នៅព្រឹកថ្ងៃទី៦ វិច្ឆិកា ឆ្នាំ ២០១៨ អាជ្ញាធរជាតិអប្សរា តាមរយៈនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន បានធ្វើការដាំកូនឈើនៅមុខប្រាសាទអង្គរវត្ត ដើម្បីជំនួសដើមឈើចាស់នៅជ្រុងខាងជើងនៃកសិន្ធុអង្គរវត្ត ដែលបានដួលរំលំកាលពីខែតុលា កន្លងទៅ ក្នុងគោលបំណង ដើម្បីថែរក្សាទេសភាពវប្បធម៌ក្នុងរមណីដ្ឋានអង្គរ កុំឱ្យបាត់បង់ ខណៈបច្ចុប្បន្ន ព្រៃឈើនៅរមណីយដ្ឋានអង្គរមានឈើសរុបចំនួន ១៨៣ប្រភេទ ហើយប្រភេទឈើទាំងនោះត្រូវបានអាជ្ញាធរជាតិអប្សរា ធ្វើការបណ្ដុះ និងចែកចាយដល់ពលរដ្ឋទាំងក្នុង និងក្រៅខេត្ត យកទៅដាំផងដែរ ។
ឯកឧត្តម ហង់ ពៅ អគ្គនាយករងអាជ្ញាធរជាតិអប្សរា បានឱ្យដឹងថា ជាគោលការណ៍របស់អាជ្ញាធរជាតិអប្សរា គឺថែរក្សាទេសភាពវប្បធម៌នៅតំបន់អង្គរ ធ្វើយ៉ាងណាឱ្យនៅដដែលដូចពេលកន្លងមក ខណៈកន្លងមក អាជ្ញាធរជាតិអប្សរាបានធ្វើការងារជាច្រើនទាក់ទងនឹងបញ្ហានេះ ដូចជាការព្យាបាលដើមឈើដែលមានវ័យចំណាស់ បំណងចង់ឱ្យដើមឈើទាំងនោះមានអាយុរស់នៅតទៅមុខទៀត ដើម្បីរក្សាទេសភាពវប្បធម៌នៅតំបន់នោះ។
ឯកឧត្តម ហង់ ពៅ បានឱ្យដឹងទៀតថា ទេសភាពវប្បធម៌ក្នុងរមណីយដ្ឋានអង្គរ គឺទាក់ទងនឹងកត្តាពីរ គឺដើមឈើ និងទឹក ហើយក្នុងការងារនេះ អាជ្ញាធរជាតិអប្សរា បានធ្វើការងារច្រើនដូចជាការធ្វើឱ្យទឹកច្រើនឡើងវិញនៅតាមកសិន្ធុ ការរក្សាដើមឈើចាស់ និងដាំឡើងវិញក្នុងរមណីយដ្ឋានអង្គរ ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
