កាលពីថ្ងៃទី០៤ ខែវិច្ឆិកា ឆ្នាំ២០១៨នេះ សមាគមទីភ្នាក់ងារទេសចរណ៍កម្ពុជា បានរៀបចំកម្មវិធីដំណើរទស្សនាកំសាន្តក្នុងព្រៃឧទ្យានអង្គរលើកទី១ ដោយមានអ្នកចូលរួមជាក្រុមប្រតិបត្តិករទេសចរណ៍ប្រមាណជា ៣០០នាក់ ក្នុងចម្ងាយប្រមាណជា១២គីឡូម៉ែត្រ ដែលចាប់ចេញដំណើរពីចំណុចតំបន់ប្រាសាទព្រះខ័ន្ធ ឆ្លងកាត់ព្រៃតំបន់ប្រាសាទតាព្រហ្ម រួចបញ្ចប់នៅរហាត់ទឹក នៃស្ថានីយ៍បណ្តុះកូនឈើស្ពានអង្គរ ក្នុងគោលបំណងបង្កើតក្តីសង្ឃឹមមួយទៀត ដែលជាផលិតផលអាចទាក់ទាញភ្ញៀវទេសចរជាតិ អន្តរជាតិ ស្វែងយល់អំពីសក្តានុពលដ៏សម្បូរបែប ក្នុងរមណីយដ្ឋានបេតិកភណ្ឌអង្គរ ។
ការរៀបចំកម្មវិធីដំណើរកំសាន្តក្នុងព្រៃឧទ្យានអង្គរនេះ ក៏បានភ្ជាប់ជាមួយនឹងកម្មវិធីសំខាន់ៗចំនួន២ផ្សេងទៀត គឺការដាំកូនឈើនៅតាមគោលដៅចំនួន៧កន្លែង ក្នុងតំបន់ឧទ្យានអង្គរ និង រៃអង្គាសថវិកាសប្បុរសជន ដើម្បីជួយទ្រទ្រង់ដល់កិច្ចដំណើរការនៃមន្ទីរពេទ្យកុមារអង្គរ ខេត្តសៀមរាប ដែលកំពុងប្រតិបត្តិការចលនាមនុស្សធម៌ ពិនិត្យ និងព្យាបាលជម្ងឺកុមារ ដោយឥតគិតថ្លៃ ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា ឲ្យដឹងថា កម្មវិធីដំណើរកំសាន្តក្នុងព្រៃឧទ្យានអង្គរ គឺជាចំណុចចាប់ផ្តើមនៃការរៀបចំឲ្យមានផលិតផលទេសចរណ៍ថ្មីមួយទៀត ដោយផ្សាភ្ជាប់ជាមួយវង់ទស្សនាចរណ៍ប្រាង្គប្រាសាទ ដោយមានគោលដៅទស្សនាជាច្រើន ដែលភ្ញៀវទេសចរពុំធ្លាប់ឃើញ ហើយព្រៃធម្មជាតិទាំងនេះ គឺជាគម្របបៃតងនៃតំបន់ប្រាសាទ ហើយអ្នកដើរកំសាន្តក្នុងព្រៃឧទ្យានអង្គរ មានចំណាប់អារម្មណ៍ថា វាជាដំណើរទស្សនាកំសាន្តមួយដ៏មានសារប្រយោជន៍ ដែលមិនត្រឹមតែជាការចាប់ផ្តើមបង្កើតថ្មីផលិតផលទេសចរណ៍ប៉ុណ្ណោះទេ តែសម្រាប់ពួកគេវាជាឱកាសនៃការស្គាល់គ្នា ជជែកគ្នាពីបទពិសោធន៍ពីគ្នាទៅវិញទៅមក ជួយឲ្យវិស័យទេសចរណ៍មាននិរន្តរភាព និងដើម្បីសុខភាពផងដែរ ។
លោកស្រី ឆាយ ស៊ីវលីន បានឲ្យដឹងបន្ថែមថា សម្រាប់កម្មវិធីកំសាន្តក្នុងព្រៃឧទ្យានអង្គរ គឺជាកញ្ចប់ទស្សនកិច្ចថ្មីហើយប្លែក ព្រោះជាដំណើរនាំភ្ញៀវកំសាន្តក្នងព្រៃធម្មជាតិ ដើម្បីទៅទស្សនាប្រាង្គប្រាសាទបុរាណខ្មែរ ខណៈមុននេះ អង្គការ GIZ បានផ្សព្វផ្សាយកម្មវិធី ទស្សនាសៀមរាប ក្រៅពីប្រាសាទក៏ជាផលិតផលទេសចរណ៍ថ្មីផងដែរ ដែលសំដៅឆ្ពោះទៅរមណីយដ្ឋាន និង សហគមន៍ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
