លោកស្រីតំណាងអង្គការ GRET ប្រចាំខេត្តសៀមរាប បានលើកឡើងថា បញ្ហាទីផ្សារក្នុងប្រទេសកម្ពុជា នៅតែជាបញ្ហាចោទសម្រាប់ប្រជាកសិករនាពេលបច្ចុប្បន្ន ប៉ុន្តែប្រសិនបើកសិករចង់រកទីផ្សារកសិកម្មឲ្យបានល្អប្រសើរនោះ ត្រូវតែចងក្រងជាសហគមន៍កសិករជាមុនសិន បន្ទាប់មកសហគមន៍កសិករនឹងទទួលបានការប្រឹក្សាយោបល់លើបញ្ហានៃការដាំដុះ និងការណែនាំពីបច្ចេកទេសបន្ថែម ព្រោះថា ការចងក្រងជាសហគមន៍កសិករ អាចធានាបាននូវនិរន្តរភាពផលិតផលកសិកម្ម អាចពង្រឹងនូវលទ្ធភាពផលិត និងអាចឆ្លើយតបបាននូវតម្រូវការរបស់អ្នកទិញក្នុងកម្រិតណាមួយច្បាស់លាស់ ខណៈកន្លងមក សហគមន៍កសិកររបស់អង្គការ GRET នេះ អាចស្វែងរកទីផ្សារដែលមានតម្លៃថ្លៃជាងទីផ្សារនាពេលបច្ចុប្បន្ន ពី៥០រៀល ក្នុងមួយគីឡូក្រាម ទៅ ១០០រៀល ក្នុងមួយគីឡូក្រាម។
លោកស្រីតំណាងអង្គការ GRET បានបញ្ជាក់ទៀតថា បច្ចុប្បន្នអង្គការ GRET បានធ្វើការសម្របសម្រួលលើការងារកសិកម្មនេះ តែនៅក្នុងស្រុកគោលដៅ២តែប៉ុណ្ណោះ គឺស្រុកប្រាសាទបាគង និងស្រុកសូទ្រនិគម ក្នុងនោះមាន ៖ ១. ជំរុញឲ្យកសិករធ្វើកសិកម្មបែបប្រពលវប្បកម្មដំណាំស្រូវ គឺការដាំស្រូវ១ដើម , ២. ជំរុញឲ្យកសិករធ្វើកសិកម្មបែបប្រពលវប្បកម្មដំណាំបន្លែ គឺកសិកម្មបែបអេកូឡូស៊ី , ៣. បានបណ្ដុះបណ្ដាលកសិករនូវបច្ចេកទេសចិញ្ចឹមមាន់ , ៤. បង្កើតក្រុមសន្សំប្រាក់ដើម្បីពង្រីកកសិកម្ម និងអាចខ្ចីប្រាក់ពីក្នុងក្រុមបាន , ៥. ប្រព័ន្ធស្រោចស្រព ខ្នាតតូច និងមធ្យម និង ៦. ជួយសម្របសម្រួលផ្នែកទីផ្សារ ដូចជាការណែនាំទីផ្សារទៅកាន់កសិករ និងប្រឹក្សាយោបល់ ។
លោកស្រីបានបញ្ជាក់បន្ថែមទៀតថា ប្រសិនបើកសិករដែលនៅក្រៅស្រុកគោលដៅនេះ មានចំណាប់អារម្មណ៍ក៏អាចទាក់រកសុំការចែករំលែកបទពិសោធន៍ និងការផ្ដល់យោបល់ផ្សេងៗបានផងដែរ តាមរយៈលេខទូស័ព្ទអង្គការ GRET នៅរាជធានីភ្នំពេញ លេខ ០២៣ ២២០ ២៥៩ និង នៅខេត្តសៀមរាប លេខ ០៣១ ២២៨ ១១៣៦ ឬលេខទូរស័ព្ទ កញ្ញា សោម ច័ន្ទឆវី មន្ត្រីឯកទេសទីផ្សារ ០១២ ២៧៤ ៣៧៨ ៕
អត្ថបទ និង រូបថត ៖ លោក ហេង វន្នី
កែសម្រួលអត្ថបទ ៖ លោក លីវ សាន្ត
