំខាន់ និងមានភ្ញៀវជាតិនិងអន្តរជាតិមកស្នាក់នៅ និងកំសាន្តតាមតំបន់ប្រាង្គប្រាសាទនិងរមណីយដ្ឋាននានា ជាបន្តបន្ទាប់ ដែលកត្តាទាំងនេះ បានបង្កើតឲ្យមានតម្រូវការទៅលើផលិតផលបន្លែ និងផ្លែឈើក្នុងស្រុកក៏ដូចជាផលិតផលផ្សេងៗទៀត ខណៈដែលសក្តានុពលសំខាន់ក្រៅពីទេសចរណ៍គឺវិស័យកសិកម្ម ដែលបច្ចុប្បន្ន ខេត្តសៀមរាប មានមានផលិតផលសំខាន់ៗដូចជា ស្រូវ ដំឡូងមី សណ្តែកបាយ កៅស៊ូ ក្រពើ សិប្បកម្ម ផលិតផលកែច្នៃជាដើម។
លោក ពៅ ពិសិដ្ឋ មានប្រសាសន៍បន្ថែមថា ក្រៅពីផលិតផលកសិ-ឧស្សាហកម្ម ខេត្តសៀមរាបក៏មានដំណាំរួមផ្សំដូចជា បន្លែ និងផ្លែឈើ ហើយបច្ចុប្បន្ន ផលិតផលទាំងនេះ កសិករយើងអាចផលិតបានមួយចំនួនដែលប្រកបដោយគុណភាព សោភ័ណភាព សុវត្ថិភាព និងបានធ្វើការផ្គត់ផ្គង់មកកាន់ទីផ្សារ ប៉ុន្តែបរិមាណតម្រូវការចំពោះបន្លែនិងផ្លែឈើសុវត្ថិភាពនៅមានទំហំធំ ដូច្នេះតាមរយៈការតាំងបង្ហាញដែលមានការចូលពីវិស័យរដ្ឋ ឯកជន សមាគម អង្គការ តំណាងសណ្ឋាគារ និងភោជនីយដ្ឋាន និងអ្នកផលិតនាពេលនេះ នឹងផ្តល់លទ្ធភាពកាន់តែប្រសើរដល់ភាគីទាំងអស់ក្នុងការស្វែងយល់ពីគ្នាទៅវិញទៅមក ពិសេសជំរុញការប្រើប្រាស់ផលិតផលឬស្រុក ឲ្យកាន់តែច្រើនឡើង ព្រមទាំងអាចឈានទៅកាន់ការនាំចេញនាពេលខាងមុខ។
ឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម មានប្រសាសន៍ថា៖ក្នុងក្របខណ្ឌម៉ាក្រូ រាជរដ្ឋាភិបាលកម្ពុជា បានខិតខំបន្តការកសាងបរិយាកាសប្រកបដោយលក្ខណៈអំណោយផល ដល់ការរីកលូតលោស់នៃវិស័យឯកជន ដែលជាក្បាលម៉ាស៊ីននៃកំណើនជំរុញការអនុវត្តគោលនយោបាយអភិវឌ្ឍន៍ឧស្សាហកម្ម ២០១៥-២០២៥ ដែលជាឆ្អឹងខ្នងនៃផលិតកម្មសម្រាប់អ្នកវិនិយោគក្នុងស្រុក និងអន្តរជាតិ សំដៅរក្សាកំណើនសេដ្ឋកិច្ចប្រកបដោយចីរភាព ក្នុងគោលដៅប្រែក្លាយកម្ពុជាឱ្យទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងសម្រេចបានគោលដៅជាប្រទេសមានប្រាក់ចំណូលខ្ពស់នៅឆ្នាំ២០៥០ ខាងមុខ។
ឯកឧត្តម ម៉ៅ ថូរ៉ា មានប្រសាសន៍បន្ថែមថា ព្រឹត្តិការណ៍ពិព័រណ៍នេះ មិនត្រឹមតែជួយផ្សព្វផ្សាយឱ្យមហាជនទូទៅបានឃើញ និងស្គាល់ផលិតផលខ្មែរប៉ុណ្ណោះទេ ប៉ុន្តែនឹងជួយផលិតករនៅតាម សហគមន៍ មានលទ្ធភាពពង្រីកសមត្ថភារបស់ខ្លួនឱ្យរីកចម្រើនទៅមុខជាលំដាប់ រហូតមានលទ្ធភាពពេញលេញ អាចធ្វើជាអ្នកផ្គត់ផ្គង់រឹងមាំជូនម្ចាស់សណ្ឋាគារ ផ្ទះសំណាក់ ភោជនីយដ្ឋាន និងផ្សារទំនើបដែលកំពុងត្រូវការជាចាំបាច់នូវផលិតផលដែលបងប្អូនផលិតបាន ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
