សមត្ថកិច្ចនគរបាលជំនាញខេត្តសៀមរាប បានឲ្យដឹងថា នាវេលាម៉ោងប្រហែល២០ ថ្ងៃទី០៧ ខែវិច្ឆិកា ឆ្នាំ២០១៨ម្សិលមិញនេះ មានជនបរទេសម្នាក់ឈ្មោះ RIVERS DEAN STEPHEN ភេទប្រុស កើតឆ្នាំ១៩៤៧ ជនជាតិអាមេរិក កាន់លិខិតឆ្លងដែនលេខ ៥៦៦០៣៤២៨៤ មុខរបរចូលនិវត្តន៍ បានដេកស្លាប់នៅក្នុងបន្ទប់ជួល ស្ថិតនៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ។
សមត្ថកិច្ចបានឲ្យដឹងទៀតថា បន្ទាប់ទទួលបានព័ត៌មានពីតំណាងម្ចាស់ផ្ទះជួល ដែលរាយការណ៍ថាមានជនបរទេសស្លាប់រួចមក ភ្លាមៗនោះ កម្លាំងនគរបាលជំនាញខេត្តសៀមរាប បានចុះទៅដល់កន្លែងកើតហេតុ ដើម្បីធ្វើការពិនិត្យ ហើយក្រោយការពិនិត្យ និង តាមការសាកសួរតំណាងម្ចាស់ផ្ទះ បានឲ្យដឹងថា ដោយមិនឃើញជនរងគ្រោះចេញពីក្នុងបន្ទប់ ខ្លួនមានការសង្ស័យ ក៏បានទៅបើកទ្វារបន្ទប់មើល ស្រាប់តែឃើញជនរងគ្រោះដេកស្លាប់នៅក្នុងបន្ទប់ ហើយខ្លួនក៏បានរាយការណ៍ជូនសមត្ថកិច្ចតែម្តង ។
ផ្អែកតាមការស្រាវជ្រាវរបស់សមត្ថកិច្ចនគរបាលជំនាញ និងលោកវេជ្ជបណ្ឌិត អ៊ិត ឆបឆរ័ត្ន គ្រូពេទ្យអមតុលាការខេត្តបានសន្និដ្ឋានថា ជនរងគ្រោះបានស្លាប់រយៈពេលប្រហែលជាបីថ្ងៃមកហើយ ដោយសារជំងឺសម្ពាធឈាមឡើងគំហុកបណ្តាលឲ្យស្លាប់ ហើយសាកសពត្រូវបានបញ្ជូនទៅតម្កល់ទុកនៅមន្ទីរពេទ្យមិត្តភាពខ្មែរ-សូវៀត នៅរាជធានីភ្នំពេញ តាមសំណូមពររបស់តំណាងស្ថានទូត ៕
អត្ថបទ និង រូបថត ៖ លោក ថាច់ ពិសុទ្ធ
