កាលពីថ្ងៃទី០៤ ខែវិច្ឆិកា ឆ្នាំ២០១៨នេះ អង្គកឋិនទានសាមគ្គីមួយដង្ហែចូលវត្តប្រាសាទគោកចក ស្ថិតក្នុងសង្កាត់គោកចក ក្រុងសៀមរាប ខេត្តសៀមរាប ដែលផ្ដួចផ្ដើមឡើងដោយព្រះគ្រូវិចិត្រវង្សាញាតិធម្មោ ហែម គឹមសាន ជាព្រះគ្រូចៅអធិការវត្ត ហើយត្រូវបានគណៈកម្មការអាចារ្យវត្ត និងប្រជាពុទ្ឋបរិស័ទចំណុះជើងវត្ត បានមូលមតិគ្នាជាឯកច្ឆន្ទនោះ ប្រមូលបច្ច័យបានចំនួន៣១លាន៩០ម៉ឺន២ពាន់រៀល និងប្រាក់ដុល្លារ ៣.៤៧២ដុល្លារ សម្រាប់កសាងសាលាឆាន់ដែលទើបកសាងបានបាតគ្រឹះ និងសសរនៅឡើយ ។
បើតាមគណៈកម្មការអាចារ្យវត្តបានឲ្យដឹងថា អង្គកឋិនទានសម្រាប់វត្តឆ្នាំនេះ កើតឡើងដោយហេតុ៤យ៉ាង គឺ ហេតុទី១. ដោយសារដូនជីតាជីប្រជាពុទ្ឋបរិស័ទបានស្តាប់ព្រះធម៌ ព្រះវិន័យ ព្រះពុទ្ឋសាសនា បានដឹងថាកឋិនទាន ជាកាលទានមានផលវិសេសជាងទានទាំងពួង ព្រោះបានផលដល់ទាយកម្ចាស់ទានផង បានអានិសង្ឍដល់ភិក្ខុជាបដិគ្គាហកៈអ្នកទទួលក្រាលគ្រងនិងអ្នកអនុមោទនាផង , ហេតុទី២. ដោយហេតុបានឃើញព្រះសង្ឃគង់ចាំវស្សាក្នុងវត្តនេះបានរៀនសូត្រធម៌វិន័យ ប្រព្រឹត្តិត្រឹមត្រូវតាមច្បាប់ព្រះពុទ្ឋសាសនា , ហេតុទី៣. ដោយបានឃើញវត្តកំពុងកសាងទីសេនាសេនៈ គឺសាលាឆាន់មួយខ្នងមានទំហំ ៣០គុណ៤០ម៉ែត្រ និង ហេតុទី៤. ដោយយល់ឃើញពិចារណានូវអាយុសង្ខាររបស់ខ្លួនមិនទៀងស្ថិតស្ថេរឡើយ ។
គួររំលឹកលឹកថា កឋិនទានបវេណីព្រះពុទ្ធសាសនា គឺជាឧត្ដមបុណ្យរបស់ពុទ្ធបរិស័ទ ហើយពាក្យថា កឋិន ជាភាសាបាលីសំដៅយកក្របក្ដារ ដែលភិក្ខុសង្ឃសម័យបុរាណឥណ្ឌាប្រើសម្រាប់ដេរសំពត់ធ្វើជាស្បង់ចីវរ រីឯសំពត់ដែលបានរៀបចំតាក់តែងឡើងនោះមានឈ្មោះថា សំពត់កឋិន ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
