ព្រះតេជគុណ វិមុលសំវ ភទ្ទកោ នឿម វុទ្ធី ព្រះគ្រូចៅអធិការវត្តស្វាយរមៀត មានទីតាំងនៅលើខ្នងបារាយណ៍ទឹកថ្លា ស្ថិតក្នុងសង្កាត់ទឹកវិល ក្រុងសៀមរាប បានមានសង្ឃដីកាថា នៅថ្ងៃទី៨ និងទី៩ ខែវិច្ឆិកា ឆ្នាំ២០១៨ខាងមុខនេះ វត្តស្វាយរមៀត នឹងរៀបចំកម្មវិធីប្រណាំងទូកលក្ខណៈប្រពៃណី ដែលពិធីប្រណាំងទូកនេះ គឺធ្វើឡើងស្របទៅតាមទំនៀមទម្លាប់ ប្រពៃណីដូនតាខ្មែរដែលនិយមធ្វើតៗគ្នាមក និងជាសកម្មភាពមួយ ចូលរួមលើកស្ទួយអភិរក្សនិងថែរក្សាប្រពៃណីរបស់ដូនតាខ្មែរយើង ពិសេសរំលឹកនឹកគុណដល់កងទ័ពជើងទឹក ដែលបានទទួលជោគជ័យលើខ្មាំងសត្រូវឈ្លានពានមកលើទឹកដីខ្មែរកាលពីអតីតកាល និងក៏ជាសារបង្ហាញ ដល់អ្នកទេសចរណ៍ជាតិ អន្តរជាតិឱ្យចាប់ចិត្តដិតអារម្មណ៍ ស្របទៅតាមភូមិសាស្ត្រវត្តនេះ ទទួលបានសក្តានុពលទេសចរណ៍ពីធម្មជាតិ និងមរតក ។
ព្រះតេជគុណ មានសង្ឃដីកាបញ្ជាក់ទៀតថា កម្មវិធីប្រណាំងមានរយៈពេល២ថ្ងៃ ដោយមានទូកចូលរួមចំនួន១២គូ ដែលទូកនីមួយៗ មានចំណុះ៦នាក់ ហើយឆ្នាំនេះ គណៈកម្មការវត្ត នឹងជួយឧបត្ថម្ភសម្លៀកបំពាក់ដល់កីឡាករចំណុះទូកទាំង២៤ ដែលបានចុះឈ្មោះចូលរួមប្រកួត ក្នុងទូកមួយថវិកា១០០ដុល្លារ ហើយដោយឡែកនៅមានថវិកា និងពានរង្វាន់សម្រាប់លើកទឹកចិត្ត ចំពោះទូកលេខ១ដល់លេខ៣ ដូចកាលពីឆ្នាំមុនៗផងដែរ ដូច្នេះតាមរយៈនេះ សូមអំពាវនាវដល់ប្រជាពុទ្ឋបរិស័ទ និងអ្នកទេសចរណ៍ជាតិ និងអន្តរជាតិ ចូលរួមលើកទឹកចិត្ត និងគាំទ្រកម្មវិធីនេះឱ្យបានច្រើនកុះករ និងសូមអ្នកចូលរួមទស្សនាទាំងអស់ជួយរក្សាបរិស្ថានអនាម័យ ចៀសវាងនូវអំពើអបាយមុខទាំងឡាយណា ដែលសង្គមមិនទទួលស្គាល់ ព្រមទាំងចូលរួមសហការការពារសន្តិសុខសណ្តាប់ធ្នាប់ទាំងអស់គ្នាផងដែរ។
សូមបញ្ជាក់ថា ក្នុងរយៈពេល៤ឆ្នាំចុងក្រោយនេះ វត្តបារាយណ៍មហានទី រតនារាម ហៅវត្តស្វាយរមៀត ព្រះគ្រូចៅអធិការ ព្រះសង្ឃ និងគណៈកម្មការអាចារ្យ ដោយមានការគាំទ្រ ចូលរួមពីប្រជាពុទ្ឋបរិស័ទ អាជ្ញាធរមូលដ្ឋាន ប្រជាការពារក្នុងសង្កាត់ នគរបាលប៉ុស្តិ៍ អាជ្ញាធរអប្សរា និងអាជ្ញាធរខេត្តផងដែរ បានរៀបចំកម្មវិធីប្រណាំងទូកមួងលក្ខណៈប្រពៃណី ស្របជាមួយកម្មវិធីបុណ្យផ្សេងៗ ក្រោមការចូលរួមឧបត្ថម្ភគាំទ្រថវិកាពីសប្បុរជនជាពាណិជ្ជករ អាជីវករ និងប្រជាពលរដ្ឋជិតឆ្ងាយជាច្រើនផងដែរ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្
