កាលរសៀលថ្ងៃទី២២ ខែវិច្ឆិកា ឆ្នាំ២០១៩នេះ ក្រុមការងារថ្នាក់ជាតិចុះជួយស្រុកអង្គរធំ បានរៀបចំបើកវេទិការសាធារណៈដើម្បីធ្វើការត្រួតពិនិត្យ និងការគាំទ្រការអនុវត្តកម្មវិធីនយោបាយយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា នៅស្រុកអង្គរធំខេត្តសៀមរាប ដឹកនាំដោយ ឯកឧត្តម ទ្បេង សេង អនុរដ្ឋលេខាធិកាទីស្តីការគណះរដ្ឋមន្ត្រី និងជាអនុប្រធានក្រុមការងារថ្នាក់ជាតិចុះមូលដ្ឋានស្រុកអង្គរធំនិងមានការអញ្ជើញចូលរួមពីសំណាក់ឯកឧត្តមលោកជំទាវលោកលោកស្រីមកពីមន្ទីរអង្គភាពជុំវិញខេត្ត អាជ្ញាធរជាតិអប្សរា លោកមេឃុំ នគរបាលក្នុងមូលដ្ឋាន និងប្រជាពលរដ្ឋសរុបប្រមាណជាង១០០នាក់ផងដែរ ។
ក្នុងឱកាសនោះដែរ ឯកឧត្តមឡេង សេង បានមានប្រសាសន៍ថា គោលបំណងនៃការរៀបចំវេទិការនេះ គឺដើម្បីឲ្យបងប្អូនប្រជាពលរដ្ឋក្នុងមូលដ្ឋានបានលើកឡើង នូវបញ្ហាមួយចំនួន ដែលបានកើតឡើងនៅនឹងមូលដ្ឋានរបស់ពួកគាត់ ដើម្បីជូន មន្ត្រី និងអាជ្ញាធរពាក់ព័ន្ធ បានធ្វើការឆ្លើយបំភ្លឺ និង ពន្យល់អំពីនីតិវិធីដែលជាចម្ងល់របស់ប្រជាពលរដ្ឋ ។ ដោយឡែកចំពោះ បញ្ហាដែល ពុំទាន់ដោះស្រាយបាន នៅនឹងកន្លែង ក្រុមការងារនឹងយកមកពិភាក្សា និងរកវិធីដោះស្រាយជូនតាមក្រោយ ។
ជាការចូលរួម លោក ខុង ឆន ប្រធានក្រុមប្រឹក្សាឃុំលាងដៃ បានឲ្យដឹងថា នៅក្នុងឃុំលាងដៃប្រជាពលរដ្ឋមានភ្លើងប្រើប្រាស់ គឺមានចំនួនជាង៨៣%ហើយ ប៉ុន្តែក្នុងនោះដែរក៏ប្រជាពលរដ្ឋប៉ុន្មានគ្រួសារទៀតដែលមិនទាន់មានភ្លើងប្រើប្រាស់ បានសំណូមពរដល់អាជ្ញាធរអគ្គិសនីកម្ពុជា សូមជួយពង្រីកបណ្ដាញអគ្គិសនី ដល់គ្រួសារប្រជាពលរដ្ឋនៅក្នុងឃុំរបស់គាត់ផង ដើម្បីឲ្យមានថាមពលអគ្គីសនីប្រើប្រាស់ឲ្យបានគ្រប់ៗគ្នា ។
ជាការឆ្លើយតប លោក ឡាំ គាវុធ ក្រុមការងារនៃអង្គភាពអគ្គីសនីខេត្តសៀមរាប បានលើកឡើងថា ជាចក្ខុវិស័យរបស់រាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជានាយករដ្ឋមន្ត្រី បានកំណត់គោលនយោបាយជាតិលើវិស័យអគិ្គសនី កម្ពុជានៅឆ្នាំ២០២០ គ្រប់ភូមិទូទាំងប្រទេស ត្រូវតែមានថាមពលអគ្គិសនីប្រើប្រាស់ពីគ្រប់ប្រភព មិនថាជាប្រភពឯកជន ឬរដ្ឋឡើយ។
លោកបន្តថា ទាក់ទងនឹងបញ្ហានៃការតបណ្តាញអគ្គិសនីប្រើប្រាស់ជូនប្រជាពលរដ្ឋនេះ ក្រុមការងាររបស់លោកកំពុងបន្តជារៀងរាល់ថ្ងៃ ហើយក្នុងនោះដែរក្រុមការងារក៏កំពុងពន្លឿនខ្លាំងណាស់ដើម្បីជួយសម្រួលដល់ការផ្គត់ផ្គងបណ្ដាញអគ្គីសនីជូនប្រជាពលរដ្ឋនៅតាមមូលដ្ឋានប្រជាពលរដ្ឋតាមជនបទ ហើយក្នុងនោះដែរក្រុមការងារអគ្គីសនីសៀមរាប ក៏សុំសំណូមពរដល់ប្រជាពលរដ្ឋ សូមជួយចូលរួមក្នុងការងារនេះ ដោយត្រូវរកអ្នកតំណាងឲ្យប្រជាពលរដ្ឋម្នាក់ ធ្វើការស្នើសុំទៅដល់ អគ្គីសនីស្រុកបន្ទាយស្រី ដោយសារតែអគ្គីសនីស្រុកអង្គរធំ គឺផ្គត់ផ្គងបន្តចេញមកពីស្រុកបន្ទាយស្រី ដើម្បីឲ្យក្រុមការងារចូលរួមគ្នាក្នុងការងារនេះ ពន្លឿនការតបណ្ដាញអគ្គីសនីជូនប្រជាពលរដ្ឋបានឆាប់រហ័សជាងនេះផងដែរ ៕
អត្ថបទ និងរូបភាព ៖ ធន់ ពូថេ
