កាលពីថ្ងៃទី៣១ ខែតុលា ឆ្នាំ២០១៨ម្សិលមិញនេះ ក្រុមគ្រូពេទ្យក្រុងថៃចូវ ខេត្តជាំងស៊ូ នៃប្រទេសចិន ចុះពិនិត្យព្យាបាលជម្ងឺជូនប្រជាជនក្នុងក្រុងសៀមរាបឥតគិតថ្លៃ ដែលបានប្រព្រឹត្តទៅនៅមន្ទីរពេទ្យអន្តរជាតិរស្មីអង្គរ ក្នុងក្រុងសៀមរាប ។
បើតាមប្រសាសន៍របស់លោក លុយ ជឺជៀ ប្រធានការិយាល័យកុងស៊ុលចិនប្រចាំខេត្តសៀមរាប បានឲ្យដឹងថា គោលបំណងនៃការពិនិត្យ និង ព្យាបាលជម្ងឺជូនដល់ប្រជាពលរដ្ឋកម្ពុជាដោយឥតគិតថ្លៃនាពេលនេះ គឺដើម្បីចូលរួមអបអរសាទរខួបលើកទី៦០ នៃការបង្កើតចំណងការទូតរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន ដែលផ្តួចផ្តើមឡើងដោយឯកឧត្តមប្រធានាធិបតីចិន ក្រោមគោលនយោបាយ ខ្សែក្រវ៉ាត់មួយ ផ្លូវមួយ ខណៈដែលការព្យាបាលជម្ងឺដោយឥតគិតថ្ងៃនេះ មន្ទីរពេទ្យអន្តរជាតិរស្មីអង្គរ តែងធ្វើឡើងក្នុងរយៈពេល៣ខែម្ដង មានរយៈពេលមួយថ្ងៃ ជូនដល់ប្រជាពលរដ្ឋខេត្តសៀមរាប ក្នុងការចូលរួមកាត់បន្ថយនូវភាពក្រីក្ររបស់ប្រជាជនកម្ពុជា ។
លោកស្រី យូ សុភា អភិបាលរងខេត្តសៀមរាប បានមានប្រសាសន៍ថា ក្នុងនាមអាជ្ញាធរខេត្ត សូមថ្លែងនូវអំណរគុណដល់ក្រុមគ្រូពេទ្យក្រុងថៃចូវ ខេត្តជាំងស៊ូ និង មន្ទីរពេទ្យអន្តរជាតិរស្មីអង្គរ ដែលបានរៀបចំឲ្យមានកម្មវិធីនេះឡើង ដែលជាស្មារតីនៃកិច្ចពង្រឹង និងពង្រីកចំណងទំនាក់ទំនងសហប្រតិបត្តិការរវាងប្រទេសទាំងពីរ ជាដៃគូរយុទ្ធសាស្ត្រគ្រប់ជ្រុងជ្រោយនាពេលបច្ចុប្បន្ន និង គំនិតផ្តួចផ្តើម ខ្សែក្រវ៉ាត់មួយ ផ្លូវមួយ ព្រមទាំងបើកនូវទំព័រប្រវត្តិសាស្ត្រថ្មី នៃកិច្ចសហការគ្រប់ជ្រុងជ្រោយឲ្យកាន់តែរឹងមាំឡើងថែមទៀត ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#សុខាភិបាល
