ឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម បានមានប្រសាសន៍ថា លទ្ធផលនៃការជំរុញការអនុវត្តកម្មវិធីអភិវឌ្ឍន៍កសិ-ពាណិជ្ជកម្ម ដែលក្រសួងពាណិជ្ជកម្មបានធ្វើកន្លងមក នៅតាមបណ្តារាជធានី ខេត្តគោលដៅសំខាន់ៗ នោះ បានបង្ហាញនូវសញ្ញាណវិជ្ជមានគួរឲ្យកត់សម្គាល់ ដោយសង្កេតឃើញថា ចលនាមហាជនទូទៅ បានចាប់ផ្តើមងាកមកចូលរួមគាំទ្រ ទទួលស្គាល់ពីគុណភាពផលិតផល និងប្រើប្រាស់ទំនិញក្នុងស្រុក រួមទាំងផលិតផលបន្លែ ផ្លែឈើរបស់ សហគមន៍នៅមូលដ្ឋានជាបណ្តើរៗហើយ ជាពិសេសម្ចាស់សណ្ឋាគារ និងភោជនីយដ្ឋានមួយចំនួនចាប់ ផ្តើមមានសេចក្តីទុកចិត្ត និងបានបន្តចុះកិច្ចសន្យាបញ្ជាទិញពីកសិករនៅមូលដ្ឋាន។
ឯកឧត្តមមានប្រសាសន៍ទៀតថា យុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា ក្នុងអាណត្តិទី៦នេះ បានរៀបចំយន្តការអនុវត្តន៍ការងារកាន់តែប្រសើរ និងស៊ីជម្រៅជាងមុន ដោយផ្តោតសំខាន់លើការធ្វើពិពិធកម្មសេដ្ឋកិច្ច និង ការអភិវឌ្ឍវិស័យពាណិជ្ជកម្មប្រកបដោយចីរភាព និងបរិយាប័ន្ន ដោយបានផ្តោតសំខាន់លើការលើកស្ទួយវិស័យកសិកម្ម ការអភិវឌ្ឍជនបទ ការលើកកម្ពស់គុណភាពផលិតផល និងប្រសិទ្ធ ភាពផលិតកម្ម សំដៅប្រែក្លាយពីការធ្វើកសិកម្មចិញ្ចឹមឆ្នាំង ទៅជាកសិ-ពាណិជ្ជូបនីយកម្ម និងធ្វើ ពិពិធកម្មមុខទំនិញ និងសេវាកម្ម សម្រាប់បំពេញតម្រូវការក្នុងស្រុក និងជំរុញការនាំចេញ ហើយដើម្បីចូលរួមអនុវត្តន៍កម្មវិធីនយោបាយរបស់រាជរដ្ឋាភិបាល និង ដើម្បីពង្រឹង និងពង្រីកសកម្មភាពពាណិជ្ជកម្មក្នុងស្រុកឲ្យបានរឹងមាំ ក្រសួងពាណិជ្ជកម្ម បានរៀបចំយុទ្ធសាស្ត្ររយៈពេលខ្លី និងរយៈពេលមធ្យមសំខាន់ចំនួន ២ គឺ៖ ជំរុញការប្រើប្រាស់ ការទទួលស្គាល់ផលិតផលក្នុងស្រុក និង ការពង្រឹងគុណភាព សុវត្ថិភាពចំណីអាហារ ។
ឯកឧត្តម ម៉ៅ ថូរ៉ា លើកឡើងបែបនេះ ក្នុងឱកាសអញ្ផើញជាអធិបតីក្នុងពិធីបើកសិក្ខាសាលាពិគ្រោះយោបល់លើការអភិវឌ្ឍកសិ-ពាណិជ្ជកម្ម និងការកសាងទំនុកចិត្តលើផលិតផលខ្មែរ នៅសណ្ឋាគារសុខាសៀមរាប ក្រុងសៀមរាប នាព្រឹកថ្ងៃទី០៨ ខែវិច្ផិកា ឆ្នាំ២០១៨នេះ ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
