អគារទីស្នាក់ការនគរបាលចរាចរណ៍ផ្លូវគោក មានទំហំ៤គុណនឹង៩ម៉ែត្រ សង់ឡើងពីឥដ្ឋនិងស៊ីម៉ង់ មានទីតាំងស្ថិតនៅមាត់ស្ទឹងខាងកើតសួនច្បារព្រះរាជដំណាក់ និង ប៉ុស្តិ៍ស្នាក់ការសម្រាប់ចរាចរណ៍ផ្លូវគោកចំនួន៦កន្លែងផ្សេងទៀត ស្ថិតនៅក្នុងក្រុងសៀមរាប ដែលបានដំណើរសាងសង់អស់រយៈពេល៤ខែរួចមកហើយ ចំណាយថវិកាអស់ចំនួន១៤.៥៥៥ដុល្លារអាមេរិក ជាថវិកាសប្បុរសធម៌របស់មន្ទីរពេទ្យអន្តរជាតិរ៉ូយ៉ាល់អង្គរ និងមន្ទីរពេទ្យរ៉ូយ៉ាល់ភ្នំពេញ តាមរយៈឯកឧត្តម អ្នកឧកញ៉ា សៀង ណាំ ត្រូវបានប្រកាសដាក់ឱ្យប្រើប្រាស់ជាផ្លូវការ កាលពីព្រឹកថ្ងៃទី០៥ ខែវិច្ឆិកា ឆ្នាំ២០១៨ ព្រឹកមិញនេះ ដោយឯកឧត្តម អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប ។
លោកឧត្តមសេនីយ៍ទោ ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាប លើកឡើងថា សមិទ្ឋផលនៃអគារទាំងនេះ បានជួយបង្កភាពងាយស្រួលដល់កម្លាំងសមត្ថកិច្ចនគរបាលចរាចរណ៍ខេត្តសៀមរាប ក្នុងការបំពេញភារកិច្ចពាក់ព័ន្ឋទៅនឹងសន្តិសុខ សណ្តាប់ធ្នាប់ចរាចរណ៍ផ្លូវគោកក្នុងក្រុងសៀមរាប ឱ្យកាន់តែមានប្រសិទ្ឋភាពនិងទាន់ពេលវេលា ក្រោមការយកចិត្តទុកដាក់ពីសំណាក់ឯកឧត្តម អភិបាលខេត្ត និង ឯកឧត្តមតំណាងរាស្ត្រ ព្រមទាំងមន្ទីរពេទ្យអន្តរជាតិរ៉ូយ៉ាល់ទាំងនៅសៀមរាប នៅភ្នំពេញនិងនៅក្រុងបាងកក ក្នុងការជួយកាត់បន្ថយការលំបាកផ្សេងៗក្នុងការចុះអនុវត្តតួនាទីភារកិច្ច និងបានធ្វើឱ្យការងារលឿនរហ័សឆ្លើយតបបានទៅនឹងស្ថានភាពជាក់ស្តែងប្រកបដោយប្រសិទ្ឋិភាពនិងទទួលបានជោគជ័យ ។
ថ្លែងក្នុងឱកាសនោះ ឯកឧត្តម អ្នកឧកញ៉ា សៀង ណាំ មានប្រសាសន៍ថា ក្នុងនាមប្រជាពលរដ្ឋរស់នៅខេត្តសៀមរាប សូមថ្លែងអំណរគុណយ៉ាងធំធេង ចំពោះទឹកចិត្តសប្បុរសធម៌របស់មន្ទីរពេទ្យរ៉ូយ៉ាល់ ដែលបានរួមចំណែកជាមួយរាជរដ្ឋាភិបាលកម្ពុជា ក្នុងការជួយកសាងអគារនេះ សម្រាប់ប្រើប្រាស់ជាសាធារណៈ បម្រើឱ្យការងារសន្តិសុខ សណ្តាប់ធ្នាប់ ជាពិសេសលើផ្នែកចរាចរណ៍ ដើម្បីពួកគាត់រក្សាសន្តិសុខ សណ្តាប់ធ្នាប់សាធារណៈ និងទប់ស្កាត់ បញ្ចៀសបង្ការ បានទាន់ពេលវេលា នូវគ្រោះថ្នាក់ចរាចរណ៍ដែលកើតឡើងជាយថាហេតុនៅក្នុងក្រុងសៀមរាប ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ទីស្នាក់ការនគរបាលចរាចរណ៍
