លោកវរសេនីយ៍ឯក ណុប សារ៉ាក់ អធិការនគរបាលស្រុកសូទ្រនិគម ខេត្តសៀមរាប បានឲ្យដឹងថា នៅវេលាម៉ោង០៧និង១០នាទីព្រឹក ថ្ងៃទី៣១ ខែតុលា ឆ្នាំ២០១៨ម្សិលមិញនេះ មានករណីកាណូតបុកទូក នៅចំណុចស្ពានឆ្លងព្រែកស្ថិតក្នុងភូមិរទាំង ឃុំកំពង់ឃ្លាំង ស្រុកសូទ្រនិគម បណ្ដាលឲ្យមនុស្សម្នាក់បានស្លាប់នៅនឹងកន្លែងកើតហេតុ ។
លោកអធិការនគរបាលស្រុកសូទ្រនិគម បានឲ្យដឹងទៀតថា ករណីនេះគឺ កាណូតបើកសណ្ដោងគ្នាបណ្ដោយតាមព្រែក បើកបរមានល្បឿនលឿន ហើយខ្វះការប្រុងប្រយ័ត្ន ដែលបើកបរដោយឈ្មោះ រុន រ៉ាក់ ភេទប្រុស អាយុ១៥ឆ្នាំ រស់នៅភូមិអូរតាពុត ឃុំកំពង់ឃ្លាំង និងអ្នករួមដំណើរពីរនាក់ទៀត បានបុកក្បាលទូកដែលកំពុងអុំឆ្លងកាត់ទទឹងព្រែក បណ្ដាលឱ្យអ្នកអុំទូកឈ្មោះ សឿរ តាវ ភេទប្រុស អាយុ៦៣ឆ្នាំ រស់នៅភូមិរទាំង ឃុំកំពង់ឃ្លាំង ស្រុកសូទ្រនិគម ធ្លាក់ទឹកស្លាប់នៅកន្លែងកើតហេតុ ។
ក្រោយពេលកើតហេតុក ម្លាំងនគរបាលជំនាញបានចុះទៅធ្វើការវាស់វែងកន្លែងកើតហេតុ និងបានឃាត់ខ្លួនអ្នកបើកបរកាណូតទៅប៉ុស្ដិ៍នគរបាលរដ្ឋបាលកំពង់ឃ្លាំង ដើម្បីសាកសួរចម្លើយបំភ្លឺ និងកសាងសំណុំរឿង ទៅកាន់ការិយាល័យជំនាញ ដើម្បីបន្តនីតិវិធីច្បាប់ ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#កាណូតបុកទូក
