កាលពីព្រឹកថ្ងៃទី០៨ ខែវិច្ឆិកា ឆ្នាំ២០១៨ព្រឹកមិញនេះ វត្តបារាយណ៍មហានទីរតនារាម ហៅវត្តស្វាយរមៀត បើកការប្រកួតអុំទូកលក្ខណៈប្រពៃណីហើយតាមការគ្រោងទុក ដែលមានទូកចូលរួមប្រកួតចំនួន១៨គូ ហើយទូកនិមួយៗចំណុះចំនួន០៦នាក់ ដែលការប្រកួតនេះ មានរយៈពេល២ថ្ងៃ គឺនៅថ្ងៃទី០៨ និង ថ្ងៃទី០៩ ហើយសម្រាប់ថ្ងៃទី០៨នេះ បានធ្វើការប្រកួតជម្រុះទាំងពេលព្រឹក និង ពេលល្ងាច និងសម្រាប់ពេលល្ងាចថ្ងៃទី០៩ ស្អែកនេះ នឹងធ្វើការប្រកួតផ្ដាច់ព្រ័ត្រ ពីចំណាត់លេខ១ដល់លេខ៤ ហើយទូកដែលទទួលបានចំណាត់ថ្នាក់នេះ នឹងត្រូវបានទៅចូលរួមជាគូកិត្តិយសនៅក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក តាមបណ្ដោយដងស្ទឹងសៀមរាប នៅថ្ងៃទី២១ និងថ្ងៃទី២២ ខែវិច្ឆិកា ឆ្នាំ២០១៨ខាងមុខនេះ ដែលរៀបចំឡើងដោយរដ្ឋបាលខេត្តសៀមរាប ។
ព្រះតេជគុណ នឿម វុទ្ឋី ប្រធានគណៈកម្មការរៀបចំការប្រកួត និងជាព្រះគ្រូចៅអធិការវត្តស្វាយរមៀត មានថេរដិកាថា នេះជាឆ្នាំទី៤ហើយ ដែលព្រះសង្ឃ និង គណៈកម្មការវត្ត អាជ្ញាធរមូលដ្ឋាន រួមទាំងកម្លាំងសមត្ថកិច្ច បានសហការគ្នា រៀបចំពិធីអុំទូកនេះឡើង ក្រោមការចូលរួមឧបត្ថម្ភគាំទ្រថវិកាពីសប្បុរជនជាពាណិជ្ជករ អាជីវករ និងប្រជាពលរដ្ឋជាច្រើនរូប ក្នុងគោលបំណងរឹតចំណងអភិរក្សនិងថែរក្សាប្រពៃណីពីដូនតា និងបង្កើនសាមគ្គីភាពឱ្យកាន់តែជិតស្និតថែមទៀត រវាងវត្តអារាមនិងពុទ្ឋបរិស័ទ និង ដើម្បីអបអរសាទរដល់ទិវាបុណ្យឯករាជ្យជាតិ៩វិច្ឆិកា និងជាពិសេស រំលឹកនឹកគុណដល់កងទ័ពជើងទឹកដែលបានទទួលជោគជ័យលើខ្មាំងសត្រូវឈា្ននពានមកលើទឹកដីខ្មែរ។
មានថេរដិកាក្នុងឱកាសបើកការប្រកួតនេះ ព្រះគ្រូប្រាសាទរង្សី សាសនធរោ ឡាច លាង អនុគណក្រុងសៀមរាប បានសម្ដែងនូវការកោតសរសើរ ដល់គណៈកម្មការវត្ត អាជ្ញាធរមូលដ្ឋាននិងប្រជាពលរដ្ឋដែលបានរំលឹក និងថែរក្សាបន្តលំអានប្រពៃណីការប្រណាំងទូកជាលក្ខណៈប្រពៃណី ដែលបានសន្សល់ទុកពីជីដូនជីតាខ្មែរយើងពីសម័យដើម និងបានចាត់ទុកពិធីអុំទូកលក្ខណៈប្រពៃណីនៅតាមមូលដ្ឋាននេះ ជាការរួមចំណែកជួយទាក់ទាញអ្នកទេសចរ និងនាំចំណូលដល់គ្រួសារ និងបង្កើនការងារបន្ថែមជួយឱ្យសេដ្ឋកិច្ចក្នុងគ្រួសារ សហគមន៍កាន់តែធូរធារឡើង។
ក្នុងឱកាសនោះដែរ លោកឧត្តមសេនីយ៍ត្រី ហួត សុធី ស្នងការរង នៃស្នងការដ្ឋាននគរបាលខេត្តសៀមរាប មានប្រសាសន៍ជំរុញលើកទឹកចិត្ត ដល់កងកម្លាំងប្រដាប់អាវុធ មន្ត្រីមានសមត្ថកិច្ចនៅក្នុងមូលលដ្ឋាននេះ ឱ្យបន្តពង្រឹងសន្តិសុខសណ្តាប់ធ្នាប់ ដើម្បីធានាសុខសុវត្ថិភាពជូនប្រជាពលរដ្ឋ ភ្ញៀវជាតិនិងអន្តរជាតិ ដែលមកទស្សនាកំសាននៅទីនេះ និងសំណូមពរឱ្យបងប្អូនប្រជាពលរដ្ឋចូលរួមធ្វើអនាម័យបរិស្ថាន វេចខ្ចប់កាកសំណល់នានា ដាក់ចូលក្នុងធុងសម្រាមឱ្យបានត្រឹមត្រូវ និង បានអំពាវនាវដល់យុវជន ប្អូនៗសិស្សានុសិស្ស និងសាធារណៈជនទូទៅ ចៀសវាងកុំពិសាគ្រឿងស្រវឹងក្នុងទីអារាម កុំប្រើប្រាស់គ្រឿងញៀន ដែលវាមានផលអាក្រក់នាំឱ្យប៉ះពាល់ដល់សុខភាព និងផលប្រយោជន៍ខ្លួនឯង គ្រួសារ សង្គមជាតិ និង ប៉ះពាល់ដល់សន្តិសុខ សណ្តាប់ធ្នាប់របៀបរៀបរយសាធារណៈ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#អុំទូក
