ឯកឧត្តម ចាង ឈុនស៊ាន អនុប្រធានសភាប្រជាជនចិនទូទាំងប្រទេស មានប្រសាសន៍ថា រដ្ឋាភិបាលចិន នឹងបន្តជំរុញលើកទឹកចិត្តឲ្យអ្នកទេសចរចិន មកទស្សនាកម្ពុជា ជាពិសេសទស្សនាអង្គរវត្តឲ្យកាន់តែច្រើនឡើងថែមទៀត ជាមួយនឹងការកៀងគរអ្នកវិនិយោគចិន ឱ្យមកដាក់ទុនវិនិយោគនៅកម្ពុជា ជាពិសេស នៅខេត្តសៀមរាប ព្រោះប្រាង្គប្រាសាទអង្គរវត្តរបស់កម្ពុជា ថាជាអច្ឆរិយៈវត្ថុ និងជាស្នាដៃ នៃស្ថាបត្យកម្មកំពូល ដ៏អស្ចារ្យនៅលើពិភពលោក និង បង្ហាញអំពីអរិយ្យធម៌ដ៏រុងរឿងក្នុងប្រវត្តិសាស្ត្រកម្ពុជា និងជាសម្បត្តិបេតិកភណ្ឌ ដែលជាសក្តានុពលដ៏ទាក់ទាញបំផុត ចំពោះអ្នកទេសចរក្នុងពិភពលោក ។
ឯកឧត្តម ចាង ឈុនស៊ាន មានប្រសាសន៍យ៉ាងនេះ ក្នុងកម្មវិធីលៀងសាយភោជន៍នៅសណ្ឋាគារសុខាអង្គរ ខេត្តសៀមរាប ដែលផ្ដួចផ្ដើមឡើងដោយឯកឧត្ដមបណ្ឌិតអភិបាលខេត្តសៀមរាប ក្នុងឱកាសនៃដំណើរមកបំពេញទស្សនកិច្ចផ្លូវការនៅខេត្តសៀមរាបរបស់ឯកឧត្តម ចាង ឈុនស៊ាន និង ប្រតិភូ ក្នុងរយៈពេល២ថ្ងៃ នៃដើមខែវិច្ឆិកា ឆ្នាំ២០១៨នេះ ។
ឯកឧត្តម ចាង ឈុនស៊ាន មានប្រសាសន៍ទៀតថា ចិន-កម្ពុជា គឺជាអ្នកជិតខាងល្អ ជាមិត្តភ័ក្តិល្អ ជាដៃគូដ៏ល្អ និង ជាបងប្អូនដ៏ល្អ ហើយចំណងទាក់ទងជាមិត្តភាព សាមគ្គីភាព និង កិច្ចសហប្រតិបត្តិការនានា រវាង កម្ពុជា-ចិន កន្លងមក បាន បញ្ជាក់យ៉ាងច្បាស់ នៅក្នុងជំនួបសំដែងការគួរសម និងពិភាគ្សាការងារ រវាងឯកឧត្តមជាមួយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហើយក្រោមការដឹកនាំរបស់សម្តេចតេជោនាយករដ្ឋមន្ត្រី ហ៊ុន សែន នាពេលបច្ចុប្បន្ននេះ ការរីកចម្រើនយ៉ាងឆាប់រហ័សរបស់កម្ពុជា គឺពិតជាមានមោទនភាព និង មិនអាចកាត់ថ្លៃបាន ។
ក្នុងឱកាសនោះ ឯកឧត្តម ឃឹម ប៊ុនសុង អភិបាលខេត្តសៀមរាប បានមានប្រសាសន៍ថា ដំណើរទស្សនកិច្ចរបស់ គណៈប្រតិភូជាន់ខ្ពស់សភាប្រជាជនចិនទូទាំងប្រទេស នៅលើទឹកដីនៃព្រះរាជាណាចក្រកម្ពុជា គឺជាសក្ខីភាព ឆ្លុះបញ្ចាំងឱ្យឃើញច្បាស់ពីចំណងមិត្តភាព សាមគ្គីភាព និងកិច្ចសហប្រតិបត្តិការយ៉ាងស្អិតរមួត និងល្អផូរផង់ រវាងសភារដ្ឋាភិបាល និងប្រជាជន នៃប្រទេសយើងទាំងពីរ ហើយដែលបាន និងកំពុងបន្តពង្រឹងពង្រីក ថែរក្សាពូនជ្រុំនូវទំនាក់ទំនងជាប្រពៃណីនេះ ឱ្យកាន់តែរឹងមាំទ្វេឡើងថែមទៀត។
ឯកឧត្តម អភិបាលខេត្ត បានបញ្ជាក់ទៀតថា ក្នុងរយៈពេល៩ខែឆ្នាំ២០១៨នេះ ភ្ញៀវទេសចរចិន មានចំនួន ៨៣១.៨០១នាក់ កើនឡើង ៥០,៦២ភាគរយ បើប្រៀបធៀបទៅនឹងរយៈពេលដូចគ្នាក្នុងឆ្នាំ២០១៧ ដែលមាន ៦៤៨,៩៤៥នាក់ គឺស្ថិតនៅចំណាត់ថ្នាក់លេខ១ ក្នុងចំណោមអ្នកទេសចរសរុប ៕
អត្ថបទ និង រូបថត ៖ សហការី
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ប្រតិភូចិន
