ចលនា ៣ល្អ ជំរុញដល់យុវជន និងកុមារ ចាប់អារម្មណ៍និងការខិតខំកសាងអំពើល្អរបស់ខ្លួន យកចិត្តទុកដាក់ជួយមិត្តភ័ក្តិ និងគ្រួសារ ព្រមទាំងសង្វាតរៀនសូត្រផងដែរ ។
នេះបើតាមប្រសាសន៍ ឯកឧត្តម សេរី ជំនះ អនុរដ្ឋលេខាធិការក្រសួងអប់រំ យុវជន និងកីឡា នៅក្នុងកិច្ចប្រជុំបូកសរុបចលនាប្រឡងប្រណាំង ៣ល្អ កូនល្អ សិស្សល្អ មិត្តល្អ ថ្នាក់ជាតិ របស់ក្រុមប្រឹក្សាយុវជនកម្ពុជា និងក្រុមប្រឹក្សាកុមារកម្ពុជា នាព្រឹកថ្ងៃទី២៧ ខែវិច្ឆិកា ឆ្នាំ២០១៩ នៅក្រុងសៀមរាប។
ឯកឧត្តមអនុរដ្ឋលេខាធិការ បញ្ជាក់ថា ចាប់ពីឆ្នាំ២០០៩ ក្រសួងអប់រំ យុវជន និងកីឡា បានដាក់ចេញ នូវសេចក្តីណែនាំស្តីពីការលើកកម្ពស់ ប្រសិទ្ធភាព នៃការអនុវត្តចលនាប្រឡងប្រណាំង ៣ល្អរបស់កុមារ និងយុវជន គឺកូន សិស្សល្អ និងមិត្តល្អ សំដៅបំពេញបន្ថែមចំណុចខ្វះខាតដែលធ្លាប់មានកន្លងមក និងជំរុញការអនុវត្តចលនាប្រឡងប្រណាំង ៣ល្អ កាន់តែមានភាពប្រសើរឡើង។
ព័ត៌មានជាតិ ថ្មីៗ
ឯកឧត្តម បន្តថា ក្រោមការដឹកនាំ របស់សម្តេចតេជោ ហ៊ុន សែន បានកំណត់នៅក្នុងកម្មវិធីនយោបាយវិស័យអប់រំ ថាជាវិស័យអាទិភាពមួយដ៏សំខាន់ នៃយុទ្ធសាស្ត្រចតុកោណ។ វិស័យអប់រំកំពុងមានការអភិវឌ្ឍត្រប់ផ្នែក ដើម្បីលើកកម្ពស់សមត្ថភាពសិស្ស-និស្សិត និងប្រជាពលរដ្ឋ ទូទៅឲ្យមានជំនាញបច្ចេកទេសនិងវិទ្យាសាស្ត្រខ្ពង់ខ្ពស់ ដើម្បីឆ្លើយតបទៅនឹងតម្រូវការទីផ្សារការងារ ពិសេសនោះគឺផ្តោតការយកចិត្តទុកដាក់អភិវឌ្ឍកម្លាំងយុវវ័យ ដែលជាកម្លាំងដ៏ខ្លាំងក្លា សម្រាប់បន្តវេនអភិវឌ្ឍប្រទេសជាតិ ។
ឯកឧត្តមបានជំរុញឲ្យមន្ត្រី ថ្នាក់ដឹកនាំយុវជននិងកុមារគ្រប់ថ្នាក់ ពិសេសយុវជន និងកុមារដែលបានចូលរួមក្នុងកិច្ចប្រជុំនេះ ជំរុញបន្ថែមចលនាប្រឡងប្រណាំង៣ល្អ ឲ្យក្លាយជាចលនាមួយដ៏មានប្រសិទ្ធភាព ក្នុងការអភិវឌ្ឍសមត្ថភាពយុវវ័យ ដែលជាផ្នែកមួយដ៏សំខាន់មិនអាចខ្វះបានក្នុងការលើកកម្ពស់ គុណភាពអប់រំ ដោយផ្អែកតាមសសរស្ថម្ភទាំង៤នៃការអបរំ គឺរៀនដើម្បីទទួលបានចំណេះដឹង រៀនដើម្បីចំណេះធ្វើ រៀនពីបទពិសោធន៏ រៀនដើម្បីក្លាយជាពលរដ្ឋល្អ និងរៀនរស់នៅជាមួយគ្នា ធ្វើការងារជាក្រុមស្របទៅតាមការវិវត្តរបស់សង្គម ៕
អត្ថបទ និង រូបភាព ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
