ដើម្បីបញ្ជ្រាបការយល់ដឹងឲ្យកាន់តែស៊ីជម្រៅ និងទូលំទូលាយបន្ថែមទៀត អំពីតម្លៃប្រវត្តិសាស្ត្រខ្មែរ ការងារអភិរក្ស និងអភិវឌ្ឍន៍ ក្នុងតំបន់ការពារបេតិកភណ្ឌ«អង្គរ»ទាំងមូល ដល់បុគ្គលិកដែលទើបជ្រើសរើសថ្មី អាជ្ញាធរជាតិអប្សរា បានបើកវគ្គបណ្តុះបណ្តាលស្ដីអំពីកិច្ចការពារ និងគ្រប់គ្រងរមណីយដ្ឋានអង្គរ បេតិកភណ្ឌពិភពលោក។
ឆ្លងកាត់ការធ្វើតេស្តសមត្ថភាពដោយសរសេរ និងផ្ទាល់មាត់ អាជ្ញាធរជាតិអប្សរាជ្រើសរើសបានបុគ្គលិកផ្នែកសណ្តាប់ធ្នាប់ចំនួន ៣៦នាក់ និងផ្នែកទេសចរណ៍ចំនួន ៦៤នាក់ សរុប១០០នាក់។
លោក អ៊ឹម សុខរិទ្ធី អនុប្រធានមជ្ឈមណ្ឌលអន្តរជាតិស្រាវជ្រាវ និងតម្កល់ឯកសារអង្គរ តំណាងឱ្យឯកឧត្តម ស៊ុ ម៉ាប់ អគ្គនាយកអជ្ញាធរជាតិអប្សរាបានឱ្យដឹងថា កម្មវិធីបណ្តុះបណ្តាលនេះមានសារៈសំខាន់ណាស់ ដែលអាចផ្តល់ចំណេះដឹងជាមូលដ្ឋានដល់បុគ្គលិក ដែលបម្រើការងារនៅតាមប្រាសាទ ដែលស្ថិតនៅជួរមុខ ប្រៀបបានជាខ្សែត្រៀម ស្ថិតនៅជាប់ជាមួយប្រាសាទ ប្រតិបត្តិការណ៍ផ្ទាល់ជាពិសេសជាមួយភ្ញៀវទេសចរ។ លោកបានបន្តថាយើងមានគោលការណ៍សិក្សារៀនសូត្របន្តិចម្តងៗជាបន្តបន្ទាប់ និងមានភាពសាមគ្គីគ្នាផ្តល់ព័ត៌មានឱ្យគ្នាទៅវិញទៅមក ហើយអាចយកចំណេះដឹងផ្ទាល់ខ្លួននេះទៅអប់រំ ផ្សព្វផ្សាយបន្តដល់សហគមន៍ ជៀសវាងការទទួលយកព័ត៌មានមិនពិត។
គោលបំណងនៃ វគ្គបណ្តុះបណ្តាលនេះផ្តោតសំខាន់ទៅលើប្រវត្តិសាស្ត្រ អារ្យធម៌ និងបេតិកភណ្ឌ។ លើសពីនេះគឺគោលការណ៍អភិរក្សតំបន់រមណីយដ្ឋានអង្គរ បេតិកភណ្ឌពិភពលោក ការគ្រប់គ្រងបេតិកភណ្ឌវប្បធម៌ និងអនុសញ្ញាបេតិកភណ្ឌពិភពលោកបង្ហាញដល់សិក្ខាកាមផងដែរ មុននឹងលើកឡើងអំពីអាជ្ញាធរជាតិអប្សរា និងលិខិតបទដ្ឋានគតិយុត្តពាក់ព័ន្ធ ទាក់ទងអំពីការគ្រប់គ្រងមន្ត្រី-បុគ្គលិក។ ម្យ៉ាងទៀតខិតខំធ្វើយ៉ាងណាគ្រប់គ្រងប្រព័ន្ធផ្លូវទឹកបុរាណក្នុងឧទ្យានអង្គរ ការគ្រប់គ្រង និងអភិវឌ្ឍន៍ទេសចរណ៍ប្រកបដោយចីរភាព។ ការគ្រប់គ្រងសំណង់លំនៅដ្ឋានខ្មែរក្នុងតំបន់អង្គរ និងគ្រប់គ្រងលំនៅដ្ឋានខ្មែរ ដែលជាកិច្ចការដ៏មានសារៈសំខាន់ រួមនិងការអភិរក្ស និងអភិវឌ្ឍន៍បេតិកភណ្ឌក្រុងសៀមរាប អង្គរ និងការអភិវឌ្ឍន៍សហគមន៍ក្នុងតំបន់អង្គរ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
