ខេត្តសៀមរាបនិងក្រុងស៊ូវ៉ុនចុះអនុស្សរណៈលើកិច្ចព្រមព្រៀងលើគម្រោងអភិវឌ្ឍន៍ភូមិភ្នំក្រោម-ស៊ូវ៉ុន ជំហានទី៤

នៅរសៀលថ្ងៃទី០៥ ខែវិច្ឆិកា ឆ្នាំ២០១៨ម្សិលមិញនេះ រដ្ឋបាលខេត្តសៀមរាប និង ក្រុងស៊ូវ៉ុន នៃសាធារណរដ្ឋកូរ៉េ ដែលជាក្រុងសម្ព័ន្ធមេត្រីភាពនឹងខេត្តសៀមរាប បានចុះអនុស្សរណៈលើកិច្ចព្រមព្រៀងមួយ ដើម្បីអភិវឌ្ឍន៍ភូមិស៊ូវ៉ុន ភ្នំក្រោម ក្នុងគោលដៅលើកកម្ពស់កម្រិតជីវភាពរស់នៅ របស់ប្រជាពលរដ្ឋក្នុងតំបន់ភូមិភ្នំក្រោម ដែលពិធីនេះ បានប្រព្រឹត្តទៅនៅសណ្ឋាគារបុរី អង្គរ ក្នុងក្រុងសៀមរាប ក្រោមអធិបតីភាពឯកឧត្តម អ៊ឹង ហឿន ប្រធានស្តីទីក្រុមប្រឹក្សាខេត្ត និង លោក ពិន ប្រាកដ អភិបាលរងខេត្ត សម្រាប់ភាគីខេត្តសៀមរាប និង ឯកឧត្តម យ៉ុម តែយ៉ុង អភិបាលក្រុងស៊ូវ៉ុន ។

បើតាមប្រសាសន៍នោះឯកឧត្តម យ៉ុម តែយ៉ុង បានឲ្យដឹងថា ការអភិវឌ្ឍភូមិមិត្តភាព ភ្នំក្រោម ស៊ូវ៉ុននេះ ចាប់ពីជំហានទី១ ដល់ជំហានទី២ បានផ្ដោតលើការងារអប់រំ អនាម័យ និង បរិស្ថាន ព្រមទាំងការផ្គត់ផ្គង់ស្បៀងអាហារផងដែរ ហើយក្នុងដំណាក់កាលទី៣ សមទ្ធិផលដែលប្រជាជនភូមិមិត្តភាពភ្នំក្រោម ស៊ូវ៉ុន ទទួលបានគឺ មានអគារសិក្សា ផ្លូវថ្នល់ បង្គន់អនាម័យ អណ្តូងទឹកស្អាត និង លំនៅដ្ឋានជាដើម ដែលសមទ្ធិផលទាំងនេះ ដោយមានកិច្ចសហប្រតិបត្តិការជាមួយសមាគមហែភីខាំ មន្ទីរ-អង្គភាពពាក់ព័ន្ធ ប្រជាជនក្រុងស៊ូវ៉ុនទាំងមូល និង អង្គការឡូតិ៍ធឹសវើល ខណៈដែលគម្រោងនេះ នឹងត្រូវបញ្ចប់នៅចុងឆ្នាំ២០១៨ ហើយការបន្តជំហានទី៤នេះ គឺផ្តោតទៅលើការបង្កើនប្រាក់ចំណូល តាមរយៈការបណ្តុះបណ្តាលវិជ្ជាជីវៈ ការពង្រឹងសមត្ថភាពប្រជាជនក្នុងភូមិ និង ធ្វើការកែលម្អបរិស្ថានរស់នៅ ការផ្តល់ជំនួយផ្នែកអប់រំ និង សុខាភិបាលជាដើម ។

មានប្រសាសន៍ក្នុងឱកាសនោះដែរ លោក ពិន ប្រាកដ អភិបាលរងខេត្តសៀមរាប មានជំនឿជឿជាក់ថា គម្រោងអភិវឌ្ឍន៍នេះ នឹងទទួលបានជោគជ័យ ទៅតាមគោលដៅកំណត់ ព្រមទាំងជួយជ្រោមជ្រែងគ្រប់កាលៈទេសៈ ក្នុងដែនសមត្ថកិច្ចរដ្ឋបាលខេត្តសៀមរាប ហើយក៏ជាវប្បធម៌នៃការចែករំលែកជួយគ្នាដ៏ល្អប្រពៃ និង បន្តទំនាក់ទំនងសម្ព័ន្ធមេត្រីភាពជាមិត្តភាពសៀមរាប-ស៊ូវ៉ុន ៕