ប្រជាពលរដ្ឋដែលរស់នៅក្នុងភូមិនគរក្រៅ សង្កាត់គោកចក ក្រុងសៀមរាប បានសម្ដែងនូវការសាទរ ចំពោះសំណង់ទ្វារទឹកថ្មី ឈ្មោះថាទ្វារទឹកលោកតា ស៊ត់ ដោយបច្ចេកទេសត្រឹមត្រូវ មានប្រព័ន្ធបិទទ្វារទឹកដើម្បីស្ទាក់ទឹកទុកប្រើនារដូវប្រាំងផង នៅមូលដ្ឋានពួកគាត់ ដែលអាចផ្គត់ផ្គង់ទឹកសម្រាប់ធ្វើស្រែចម្ការលើផ្ទៃដីជិត ១០០ហិកតា ដែលបានសង់ឡើងដោយអាជ្ញាធរជាតិអប្សរា ចាប់ពីខែមិថុនាមក ខណៈដែលទ្វារទឹកនេះមានបណ្តោយជាង ២០ម៉ែត្រ និងទទឹងប្រមាណ ១៨ម៉ែត្រ ហូរកាត់អូរខ្លូត ដែលរំដោះទឹកភ្លៀងហូរចាក់ទៅស្ទឹងពួក និងស្ទឹងព្រះស្រុក ។
លោក បឿន ម៉ាប់ បានឱ្យដឹងថា ក្រោយទំនប់ទឹកចាស់បានបាក់មក អ្នកភូមិនគរក្រៅ មិនដែលធ្វើស្រែបានផលល្អឡើយ ដោយសារគ្មានទឹកផ្គត់ផ្គង់គ្រប់គ្រាន់ ពិសេសពេលរដូវប្រាំងមកដល់ ទើបតែឆ្នាំនេះទេ ទាំងរូបលោក ក៏ដូចជាប្រជាពលរដ្ឋក្នុងភូមិ ធ្វើស្រែទទួលបានផលល្អណាស់ ដោយសារមានទឹកស្រោចស្រពគ្រប់គ្រាន់ ហើយលោករំពឹងថា ផលដំណាំស្រូវរបស់លោក អាចនឹងទទួលបានផលច្រើននៅលើផ្ទៃដីជាង ២ហិកតា ដែលរាល់ឆ្នាំ អត់ទឹក ធ្វើឱ្យស្រូវស្កក ហើយទទួលផលតែ២ទៅ៣ការ៉ុងប៉ុណ្ណោះក្នុងមួយឆ្នាំៗ ។
អ្នកស្រី ឡាយ ទុំ មានមុខរបរដំណាំត្រសក់ទឹក បានឲ្យដឹងថាថា តាំងពីមានទឹកដែលបង្ហូរពីទ្វារទឹកថ្មីដែលសង់ដោយអាជ្ញាធរជាតិអប្សរាមក ធ្វើឱ្យអ្នកស្រីមានភាពងាយស្រួលក្នុងការទាញទឹកមកស្រោចស្រពដំណាំ ដែលពេលមុនការប្រើប្រាស់ត្រូវបុកអណ្ដូង ហើយត្រូវចំណាយធនធានច្រើន ប៉ុន្តែពេលនេះ អាចបូមទឹកមកស្រោចស្រពដំណាំបានយ៉ាងងាយ ដោយគ្រាន់តែដាក់ម៉ាស៊ីនបូមចេញពីប្រឡាយតែប៉ុណ្ណោះ។
លោក ភឿន សុឃីម អនុប្រធាននាយកដ្ឋានគ្រប់គ្រងនៃអាជ្ញាធរជាតិអប្សរា បានឱ្យដឹងថា ទ្វារទឹកលោកតា ស៊ត់ ក្រៅពីបម្រើដល់ផលកសិកម្មដល់ប្រជាពលរដ្ឋហើយនោះ ទ្វារទឹកនេះសង់ឡើងដើម្បីគ្រប់គ្រង រក្សាទឹកក្រោមដីក្នុងតំបន់អង្គរ និង ស្ដុកទឹករក្សាលំនឹងប្រាសាទផងដែរ ព្រោះទឹកមានទំនាក់ទំនងយ៉ាងជិតស្និទទៅនឹងគ្រឹះប្រាសាទក្នុងរមណីយដ្ឋានអង្គរ ហើយក្រៅពីនេះ ទ្វារទឹកនេះដើរតួយ៉ាងសំខាន់សម្រាប់រំដោះជំនន់ទឹកភ្លៀងក្នុងក្រុងអង្គរ និងក្រុងសៀមរាប ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ទ្វារទឹកលោកតាស៊ត់
