ក្នុងឱកាសជួបសំណេះសំណាលជាមួយលោកគ្រូ អ្នកគ្រូ និង សិស្សានុសិស្ស នៃអនុវិទ្យាល័យ មិត្តភាពខ្មែរ-ជប៉ុន ព្រះឥន្ទកោសា ស្ថិតក្នុងភូមិដូនប៉ា សង្កាត់ស្លក្រាម ក្រុងសៀមរាប នារសៀលថ្ងៃទី០៤ ខែវិច្ឆិកា ឆ្នាំ២០១៨នេះ ។
ឯកឧត្តម ហ៊ុន ម៉ាណែត តំណាងដ៏ខ្ពង់ខ្ពស់សម្តេចតេជោនាយករដ្ឋមន្ត្រី ហ៊ុន សែន បានមានប្រសាសន៍ថា សម្ដេចតេជោ ហ៊ុន សែន បានសម្រេចផ្តល់ជូនការជួសជុលលាបថ្នាំពណ៌អាគារចាស់ចំនួន៣ខ្នង ក្នុងនោះ មាន១ខ្នង ផ្លាស់ដំបូលក្ប្រឿងចាស់ចេញ , បំពាក់ការតបណ្តាញអគ្គិសនី និងការធ្វើតារាងបាល់បោះផងដែរ ហើយសម្រាប់អគារចាស់ទ្រុឌទ្រោម១ខ្នងទៀតមាន៣បន្ទប់នោះ តម្រូវឲ្យវាយចោល កសាងអាគារថ្មីជំនួស ១ខ្នង មាន២ជាន់ ស្មើនឹង៦បន្ទប់ ។
ឯកឧត្តម ហ៊ុន ម៉ាណែត មានប្រសាសន៍ទៀតថា នេះជាបទបញ្ជាដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺការនាំយកនូវការឆ្លើយតបសំណូមពររបស់ លោកគ្រូ អ្នកគ្រូ និងតម្រូវការចាំបាច់របស់ក្មួយៗសិស្សានុសិស្ស ។
គួរំលឹកដែរថា កន្លងទៅថ្មីៗនេះ លោកគ្រូ អ្នកគ្រូ អនុវិទ្យាល័យ មិត្តភាពខ្មែរ-ជប៉ុន ព្រះឥន្ទកោសា បានធ្វើសំណូមពរតាមរយៈឯកឧត្តម ហ៊ុន ម៉ាណែត គោរពផ្ញើជូនសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ស្នើសុំជួសជុលលាបថ្នាំពណ៌អគារសិក្សា , ជួយកែលម្អសោភ័ណភាព , បំពាក់បណ្តាញអគ្គិសនី ចំនួន៤អគារ និង ធ្វើតារាងបាល់បោះ ។
សូមបញ្ជាក់ថា ក្នុងឱកាសនេះដែរ សម្តេចតេជោ បានផ្តល់អំណោយកំដរដៃជូនលោកគ្រូ អ្នកគ្រូ ចំនួន៧០នាក់ ដែលម្នាក់ៗទទួលបានថវិកា ៥ម៉ឺនរៀល និងសម្លៀកបំពាក់ឯកសណ្ឋានគ្រូបង្រៀន ក្នុងម្នាក់ៗចំនួន ២កំប្លេ ហើយសិស្សានុសិស្សចំនួនជាង ១ពាន់នាក់ ដែលក្នុងម្នាក់ៗទទួលបាន សៀវភៅសរសេរ ប៊ិច និង ថវិកា ១ម៉ឺនរៀល ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
