ក្រសួងទេសចរណ៍ បង្ហាញការយកចិត្តទុកដាក់ ដើម្បីប្រគួតប្រជែងទាក់ទាញភ្ញៀវទេសចរចិន ដែលជាទីផ្សារទេសចរណ៍ដ៏ធំរបស់ពិភពលោក !
បច្ចុប្បន្នេះ ទីផ្សារទេសចរណ៍ចិនកំពុងតែកើនឡើង ដោយសារតែចិនគឺជាទីផ្សារទេសចរណ៍ដ៏ធំរបស់ពិភពលោក ។ ប្រជាពលរដ្ឋចិនមានចំនួន ១ ៣០០លាននាក់ ក្នុងនេះប្រជាជនចិនដែលមានលទ្ធភាពដើរទស្សនាចរក្រៅប្រទេសមានចំនួន ៣០០លាននាក់ ប៉ុន្តែក្នុងឆ្នាំ២០១៧កន្លងទៅនេះ ប្រជាពលរដ្ឋចិនដែលបានចេញដើរទស្សនាចរណ៍ក្រៅប្រទេសជាក់ស្តែងនៅលើពិភពលោក មានចំនួន ១២០លាននាក់ និងបានទម្លាក់ការចំណាយលុយប្រមាណ ២៦០ពាន់លានដុល្លា ។
ឯកឧត្តម ថោង ខុន រដ្ឋមន្ត្រីក្រសួងទេសចណ៍ មានប្រសាសន៍យ៉ាងដូច្នេះ នាព្រឹកថ្ងៃទី៣០ ខែតុលា ឆ្នាំ២០១៨ នៅសាលាខេត្តសៀមរាប ក្នុងកិច្ចប្រជុំបូកសារុប លទ្ធផលការងាររយៈពេល៩ខែ ឆ្នាំ២០១៨ របស់មន្ទីរទេសចរណ៍ខេត្តសៀមរាប ។ ឯកឧត្តម ថោង ខុន បានឲ្យដឹងទៀតថា ៖ នៅក្នុងឆ្នាំ២០២០ខាងមុខ គេទស្សន៍ទាយថា ចិននឹងចេញដើរទស្សនាចរណ៍លើពិភពលោក ប្រហែលពី ២០០ ទៅ ២៥០លាននាក់ នឹងអាចបង្ហូរការចំណាយរបស់ខ្លួនប្រហែលដល់ទៅ ៤៦០ពាន់លានដុល្លា ។
អាស្រ័យហេតុដូច្នេះហើយ ទើបប្រទេសណាក៏ដោយនៅលើពិភពលោក ក៏ព្យាយាមចាប់យកឱកាសដ៏ល្អនេះដែរដើម្បីអភិវឌ្ឍប្រទេស ព្រោះថាវិស័យទេសចរណ៍ គឺជាវិស័យសេដ្ឋកិច្ចមួយដ៏សំខាន់ ។
ក្រសួងទេសចរណ៍ក៏បានសម្លឹងឃើញលំហូរនៃភ្ញៀវទេសចរចិនមកកាន់កម្ពុជាផងដែរ ពិសេសនៅខេត្តសៀមរាបមានការកើនឡើងជាលំដាប់ក្នុងរយៈពេលប៉ុន្មានឆ្នាំចុងក្រោយនេះ ។ ជាការកត់សម្គាល់ កំណើនភ្ញៀវទេសចរណ៍ចិន បានរួមចំណែកយ៉ាងច្រើនដល់កំណើនសេដ្ឋកិច្ចកម្ពុជា បង្កើតការងារធ្វើ បង្កើតប្រភពនៃប្រាក់ចំណូលដោយផ្ទាល់ដល់សេវាករទេសចរណ៍ និង ដោយប្រយោលដល់ប្រជាពលរដ្ឋកម្ពុជា។
ដើម្បីត្រៀមលក្ខណៈទទួលភ្ញៀវទេសចរចិន និងធានាផលប្រយោជន៍អតិបរិមារដែលទទួលបានពីកំណើនភ្ញៀវទេសចរចិន កម្ពុជាបានដាក់ចេញនូវសៀវភៅ ស ស្តីពី ( China Ready ) សម្រាប់ទេសចរណ៍កម្ពុជា និង យុទ្ធសាស្ត្រទីផ្សារដោយឡែកសម្រាប់ភ្ញៀវទេសចរចិន ។ ព្រមជាមួយនេះ ក្រសួងទេសចរណ៍ បានបង្កើតឲ្យមានស្តង់ដារវាយតម្លៃកម្ពុជា សម្រាប់សេវាកម្មទេសចរណ៍ ត្រៀមទទួលភ្ញៀវទេសចរចិនផងដែរ។
ទន្ទឹមនឹង ការរៀបចំយុទ្ធសាស្ត្ររបស់រាជរដ្ឋាភិបាល ក្នុងការគ្រប់គ្រង និងអភិវឌ្ឍវិស័យទេសចរណ៍នៅកម្ពុជា ឱ្យមាននិរន្តរភាពនេះដែរ ឯកឧត្តមបណ្ឌិត ថោង ខុន មានប្រសាសន៍បន្ថែមថា៖ ប្រតិបត្តិករ និងភ្នាក់ងារទេសចរណ៍ទាំងអស់ ត្រូវបង្កើនការជួបជុំពិភាក្សាស្វែងរកបទពិសោធល្អៗ ដល់គ្នាទៅវិញទៅមក រិះរកវិធីសាស្ត្របង្កើនផលិតផលទេសចរណ៍ឱ្យបានច្រើនដើម្បីទាក់ទាញអ្នកទេសចរណ៍ ពង្រឹងគុណភាពសេវា តាមរយៈការបណ្តុះបណ្តាលធនធានមនុស្សឆ្លើយតបទៅនឹងតម្រូវការទីផ្សារ សំខាន់ពង្រឹងគោលដៅការគ្រប់គ្រងឱ្យបានល្អ។
បើតាមរបាយការណ៍របស់មន្ទីរទេសចរណ៍ខេត្តសៀមរាបបង្ហាញថា រយៈពេល៩ខែដើមឆ្នាំ២០១៨នេះ ទីផ្សារទេសចរណ៍សំខាន់ៗទាំង១០មកសៀមរាប គឺភ្ញៀវចិនស្ថិតក្នុងលំដាប់ទី១ ស្មើនឹង ៨៣១ ៨០៣ នាក់ ស្មើនឹង ៤៣% នៃចំនួនភ្ញៀវអន្តរជាតិសារុប ជាង១លាន៩សែននាក់ កើនឡើង ២៨.១៧% បើធៀបទៅនឹងរយៈពេលដូចគ្នាក្នុងឆ្នាំ២០១៧ ៕
អត្ថបទ និង រូបថត ៖ លោក យូ វង្ស និង លោក ងិន គឹមឡេង
កែសម្រួលអត្ថបទ ៖ លោក សេង ផល្លី
