សិស្សទីទ័លក្រចំនួន ៥០០នាក់ ទទួលកង់ជំនួយសប្បុរសធម៌ពីមូលនិធិដ៍ស្រស់ត្រកាលនៃពិភពលោក នៃសារធារណរដ្ឋកូរ៉េ តាមរយៈអង្គការឡូសទុសវើល។
បើតាមរបាយការណ៍ លោក សេង គឺមហុង តំណាងអង្គការ ឡូតទុសវើល បានបញ្ជាក់ថា៖ នេះជាលើកទីបី ហើយដែលព្រះតេជគុណ ឆង់ យ៉ តំណាងមូលនិធិដ៍ស្រស់ត្រកាលនៃពិភពលោក បាននាំយកជំនួយមនុស្សធម៌ ជាកង់ជូន សិស្សក្រីក្រ ដែលមានចំនួនសរុប ១២៥០ គ្រឿង ក្នុងនោះសំរាប់ឆ្នាំំ ២០១៦ មានចំនួន ៣០០ គ្រឿង ឆ្នាំ ២០១៧ មានចំនួន ៤៥០ គ្រឿង និងនៅឆ្នាំ ២០១៨នេះ មានចំនួន ៥០០ គ្រឿងបន្ថែមទៀត។ លើសពីនេះ ម្ចាស់ជំនួយនៃមូលនិធិដ៍ស្រស់ត្រកាលនៃពិភពលោក ក៏បានប្រគល់ផ្ទះមួយខ្នង ជូនដល់គ្រួសារទីទ័លក្រមួយគ្រួសារ ដែលមានប្តីឈ្មោះ ឈិន ថាវ ប្រពន្ធឈ្មោះ លន់ យ៉ា និង កូនប្រុស ថាវ ឌីណា ចំណាយថវិកាសរុប ២៩០០ ដុល្លារអាមេរិច។
លោក អោ ម៉ៅ ប្រធានមន្ទីរសង្គមកិច្ច អតីតយុទ្ធជន និង យុវនីតិសម្បទា ខេត្តសៀមរាប បានថ្លែងការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ ព្រះតេជគុណ ឆង់ យ៉ លោក លោកស្រី ដែលជាម្ចាស់ជំនួយ នៃសារធារណរដ្ឋកូរ៉េ ព្រមទាំងអង្គការ ឡូសទុសវើល រួមនិងអាជ្ញាធរដែនដី ភូមិជ័យ សង្កាត់ទឹកវិលទាំងអស់ ដែលបានសហការ រៀបចំពិធីអំណោយនេះឡើង។ ជំនួយសប្បុរសធម៌នាពេលនេះ បានបង្ហាញឲ្យឃើញ ពីការទឹកចិត្តសប្បុរស របស់រដ្ឋាភិបាល និងប្រជាជន នៃសាធារណរដ្ឋកូរ៉េ លើសពីនេះព្រះតេជគុណ ឆន់ យ៉ ចៅអធិកានៅវត្តយ៉យ៉សនវុន នៃសារធារណរដ្ឋកូរ៉េ បានចុះកិច្ចព្រមព្រៀង ជាមួយអង្គការឡូសទុសវើល ដើម្បីអំពាវនាវ និងគៀងគរ ជំនួយពីសប្បុរសជន នៅប្រទេសកូរ៉េ ក្នុងគោលបំណងជួយសម្រួល ដល់ការលំបាក របស់សិស្សានុសិស្ស ក្រីក្រ ខ្វះមធ្យោបាយ សម្រាប់ធ្វើដំណើរ ទៅសិក្សារៀនសូត្រ ដើម្បីក្លាយខ្លួន ជាសិស្សល្អ កូនល្អ និងពលរដ្ឋល្អ មានប្រយោជន៍ ដល់សង្គមនា ពេលអនាគត។
ជាមួយគ្នានោះ លោក អោ ម៉ៅ បានសំណូមពរដល់ក្មួយៗ ទទួលបានកង់ ដល់ស្រស់ស្អាតនេះ ត្រូវចេះថែរក្សា ឲ្យបានគង់វង្ស និងសូមក្មួយៗ ជិះកង់ដោយប្រុងប្រយ័ត្ន ត្រូវគោរពច្បាប់ចរាចរណ៍ ឲ្យបានខ្ចាប់ខ្ជួន ដើម្បីបង្ការកុំឲ្យមានគ្រោះថ្នាក់ ចរាចរណ៍បណ្ដាលឲ្យខាតបង់ទ្រព្យសម្បត្តិ ប្រាក់កាស អាយុជីវិត និងពេលវេលា រៀនសូត្រ។
លោក អោ ម៉ៅ ក៏បានថ្លែងអំណរគុណយ៉ាងជ្រាវជ្រៅដល់ម្ចាស់ជំនួយ និងប្រធានមជ្ឍមណ្ឌលឡូសទុសវើល ព្រមទាំងបុគ្គលិកទាំងអស់របស់អង្គការ ដែលបានខិតខំបំពេញការងារបស់ខ្លួនប្រកបដោយប្រសិទ្ធភាព ហើយមណ្ឌលកុមារឡូសទុសវើល បានសហការណ៍ការងាយ៉ាងល្អជាមួយមន្ទីរសង្គមកិច្ច អតីតយុទ្ធជន និង យុវនីតិសម្បទា ខេត្តសៀមរាប ក្នុងការអនុវត្តន៍គម្រោងមនុសស្សធម៌ជាច្រើនលើវិស័យ សុខាភិបាល អប់រំ និង សង្គមកិច្ច ក្នុងរយៈពេល ១២ ឆ្នាំកន្លងមកនេះ។
អត្ថបទ និង រូបថត ៖ លោក កៅ សុធន់
កែសម្រួលអត្ថបទ ៖ លោក សេង ផល្លី
