កាលពីព្រឹកថ្ងៃទី០៨ ខែ វិច្ឆិកា ឆ្នាំ២០១៨នេះ លោកជំទាវ គួយ ណាលីន ឃឹម ប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និង សហការី បានចុះប្រគល់អណ្តូងទឹកស្នប់អាហ្វ្រីដេស៍ ២កន្លែង ជាអណ្ដូងទឹកស្អាតអាហ្វ្រីដេស៍ទី ៩ និងទី១០ ជូនប្រជាពលនៅសហគមន៍ភូមិបឹងវៀន ឃុំតាយ៉ែក និងភូមិត្របែក ឃុំដំដែក ស្រុកស្រុកសូទ្រនិគម ដែលកំពុងប្រឈមទៅនឹងការខ្វះខាតទឹកស្អាតប្រើប្រាស់ ខណៈកន្លងមក ប្រជាពលរដ្ឋទាំងនោះ បានប្រើប្រាស់ទឹកដែលគ្មានអនាម័យ ដូចជាអណ្តូងដៃតូចៗ , ទឹកស្រះ និង ទឹកអូរជាដើម ។
មានប្រសាសន៍ក្នុងឱកាសនោះ លោកជំទាវ គួយ ណាលីន ឃឹម ប៊ុនសុង បានថ្លែងនូវអំណរគុណ ចំពោះការជួយឧបត្ថម្ភរបស់សប្បុរសជន ដែលបានផ្តល់អណ្តូងទឹកនេះ ដើម្បីរួមចំណែកជាមួយរាជរដ្ឋាភិបាលកម្ពុជា កាត់បន្ថយភាពក្រីក្ររបស់ប្រជាពលរដ្ឋ តាមរយៈធ្វើឲ្យប្រសើរឡើងលើវិស័យប្រើប្រាស់ទឹកស្អាត និង ដើម្បីសុខុមាលភាពរបស់ប្រជាពលរដ្ឋ ព្រមទាំងបានផ្តាំផ្ញើដល់សហគមន៍ និង សមាជិកគ្រួសារទាំងអស់ ត្រូវចេះសម្អាត ថែរក្សា អណ្ដូងទឹកស្អាតនេះ ដើម្បីបានប្រើប្រាស់យូរអង្វែង និង ឲ្យសមនឹងពាក្យស្លោក ការប្រើប្រាស់ទឹកស្អាត និងមានអនាម័យ នាំឱ្យគ្រួសារមានសុខភាពល្អ និងមានសុភមង្គល ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
ព័ត៌មានជាតិ ថ្មីៗ
