ឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម មានប្រសាសន៍ថា បច្ចុប្បន្ននេះ មានចលនាមហាជនទូទៅបានចាប់ផ្តើមងាកមកចូលរួមគាំទ្រ ទទួលស្គាល់ពីគុណភាពផលិតផល និងប្រើប្រាស់ទំនិញក្នុងស្រុករួមទាំងផលិតផលបន្លែ ផ្លែឈើរបស់សហគមន៍នៅមូលដ្ឋានជាបណ្តើរៗហើយ ប៉ុន្តែប្រការសំខាន់នោះ គឺកសិករខ្លួនឯង ត្រូវលើកកម្ពស់គុណភាពផលិតផល និងប្រសិទ្ធភាពផលិតកម្មរបស់ខ្លួន សំដៅប្រែក្លាយពីការធ្វើកសិកម្មចិញ្ចឹមឆ្នាំង ទៅជាកសិ-ពាណិជ្ជូបនីយកម្ម និងធ្វើពិពិធកម្មមុខទំនិញ និងសេវាកម្ម សម្រាប់បំពេញតម្រូវការក្នុងស្រុក និងជំរុញការនាំចេញ ដើម្បីកាត់បន្ថយការនាំចូលផលិតផលពីប្រទេសជិតខាង ។
ឯកឧត្តម ម៉ៅ ថូរ៉ា មានប្រសាសន៍ទៀតថា ដើម្បីបង្កើនការងារក្នុងស្រុក និងកាត់បន្ថយការនាំចូលផលិតផលពីប្រទេសជិតខាង ក្រសួងពាណិជ្ជកម្ម បានជួយរៀបចំយុទ្ធសាស្ត្ររយៈពេលខ្លី និងរយៈពេលមធ្យមសំខាន់ចំនួន២ គឺ ទី១. ក្រសួងពាណិជ្ជកម្ម បានរៀបចំយុទ្ធនាការទិញផលិតផលខ្មែរ ក្នុងក្របខណ្ឌទូទាំងប្រទេស ដើម្បីជំរុញចលនាមហាជនទូទៅងាកមក គាំទ្រ និងប្រើប្រាស់ផលិតផលក្នុងស្រុកឲ្យបានច្រើនជាអតិបរិមា ខណៈដែលយុទ្ធនាការនេះ បានផ្តល់ឱកាសក្នុងការប្រមូលកៀរគរផលិតផល ដែលកសិករកម្ពុជាផលិតបាននៅមូលដ្ឋានរួម ទាំងផលិតផលភូមិមួយ ផលិតផលមួយ ដោយការចូលរួមប្រកួតប្រជែង និងតាំងបង្ហាញនៅលើទីផ្សារ និង ទី២. ក្រសួងពាណិជ្ជកម្ម បានចាត់វិធានការយ៉ាងម៉ឺងម៉ាត់ រឹតបន្តឹងការត្រួតពិនិត្យទំនិញខូចគុណភាព ទំនិញហួសកាលបរិច្ឆេទប្រើប្រាស់ ការក្លែងបន្លំស្លាកសញ្ញា និងការប្រើប្រាស់សារធាតុគីមីហួសកម្រិតកំណត់ ឬសារធាតុហាមឃាត់ក្នុងម្ហូបអាហារ ក្នុងក្របខ័ណ្ឌទូទាំងប្រទេស សំដៅធានាសុខភាព សុវត្ថិភាពជូនប្រជាជនកម្ពុជាទូទាំងប្រទេស ។
ឯកឧត្តម ម៉ៅ ថូរ៉ា លើកឡើងបែបនេះ ក្នុងឱកាសអញ្ផើញជាអធិបតីក្នុងពិធីបើកសិក្ខាសាលាពិគ្រោះយោបល់លើការអភិវឌ្ឍកសិ-ពាណិជ្ជកម្ម និងការកសាងទំនុកចិត្តលើផលិតផលខ្មែរ នៅសណ្ឋាគារសុខាសៀមរាប ក្រុងសៀមរាប នាព្រឹកថ្ងៃទី០៨ ខែវិច្ផិកា ឆ្នាំ២០១៨នេះ ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
