ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូន មានប្រសាសន៍ថា នៅក្នុងឆ្នាំ២០១៩នេះ ផ្លូវដែលទទួលរងនូវខូចខាតក្នុងក្រុងសៀមរាប ចំនួន១១ខ្សែ មានប្រវែងប្រមាណជាង ១២គីឡូម៉ែត្រ នឹងត្រូវធ្វើការជួសជុល និង ស្ដារឡើងវិញជាបន្ទាន់ រួមជាមួយនឹងផ្លូវខ្នែងក្នុងក្រុងបំបែកពីផ្លូវជាតិលេខ៦ ដែលជាផ្លូវដីក្រហម ចំនួន៥២ខ្នែងទៀត ក៏ត្រូវការស្តារនិងជួសជុលឡើងវិញជាប្រញ៉ាប់បំផុតដែរ ដោយចាក់ក្រាលកៅស៊ូ ដើម្បីកុំឲ្យមានដីហុយចូលមកលើផ្លូវជាតិ ដែលគ្រោងចំណាយអស់ថវិកាសរុបប្រមាណ១៥លានដុល្លារអាម៉េរិក រួមជាមួយផ្លូវដែលអនុវត្តន៍គម្រោងដោយក្រសួងអភិវឌ្ឍន៍ជនបទ ចំនួន៥ខ្សែ ក៏ត្រូវបានស្តារនិងជួសជុលឡើងវិញដោយថវិកាមួយចំនួនរបស់ក្រសួងអភិវឌ្ឍន៍ជនបទ និង ផ្លូវចំនួន២ខ្សែទៀត ដែលថែទាំដោយមន្ទីរសាធារណការនិងដឹកជញ្ជូនខេត្តសៀមរាប ។
ឯកឧត្តម ស៊ុន ចាន់ថុល មានប្រសាសន៍ទៀតថា នៅក្នុងច្បាប់ផ្លូវថ្នល់ក្នុងព្រះរាជាណាចក្រកម្ពុជាយើង ផ្លូវថ្នល់មួយចំនួនត្រូវបានកសាង ថែទាំ និងស្ថិតក្រោមការគ្រប់គ្រងរបស់ក្រសួងសាធារណការនិងដឹកជញ្ជូន , មួយចំនួនក្រោមការសាងសង់ ថែទាំដោយក្រសួងអភិវឌ្ឍន៍ជនបទ និងមួយចំនួនក្រោមការកសាង ថែទាំនិងជួសជុលដោយ រដ្ឋបាលខេត្ត រាជធានី ហើយដោយឡែកសម្រាប់ខេត្តសៀមរាប មានផ្លូវមួយចំនួនជាបន្ទុកគ្រប់គ្រងថែទាំជួសជុលដោយអាជ្ញាធរជាតិអប្សរា ។
ឯកឧត្តម ស៊ុន ចាន់ថុល មានប្រសាសន៍បន្ថែមទៀតថា យើងជិះទូកជាមួយគ្នា គឺទូករបស់រាជរដ្ឋាភិបាល ហើយបងប្អូនប្រជាពលរដ្ឋរួមទាំងអ្នកទេសចរណ៍ធ្វើដំណើរ ពួកគាត់មិនបានដឹងទេថា ផ្លូវណាជាការគ្រប់គ្រងថែទាំរបស់អាជ្ញាធរជាតិអប្សរា ផ្លូវណាជាការគ្រប់គ្រងថែទាំរបស់អភិវឌ្ឍជនបទ ឬសាធារណការនិងដឹកជញ្ជូននោះទេ គឺពួកគាត់ច្រើនតែយល់ថា ជាផ្លូវដែលសាងសង់ គ្រប់គ្រង ជួសជុលដោយក្រសួងសាធារណការ ឬថាជាផ្លូវរបស់រាជរដ្ឋាភិបាលតែម្តង ដូច្នេះយើងត្រូវពិភាក្សាគ្នារកដំណោះស្រាយ ដើម្បីដោះស្រាយបញ្ហាជូនបងប្អូនប្រជាពលរដ្ឋ ដែលលើកឡើងទាក់ទងទៅនឹងការខូចខាតផ្លូវថ្នល់នោះ។
ឯកឧត្ដម ស៊ុន ចាន់ថុល មានប្រសាសន៍យ៉ាងនេះ ក្នុងកិច្ចប្រជុំពិភាក្សាការងារជួសជុលនិងថែទាំផ្លូវថ្នល់ក្នុងខេត្តសៀមរាប នៅសាលប្រជុំសាលាខេត្តសៀមរាប កាលពីរសៀលថ្ងៃទី០៦ ខែវិច្ឆិកា ឆ្នាំ២០១៨ ម្សិលមិញនេះ ៕
អត្ថបទ និង រូបថត ៖ លោក យូ វង្ស និង លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ផ្លូវថ្នល់
