គ្រូបង្គោលនៃកាកបាទក្រហមកម្ពុជាចំនួន៤៧នាក់ មកពី២៥ រាជធានី ខេត្តក្នុងប្រទេសកម្ពុជា ទទួលបានការបំប៉នវិជ្ជាសង្គ្រោះបឋម មានរយៈពេល៣ថ្ងៃ ចាប់ទី០១ដល់ថ្ងៃទី០៣ ខែវិច្ឆិកា ឆ្នាំ២០១៨ នៅសណ្ឋាគារ ស្តារីអង្គរ ខេត្តសៀមរាប ដែលរៀបចំឡើងដោយកាកបាទក្រហមកម្ពុជា ក្រោមកិច្ចសហការជាមួយកាកបាទក្រហមជប៉ុន ក្នុងគោលបំណង កែតម្រូវ ពិនិត្យបច្ចេកទេស និងបង្កើនសមត្ថភាពគ្រូបង្គោលវិជ្ជាសង្គ្រោះបឋមបន្ថែម តាមសាខានីមួយៗ ។
មានប្រសាសន៍នាឱកាសនោះលោកជំទាវ គួយ ណាលីន ឃឹម ប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានលើកឡើងថា វិជ្ជាសង្គ្រោះបឋមគឺ ជាកត្តាដ៏មានសារៈសំខាន់បំផុត នៅតាមបណ្តាប្រទេសនីមួយៗលើកសកលលោក ក្នុងការសង្គ្រោះអាយុជីវិតដល់ជនរងគ្រោះនូវឧប្បទ្ទវហេតុផ្សេងៗ បើទោះបីយើងទាំងអស់គ្នាស្ថិតក្នុងយុគសម័យបច្ចេកវិជ្ជាទំនើបក្តី ក៏ការសង្គ្រោះដោយមនុស្សដែលមានចំណេះដឹង អាចជួយដល់ជនរងគ្រោះគ្រប់ប្រភេទ ក្នុងនោះគ្រោះមហន្តរាយដោយធម្មជាតិ ពិសេសគ្រោះថ្នាក់ចរាចរណ៍ដែលកើតឡើងស្ទើរតែរាល់ថ្ងៃនោះ ។
លោកជំទាវ គួយ ណាលីន ឃឹម ប៊ុនសុង មានប្រសាសន៍ទៀតថា ការងារនេះ គឺស្របតាមគោលការណ៍គ្រឹះនៃចលនាអន្តរជាតិកាកបាទក្រហម អឌ្ឍចន្ទក្រហម ដែលសមាគមជាតិជាសមាជិកទាំងអស់តែងបានប្រកាន់ខ្ជាប់ក្នុងបេសកកម្មមនុស្សធម៌របស់ខ្លួន ដូច្នេះតាមរយៈនៃការផ្តល់ចំណេះដឹងនេះ គឺបានធ្វើការបណ្តុះបណ្តាលដល់អ្នកស្ម័ត្រចិត្ត , យុវជនកាកបាទក្រហមកម្ពុជា និង តាមគ្រឹះស្ថាន សិក្សា ដើម្បីធ្វើការចែករំលែកបន្តដល់ប្រជាពលរដ្ឋតាមសហគមន៍ និង ផ្តល់នូវបទពិសោធន៍ ដើម្បីញ៉ាំងឲ្យបេសកកម្ម មនុស្សធម៌នេះ មានប្រសិទ្ធភាព ក្នុងបរិបទនៃសកលភាវូបនីយកម្ម ប៉ុន្តែប្រការសំខាន់ គឺសូមឲ្យសិក្ខាកាមទាំងអស់ ត្រូវខិតខំយកចិត្តទុកដាក់សិក្សារៀនសូត្រក្នុងរយៈពេល៣ថ្ងៃនេះ ដើម្បីទទួលបាននូវចំណេះដឹង និង បទពិសោធន៍ បច្ចេកទេសថ្មីៗ យកទៅធ្វើការផ្សព្វផ្សាយ និង អនុវត្តន៍បន្តនៅក្នុងមូលដ្ឋានរបស់ខ្លួន ប្រកបទៅដោយប្រសិទ្ធភាពខ្ពស់ ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#កាកបាទក្រហម
