ក្នុងវេទិកាថ្ងៃបើកបវេសនកាលពីឆ្នាំសិក្សាថ្មី២០១៨ និង២០១៩ កាលពីថ្ងៃទី១ ខែវិច្ឆិកា ឆ្នាំ២០១៨នេះ លោក ពឹង គឹមឆេន នាយកសាលាបឋមសិក្សាវត្ដបូព៌ សិ្ថតនៅសង្កាត់សាលាកំរើក ក្រុងសៀមរាប បានលើកឡើងថា លោកគ្រូ អ្នកគ្រូ និងអាណាព្យាបាល មាតាបិតាសិស្ស នៃសាលាបឋមសិក្សាវត្ដបូព៌ បានស្នើសុំដំឡើងសាលាបឋមសិក្សាមួយនេះ ទៅជាអនុវិទ្យាល័យ ។
ដើម្បីងាយស្រួលដល់សិស្សានុសិស្សបន្ដការសិក្សានៅកន្លែងដដែលទៀត ស្របពេលដែលនៅរយៈពេលពីរឆ្នាំទៀត លោកមានគម្រោងបង្កើតឲ្យមានអនុវិទ្យាល័យនៅក្នុងសាលាបឋមសិក្សានេះ ដើម្បីប្រែក្លាយសាលានេះ ឲ្យទៅជាសាលាកម្រិតមូលដ្ឋាន មានន័យថា ពីថ្នាក់មតេ្ដយ្យទៅដល់ថ្នាក់ទី៩ ដោយលោក និង អាណាព្យាបាលសិស្ស បានអំពាវនាវ និងបានស្នើទៅដល់ក្រសួងសេដ្ឋកិច្ច និងហិរញ្ញវត្ថុ ធ្វើយ៉ាងជួយជ្រោមជ្រែងឲ្យសាលារៀននេះ មានថ្នាក់ទី៧ដល់ទី៩ថែមទៀត ដើម្បីជាជួយសម្រួលដល់ការសិក្សារបស់ពួកគេ ទៅតាមទស្សនៈវិស័យ នៃវិស័យអប់រំ ខណៈដែលលោកជិតចូលនិវត្ដន៍ ។
លោក ពឹង គឹមឆេន បានបញ្ជាក់ទៀតថា ជាមួយគ្នានោះដែរ សាលារៀននេះ នឹងរៀបចំអាគារសមាធិ ដើម្បីតាំងចិត្ដឲ្យស្ងប់នៅពេលមុនសិក្សា និងក្រោយពេលសិក្សា រួមនឹងគម្រោងរៀបចំបន្ទប់វីដេអូខនហ្វ្រិន សម្រាប់ទស្សនាពីសាលារៀនសម្ព័ន្ធមេត្រីនៅប្រទេសជប៉ុន ថៃ អូស្ដ្រាលី និងកូរ៉េ ដែលគេបង្រៀនពីប្រទេសទាំងនោះ និង បង្កើតកន្លែងលក់ចំណីអាហារឲ្យដូចផ្សារទំនើបនៅរាជធានីភ្នំពេញ ដើម្បីថែរក្សាសុខភាពសិស្សានុសិស្ស ហើយសាលាសម្ព័ន្ធមេត្រីទាំងបួននោះគេអាចមកទស្សនានៅសាលារៀនវត្ដបូព៌បាន ខណៈគម្រោងនេះ នឹងចាប់ផ្ដើមនៅដើមឆ្នាំ២០១៩ ។
ពាក់ព័ន្ធនឹងការស្នើសុំនេះ ឯកឧត្ដម ហ៊ែល ចំរើន អនុរដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ ដែលចូលរួមបើកបវេសនាកាលនៅសាលារៀនវត្ដបូព៌នេះ បានមានប្រសាសន៍ថា លោកនឹងយកសំណើលោកគ្រូ អ្នកគ្រូ ព្រមទាំងមាតាបិតាសិស្ស ដាក់ជូនថ្នាក់ដឹកនាំ ដើម្បីសម្រេចជាផ្លូវការនាពេលឆាប់ៗខាងមុខនេះ ហើយលោកបានរំពឹងថា សាលាបឋមសិក្សាវត្ដបូព៌ នឹងមានបន្ថែមថ្នាក់អនុវិទ្យាល័យទៀត ប៉ុន្តែ សុំឲ្យលោកគ្រូអ្នកគ្រូ បន្តការយកចិត្ដទុកដាក់បង្រៀនដល់សិស្សានុសិស្សបន្ថែមទៀត ដើម្បីឲ្យការសិក្សាមានស្ដង់ខ្ពស់ និងមានគុណភាព៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
