កាលពីថ្ងៃទី០៥ ខែវិច្ឆិកា ឆ្នាំ២០១៨ ម្សិលមិញនេះ ក្រុមអ្នកធ្វើការផ្នែកគ្រាប់មីន និងយុទ្ធភ័ណ្ឌមិនទាន់ផ្ទុះ មកពីប្រទេសកូឡំប៊ី ចំនួន២៣នាក់ បានមកធ្វើទស្សនកិច្ចសិក្សាពីសកម្មភាពបោសសំអាតមីន និងការធ្វើផែនការការគ្រប់គ្រងលើវិស័យមីនរបស់កម្ពុជា នៅសារមន្ទីរសន្តិភាពសកម្មភាពមីន ដែលស្ថិតនៅឃុំត្រពាំងធំ ស្រុកប្រាសាទបាគង ខេត្ដសៀមរាប ។
លោក អ៊ុ ភូមិរ៉ូ អគ្គនាយករងនៃមជ្ឈមណ្ឌលសកម្មភាពមីននៅកម្ពុជា ហៅកាត់ថា ស៊ីម៉ាក់ បានឲ្យដឹងថា សិក្ខាកាមដែលមកពីប្រទេសកូឡុំប៊ីនេះ មានខ្លះជាមន្ដ្រីផ្នែកសកម្មភាពមីន មន្ដ្រីរដ្ឋាភិបាល មន្ដ្រីដោះមីន មន្ដ្រីខុទ្ធកាល័យរបស់ប្រធានាធិបតីប្រទេសកូឡំប៊ី និងអង្គការក្រៅរដ្ឋាភិបាលផងដែរ ដើម្បីមកធ្វើការសិក្សាពីការធ្វើផែនការ និងការគ្រប់គ្រងលើវិស័យមីន និងដើរទស្សនៈកិច្ច កាសិក្សាស្វែងនៅចំការមីននៅកម្ពុជានេះរយៈពេល៥ថ្ងៃ នៅខេត្ដសៀមរាប ខេត្ដបាត់ដំបង ខេត្ដកំពង់ឆ្នាំង និងរាជធានីភ្នំពេញ ហើយក៏ជាមោទនភាពមួយ ដែលមានប្រទេសជាច្រើននៅលើពិភពលោក មកសិក្សានិងដកបទពិសោធន៍ពីសកម្មភាពកំចាត់មីននៅកម្ពុជា ។
លោកបានឲ្យដឹងទៀតថា កម្មវិធីសិក្សានេះ បង្រៀនដោយមន្ដ្រីស៊ីម៉ាក់របស់កម្ពុជា ដើម្បីឲ្យសិក្ខាកាមទាំងអស់យល់អំពីការធ្វើផែនការសកម្មភាពមីននៅថ្នាក់ខេត្ដ និងថ្នាក់ជាតិ ដើម្បីយកបទពិសោធន៍ទៅបង្រៀនដល់មន្ដ្រីដោះមីននៅប្រទេសកូឡំប៊ី និងជាលើកទី៣ហើយ ដែលអ្នកជំនាញស៊ីម៉ាក់របស់កម្ពុជា បង្រៀនដល់មន្ដ្រីដោះមីនប្រទេសកូឡំប៊ី ដោយលើកទី១. ស៊ីម៉ាក់បានផ្ដល់បទពិសោធន៍នៅកូឡំប៊ីផ្ទាល់ និងវគ្គទី២. ទាក់ទងការបង្រៀនសត្វសុនខហិតមីន និងលើកទី៣នេះ ពាក់ព័ន្ធការធ្វើផែនការផ្នែកដោះមីន និងការគ្រប់គ្រងមីន នៅក្នុងប្រទេកម្ពុជា ។
លោក អ៊ុ ភូមិរ៉ូ បានឲ្យដឹងបន្ថែមទៀតថា ការបង្រៀនដល់ប្រទេសកូឡំប៊ី ក៏ដូចនៅប្រទេសផ្សេងៗទៀតនេះ គឺដោយសារប្រទេសកម្ពុជា ធ្លាប់មានសង្គ្រាម និងមានបទពិសោធន៍ផ្នែកសកម្មភាពមីនច្រើនឆ្នាំ ដែលធ្វើឲ្យប្រទេសនៅលើពិភពលោកមកទទួលបទពិសោធន៍បាន ក្នុងនោះបានបង្រៀន និងផ្ដល់បទពិសោធន៍ដោយផ្ទាល់ទៅលើវិស័យមីន ដល់ប្រទេសឡាវ , ប្រទេសអង់គូឡា , ប្រទេសអ៊ីរ៉ាក់ និងប្រទេសកូឡំប៊ី រួមជាមួយប្រទេសជាច្រើនទៀត ដែលរងផលប៉ះពាល់លើវិស័យគ្រាប់យុទ្ធភ័ណ្ឌមិនទាន់ផ្ទុះ នៅលើពិភពលោក ដែលបានទទួលបទពិសោធន៍ពីវិស័យមីនពីកម្ពុជា ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ស៊ីម៉ាក់
