ថ្លែងបើកវេទិកាថ្នាក់តំបន់ស្តីពី”កសិកម្មអេកូឡូស៊ីនាពេលអនាគត”នៅខេត្តសៀមរាប នៅព្រឹកថ្ងៃទី០៦ ខែវិច្ឆិកា ឆ្នាំ២០១៨នេះ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា សកម្មភាពកសិកម្មអេកូឡូស៊ីបច្ចុប្បន្ន បាននឹងកំពុងអនុវត្តន៍នៅតាមបណ្តាប្រទេសក្នុងតំបន់អាស៊ីអាគ្នេយ៍ជាច្រើនរួមមាន៖ ប្រទេសកម្ពុជា , ឡាវ , មីយ៉ាន់ម៉ា និងប្រទេសវៀតណាម ជាដើម ដែលការងារនេះ ត្រូវបានផ្តួចផ្តើមពីអ្នកពាក់ព័ន្ធផ្សេងៗ ក្នុងផ្នែកកសិកម្មអេកូឡូស៊ី ហើយត្រូវបានលើកកម្ពស់ពីកសិករខ្នាតតូច ទៅដល់អ្នកស្រាវជ្រាវ អ្នកអភិវឌ្ឍន៍ និងអ្នកអនុវត្តដោយមានការគាំទ្រពីវិស័យឯកជននិងសង្គមស៊ីវិល ហើយការធ្វើកសិកម្មអេកូឡូស៊ីនេះ បានផ្តល់ប្រយោជន៍ច្រើនដល់វិស័យកសិកម្មកម្ពុជា នាពេលបច្ចុប្បន្ន និងអនាគត ដូចជាការស្សំសំចៃទឹកកសិកម្ម ការបង្កើនគុណភាពដី និងការធ្វើឱ្យប្រសើរឡើងដល់ជីវចម្រុះក្នុងដីកសិកម្ម ។
ឯកឧត្តមមានប្រសាសន៍ទៀតថា ប្រទេសកម្ពុជាក៏ដូចជាប្រទេសនៅក្នុងតំបន់ដែរ ដែលការធ្វើទំនើបកម្មកសិកម្មដោយអនុវត្តន៍កសិកម្ម នៃបដិវត្តន៍បៃតងដើម្បីផលិតដំណាំនាំចេញ និងបំពេញតម្រូវការស្បៀងនោះ បានធ្វើឱ្យប៉ះពាល់ដល់បរិស្ថាន ដូចជាធ្លាក់ចុះគុណភាពដី , ការហូច្រោះដី និងការថយចុះជីវៈចម្រុះ ហើយដើម្បីឆ្លើយតបទៅនឹងតម្រូវការស្បៀងនាពេលអនាគត កម្ពុជាចាំបាច់ត្រូវផ្លាស់ប្តូរទៅរកការធ្វើកសិកម្ម ដែលផ្តល់សន្តិសុខនិងសុវត្ថិភាពស្បៀង និងស្តារឡើងវិញនូវប្រព័ន្ធអេកូឡូស៊ី ដើម្បីទ្រទ្រង់កំណើនសេដ្ឋកិច្ច ព្រមទាំងផ្តល់ឱកាសកាន់តែច្រើនសម្រាប់កសិករខ្នាតតូច និងយុវជន ដូច្នេះការធ្វើកសិកម្មអេកូឡូស៊ី គឺជាបច្ចេកទេសកសិកម្មសមស្របមួយ ក្នុងការឆ្លើយតបទៅនឹងការប្រែប្រួលអាកាសធាតុនាពេលបច្ចុប្បន្ន និងអនាគត ពិសេសការកាត់បន្ថយការប្រើប្រាស់ទឹកច្រើន ក្នុងការងារកសិកម្ម កាត់បន្ថយការហូរច្រោះដីកសិកម្ម និងការបង្កើនជីជាតិដីកសិកម្មជំនួសឱ្យការប្រើប្រាស់ជីគីមីថ្នាំពុលកសិកម្ម ៕
អត្ថបទ និង រូបថត ៖ សហការី
កែសម្រួលអត្ថបទ ៖ លោក លីវ សាន្ត
ព័ត៌មានជាតិ ថ្មីៗ
