កាលពីព្រឹកថ្ងៃទី០៧ ខែវិច្ឆិកា ឆ្នាំ២០១៨នេះ សិស្សានុសិស្សនៃអនុវិទ្យាល័យព្រះឥន្ទកោសា ប្រមាណជាង៣០នាក់ បាននាំគ្នាទៅសម្តែងឈុតឆាកដួលស្លាប់ នៅមុខប្រាសាទអង្គរវត្ត ដោយសារតែការជក់បារី ក្នុងគោលបំណងចង់ទាញចំណាប់អារម្មណ៍ម្ចាស់ ឬអ្នកគ្រប់គ្រងអាជីវកម្ម ក៍ដូចជាសាធារណជនទូទៅ ទាំងភ្ញៀវជាតិនិងអន្តរជាតិ ឲ្យយល់ដឹងកាន់តែច្បាស់ថា នៅក្នុងបារីមួយដើមមានសារធាតុគីមីពុលរហូតជាង៧ពាន់ប្រភេទ ដែលបានសម្លាប់ប្រជាជនខ្មែរចំនួន៣០នាក់ក្នុងមួយថ្ងៃ និងជិត១ម៉ឺននាក់ក្នុងមួយឆ្នាំ ។
គួររំលឹកថា កាលពីព្រឹកថ្ងៃទី០៦ ខែវិច្ឆិកា ឆ្នាំ២០១៨ម្សិលមិញនេះ លោកសូ ប្លាតុង អភិបាលក្រុងសៀមរាប បានប្រកាសជាសាធារណៈ ដោយដាក់មណ្ឌលរដ្ឋបាលក្រុងសៀមរាប ទៅជាតំបន់ដែលគ្មានផ្សែងបារី ខណៈដែលការប្រកាសនេះ ត្រូវទទួលបានការគាំទ្រពីសំណាក់មន្ត្រីរាជការក្នុងសាលាក្រុង , ពីក្រសួងសុខាភិបាល និង សម្ព័ន្ធត្រួតពិនិត្យថ្នាំជក់អាស៊ីអាគ្នេយ៍ ហៅកាត់ថា ស៊ីតការ ព្រោះថា ក្រុងសៀមរាប ជាទីក្រុងមួយក្នុងចំណោមទីក្រុងល្បីៗ ក្នុងតំបន់អាស៊ី-អាគ្នេយ៍ ជាពិសេសខាងវិស័យទេសចរណ៍ វប្បធម៌ ប្រវត្តិសាស្ត្រ បេតិភណ្ឌ ដូច្នេះការដាក់ទីក្រុងនេះជាតំបន់គ្មានផ្សែងបារី គឺវាបានជួយលើកកម្ពស់មុខមាត់របស់ប្រទេសកម្ពុជា និង ជាការគិតគូរដល់សុខមាលភាពដល់ពលរដ្ឋទូទៅ រួមទាំងអ្នកទេសចរផងដែរ ស្របពេលដែលជាក់ស្តែង កំពុងមានកំណើនអ្នកទេសចរទាំងក្នុងស្រុក ក្នុងតំបន់ និងអន្តរជាតិពីមួយឆ្នាំទៅមួយឆ្នាំ ខណៈទីក្រុងមួយចំនួននៅក្នុងបណ្ដាប្រទេសអាស៊ាន បានប្រកាសជាទីក្រុងគ្មានផ្សែងបារីរួចហើយផងដែរ ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
