កាលពីព្រឹកថ្ងៃទី០៦ ខែវិចិ្ឆកា ឆ្នាំ២០១៨នេះ លោកសូ ប្លាតុង អភិបាលក្រុងសៀមរាប បានប្រកាសជាសាធារណៈ ដោយដាក់មណ្ឌលរដ្ឋបាលក្រុងសៀមរាប ទៅជាតំបន់ដែលគ្មានផ្សែងបារី ខណៈដែលការប្រកាសនេះ ត្រូវទទួលបានការគាំទ្រពីសំណាក់មន្ត្រីរាជការក្នុងសាលាក្រុង , ពីក្រសួងសុខាភិបាល និង សម្ព័ន្ធត្រួតពិនិត្យថ្នាំជក់អាស៊ីអាគ្នេយ៍ ហៅកាត់ថា ស៊ីតការ ។
លោកសូរ ប្លាតុង បានបញ្ជាក់ថា ក្រុងសៀមរាប ជាទីក្រុងមួយក្នុងចំណោមទីក្រុងល្បីៗ ក្នុងតំបន់អាស៊ី-អាគ្នេយ៍ ជាពិសេសខាងវិស័យទេសចរណ៍ វប្បធម៌ ប្រវត្តិសាស្ត្រ បេតិភណ្ឌ ដូច្នេះការដាក់ទីក្រុងនេះជាតំបន់គ្មានផ្សែងបារី គឺវាបានជួយលើកកម្ពស់មុខមាត់របស់ប្រទេសកម្ពុជា និង ជាការគិតគូរដល់សុខមាលភាពដល់ពលរដ្ឋទូទៅ រួមទាំងអ្នកទេសចរផងដែរ ស្របពេលដែលជាក់ស្តែង កំពុងមានកំណើនអ្នកទេសចរទាំងក្នុងស្រុក ក្នុងតំបន់ និងអន្តរជាតិពីមួយឆ្នាំទៅមួយឆ្នាំ ។
លោកស្រីវេជ្ជបណ្ឌិត ដូមីលីន វីឡារ៉េ តំណាងសម្ព័ន្ធត្រួតពិនិត្យថ្នាំជក់អាស៊ីអាគ្នេយ៍ មានប្រសាសន៍ថា ការរប្រែក្លាយទីក្រុងទេសចរណ៍មួយនេះ ឲ្យក្លាយជាទីក្រុងគ្មានផ្សែងបារី គឺជាផ្នែកមួយដ៏សំខាន់ថែមទៀត ក្នុងការជំរុញកំណើនភ្ញៀវទេសចរឲ្យកាន់តែខ្ពស់ ពិសេសវាជាការចូលរួមយ៉ាងសកម្ម ក្នុងការអនុវត្តអនុសញ្ញាអន្តរជាតិ ស្ដីពីការត្រួតពីនិត្យផលិតផលថ្នាំជក់របស់អង្គការសុខភាពពិភពលោក ដែលនេះជាការខិតខំប្រឹងប្រែងរបស់ប្រមុខរាជរដ្ឋាភិបាលកម្ពុជា ក្នុងការយកចិត្តទុកដាក់ទៅលើសុខភាពប្រជាជន ពីការស្លាប់បាត់បង់ជីវិត ដោយសារការប្រើប្រាស់ថ្នាំជក់ ក៏ដូចជាសុខភាពរបស់ភ្ញៀវជាតិ និងអន្តរជាតិទាំងឡាយ ដែលចូលមកប្រទេសកម្ពុជា ជាពិសេសទីក្រុងសៀមរាប ឲ្យរួចផុតពីគ្រោះថ្នាក់ដែលបង្ករឡើងដោយថ្នាំជក់ ។
សូមបញ្ជាក់ថា ការអនុវត្តបរិស្ថានគ្មានផ្សែងបារី គឺជានិន្នាការពិភពលោក និងស្របតាមប្រជាពលរដ្ឋ ៩៩ភាគរយ តាមការស្ទង់មតិប្រជាពលរដ្ឋ ស្ដីពីការគាំទ្រឲ្យទីក្រុងសៀមរាប ក្លាយជាទីក្រុងគ្មានផ្សែងបារី ខែតុលា ឆ្នាំ២០១៧ គាំទ្រឲ្យទីក្រុងសៀមរាប ក្លាយជាទីក្រុងគ្មានផ្សែងបារី ។
ទីក្រុងគ្មានផ្សែងបារី គឺមាន៖ ១. ហាមឃាត់ការជក់បារី ក្នុងអគារនៃកន្លែងធ្វើការ និងកន្លែងសាធារណៈ , ២. ហាមជក់បារីខាងក្នុងមធ្យោបាយធ្វើដំណើរសាធារណៈ , ៣. អាចជក់បារីបាន នៅក្រៅអគារចម្ងាយ ៥ម៉ែត្រពីច្រកចូល និង៤. ហាមជក់បារីក្នុងបរិវេណនៃគ្រឹះស្ថានសិក្សា គ្រឹះស្ថានសុខាភិបាល ទារកដ្ឋាន សួនកុមារ សួនច្បារសាធារណៈ គ្រឹះស្ថានសាសនា សារមន្ទីរ រមណីដ្ឋានវប្បធម៌ប្រវត្តិសាស្ត្រ កន្លែងហាត់ប្រាណ ស្ថានីយ៍ប្រេងឥន្ធៈ និងកន្លែងងាយឆាបឆេះ ។
យោងតាមរបាយការណ៍របស់អង្គការសុខភាពពិភពលោក បានបង្ហាញថា ក្នុងមួយឆ្នាំមានមនុស្សចំនួនប្រមាណជា៧លាននាក់ បានស្លាប់ដោយសារជំងឺដែលបង្កមកពីការជក់បារី ហើយនៅប្រទេសកម្ពុជា មានមនុស្សប្រមាណជាង១៦ពាន់នាក់ បានស្លាប់ដោយសារការជក់បារីនេះ ហើយបើគិតជាមធ្យម មានចំនួនអ្នកស្លាប់ច្រើនជាង៣០នាក់ក្នុងមួយថ្ងៃ ខណៈដែលកម្ពុជា បានចំណាយថវិកាចំនួន១៦៣លានដុល្លាអាមេរិកក្នុងមួយឆ្នាំ ទៅលើការព្យាបាលជំងឺចម្បងចំនួន៥មុខ ដែលបណ្តាលមកពីការជក់បារីរួមមាន៖ ជំងឺមហារីកសួត ជំងឺស្ទះសរសៃបេះដូង ដាច់សរសៃឈាមខួរក្បាល ជំងឺរបេង ត្បៀតទងសួតរ៉ាំរ៉ៃ ហើយពលរដ្ឋកម្ពុជា ក៏បានចំណាយថវិកាលើការទិញបារីប្រមាណ២០០លានដុល្លាក្នុងមួយឆ្នាំ ៕
អត្ថបទ និង រូបថត ៖ សហការី
កែសម្រួលអត្ថបទ ៖ លោក លីវ សាន្ត
