ចាប់តាំងពីឆ្នាំ២០០៧ ភូមិភ្នំក្រោម សង្កាត់សៀមរាប ក្រុងសៀមរាប ទទួលបានសមិទ្ធិផលជាច្រើនដូចជា វិទ្យាល័យភ្នំក្រោម-ស៊ូវ៉ុន ផ្លូវថ្នល់ ប្រព័ន្ធធារាសាស្ត្រ បន្ទប់ទឹក អគារសិក្សា អគារសិប្បកម្ម ឡដុតសំរាម អណ្តូងទឹក លំនៅដ្ឋាន ដែលជាការជួយគាំទ្រពីរដ្ឋបាលក្រុងស៊ូវ៉ុន និងដៃគូអភិវឌ្ឍន៍ រួមមាន សមាគមហែភីខាំ មន្ទីរ-អង្គភាពពាក់ព័ន្ធ អង្គការឡូតិ៍ធឹសវើល និងប្រជាជនក្រុងស៊ូវ៉ុនទាំងមូល។
ឯកឧត្តម យ៉ុម តែយ៉ុង អភិបាលក្រុងស៊ូវ៉ុន នៃសាធារណរដ្ឋកូរ៉េ បានគូសបញ្ជាក់ថា ការបង្កើតនូវភូមិមិត្តភាពភ្នំក្រោម ស៊ូវ៉ុននេះ មានរយៈពេល៧ឆ្នាំមកហើយ ព្រមទាំងបានធ្វើការអភិវឌ្ឍភូមិមិត្តភាពនេះគួរឲ្យកត់សម្គាល់ ចំពោះវិស័យអប់រំ រដ្ឋាភិបាល និងសប្បុរជននៃសាធារណរដ្ឋកូរ៉េ បានបង្កើតនូវអនុវិទ្យាល័យ និង វិទ្យាល័យជូនដល់កូនចៅប្រជាជននៅក្នុងតំបន់ភ្នំក្រោមបានសិក្សារៀនសូត្រ នៅជិតលំនៅដ្ឋានខ្លួន ជាមួយគ្នានោះក៏បានបណ្តុះបណ្តាលនូវជំនាញមួយចំនួនដល់ប្រជាពលរដ្ឋនៅក្នុងតំបន់ភ្នំក្រោម រួមទាំងបានបញ្ជូន នូវក្រុមគ្រូពេទ្យស្ម័ត្រចិត្តកូរ៉េ មកធ្វើការព្យាបាលជម្ងឺដោយឥតគិតថ្លៃ ជូនដល់ប្រជាជននៅតំបន់ភ្នំក្រោម ក៏ដូចតាមបណ្តា ស្រុកមួយចំនួនក្នុងខេត្តសៀមរាបផងដែរ។
លោកអភិបាលរងខេត្ត បានបញ្ជាក់ថា ព្រះរាជាណាចក្រកម្ពុជា និងសាធារណរដ្ឋកូរ៉េ បានចាប់ផ្តើមឡើងវិញ នូវកិច្ចសហប្រតិបត្តិការចំណងការទូតនៅឆ្នាំ១៩៩៧ ក្រោមការដឹកនាំដ៏ខ្ពង់ខ្ពស់របស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលមានរយៈពេល ២១ឆ្នាំហើយ បើប្រៀបធៀបជាមួយមនុស្សគឺ ស្ថិតក្នុង យុវវ័យ ដែលពោរពេញដោយកម្លាំងពលំ និង ស្មារតីមាំមួន អាចសម្រេចបានជោគជ័យនូវរាល់ការងារដែលបាននិងកំពុងធ្វើ មានន័យថា ទំនាក់ទំនងរវាងកម្ពុជា-កូរ៉េ នាពេលនេះ គឺបានឈានដល់របត់មួយដែលប្រទេស និងប្រជាជនយើងទាំងពីរ បានធ្វើការរួមគ្នាលើគ្រប់វិស័យ ទាំងក្នុងក្របខណ្ឌថ្នាក់ជាតិ និងថា្នក់ក្រោមជាតិ ជាក់ស្តែងកិច្ចទំនាក់ទំនងរវាង រដ្ឋបាលខេត្តសៀមរាប និងរដ្ឋបាលក្រុងស៊ូវ៉ុន ជាដើម ។
លោក ពិន ប្រាកដ អភិបាលរងខេត្តសៀមរាប បានអរគុណចំពោះឯកឧត្តមអភិបាលក្រុង និង គណៈប្រតិភូទាំងអស់ ដែលបានជ្រើសរើសយកទឹកដីខេត្តសៀមរាប ក្នុងការរៀបចំពិធីដ៏មានអត្ថន័យនេះឡើង ក្នុងន័យផ្សារភ្ជាប់ទំនាក់ទំនងរវាងប្រជាពលរដ្ឋខ្មែរ និង កូរ៉េ ក៏ដូចជាទំនាក់ទំនងរវាង វប្បធម៌ ប្រពៃណីយ៍ ទំនៀមទំលាប់កូរ៉េ ជាមួយទឹកដីអង្គរ។ ចំពោះសមិទ្ធិផល ដែលរដ្ឋាភិបាល និងប្រជាជននៃសាធារណរដ្ឋកូរ៉េបានកសាង និងគាំទ្រនាពេលកន្លងមក ពិតជាបានជះឥទ្ធិពលជាវិជ្ជមានដល់វប្បធម៌របស់ប្រទេសកម្ពុជា និង ជឿទុកចិត្តពីភ្ញៀវទេសចរ ថាកម្ពុជាពិតជាមានសុខសន្ដិភាព និងជាមិត្តជាមួយបណ្ដាប្រទេសលើសកលលោក ដែលជាហេតុចម្បងទៅកាន់ពិភពលោកឲ្យបន្តមកទស្សនាខេត្តសៀមរាប។
ទិវាបុណ្យវប្បធម៌កូរ៉េនេះ នៅវិទ្យាល័យ ភ្នំក្រោម-ស៊ូវ៉ុន ស្ថិតនៅភូមិភ្នំក្រោម សង្កាត់សៀមរាប ក្រុងសៀមរាប ក្រោមអធិបតីភាព ឯកឧត្តម អ៊ឹង ហឿន ប្រធានក្រុមប្រឹក្សាខេត្តស្តីទី លោក ពិន ប្រាកដ អភិបាលរងនៃគណៈអភិបាលខេត្ត ថា្នក់ដឹកនាំ តំណាងមន្ទីរ អាជ្ញាធរក្រុងសៀមរាប និងគណៈប្រតិភូក្រុងស៊ូវ៉ុន នៃសាធារណរដ្ឋកូរ៉េ ដឹកនាំដោយ ឯកឧត្តម យ៉ុម តែយ៉ុង អភិបាលក្រុងស៊ូវ៉ុន ព្រមទាំងវត្តមានចូលរួមរបស់ឯកឧត្តមអគ្គកុងស៊ុលកូរ៉េ ប្រចាំខេត្តសៀមរាប រួមទាំង លោក គ្រូ អ្នកគ្រូ សិស្សានុសិស្ស និង ប្រជាពលរដ្ឋយ៉ាងច្រើនកុះករផងដែរ ។
ក្នុងឱកាលនោះដែរ ក៏មានការប្រគល់អំណោយដល់សិស្សក្រីក្រនូវកង់ចំនួន ១៥០គ្រឿង សម្លៀកបំពាក់សិស្ស២០០កំប្លេរ សម្លៀកបំពាក់គ្រូ ៧០កំប្លេ សម្ភារៈសិក្សានិងកីឡា មួយចំនួន និង បងប្អូនប្រជាពលរដ្ឋ៦០០នាក់ចូលរួម ម្នាក់ៗ អង្ករ ១០គក្រ។
អត្ថបទ និង រូបថត ៖ លោក ខេង ឧត្តម និងគឿន វ៉េត
កែសម្រួលអត្ថបទ ៖ លោក សេង ផល្លី
