នៅព្រឹកថ្ងៃទី២៧ ខែវិច្ឆិកា ឆ្នាំ២០១៩ នៅសាលប្រជុំសាលាខេត្តសៀមរាប គណ:កម្មាធិការសម្របសម្រួលបច្ចេកទេសរបស់ក្រុមប្រឹក្សាខេត្តសៀមរាប ហៅកាត់ថា គសប បានបើកិច្ចប្រជុំរបស់ខ្លួន លើកទី៥ អាណត្តិទី៣ ដោយផ្ដោតលើ សំណួរ សំណូមពរ ក្នុងវេទិកាផ្សព្វផ្សាយពិគ្រោះយោបល់របស់ក្រុមប្រឹក្សាខេត្តអាណត្តិទី២ និងការផ្សព្វផ្សាយ ពាក់ព័ន្ធបញ្ហាការប្រែប្រួលអាកាសធាតុ។
កិច្ចប្រជុំនេះ ក្រោមអធិបតីភាព លោក ង៉ាន់ ភិរុណ អភិបាលរងខេត្តសៀមរាប និងជាអនុប្រធានគណ:កម្មាធិការសម្របសម្រួលបច្ចេកទេសក្រុមប្រឹក្សាខេត្ត និងមានការចូលរួមពី ឯកឧត្តម សមាជិកក្រុមប្រឹក្សាខេត្ត តំណាងអាជ្ញាធរជាតិអប្សរា និងវត្តមានលោកនាយករងរដ្ឋបាលសាលាខេត្ត លោក លោកស្រីនាយកនាយករងទីចាត់ការសាលាខេត្ត អភិបាលអភិបាល អភិបាលរង ក្រុង- ស្រុក ប្រធាន អនុប្រធានមន្ទីរ អង្គភាពជុំវិញខេត្តផងដែរ ។
កិច្ចប្រជុំ គសប នេះបានលើកយករបៀបវារ:ចំនួន៣ មកពិនិត្យ និងពិភាក្សារួមមាន៖ ១ – ពិនិត្យ និងធ្វើបច្ចុប្បន្នភាព នៃការដោះស្រាយលើសំនួរ សំណូមពរ ដែលបានលើកឡើងក្នុងវេទិកាផ្សព្វផ្សាយពិគ្រោះយោបល់របស់ក្រុមប្រឹក្សាខេត្តអាណត្តិទី២ ឆ្នាំ២០១៧និង២០១៨។ ២ – ផ្សព្វផ្សាយសារាចរណែនាំរបស់រាជរដ្ឋាភិបាលកម្ពុជា ស្ដីពីវិធានការរក្សាទឹកទុក និងត្រៀមបម្រុងឆ្លើយតបការខ្វះខាតទឹកប្រើប្រាស់ដោយសារការប្រែប្រួលអាកាសធាតុ ។ ៣ – បញ្ហាផ្សេងៗ ។
លោកអភិបាលរងខេត្ត បានបង្ហាញថា ពាក់ព័ន្ធនឹង ការផ្សព្វផ្សាយសារាចរណែនាំរបស់រាជរដ្ឋាភិបាលកម្ពុជា ស្ដីពីវិធានការរក្សាទឹកទុក និងត្រៀមបម្រុងឆ្លើយតបការខ្វះខាតទឹកប្រើប្រាស់ដោយសារការប្រែប្រួលអាកាសធាតុ អាជ្ញាធរស្រុក និងស្ថាប័នពាក់ព័ន្ធទាំងអស់ ត្រូវធ្វើយ៉ាងណាផ្សព្វផ្សាយឲ្យបានទូលំទូលាយ ជូនប្រជាពលរដ្ឋតាមមូលដ្ឋានបានដឹង។ នៅតាមបណ្ដាស្រុក និងមូលដ្ឋាននិមួយៗ ត្រូវក្ដាប់ឲ្យជាប់ពីបញ្ហាប្រឈមនូវកង្វះទឹកប្រើប្រាស់របស់ ប្រជាពលរដ្ឋ និងណែនាំពីវិធានការ រក្សាទឹកទុកឲ្យបានត្រឹមត្រូវ។
សូមជម្រាបជូនថា គណ:កម្មាធិការសម្របសម្រួលបច្ចេកទេសរបស់ក្រុមប្រឹក្សាខេត្តសៀមរាប មានរបៀបវារ:ប្រជុំក្នុងរយ:ពេល២ខែម្ដង ដើម្បីលើកយកបញ្ហានានាទាំងវិជ្ជមាន និងអវិជ្ជមាន របស់រដ្ឋបាលខេត្ត រដ្ឋបាលក្រុង ស្រុក មន្ទីរ អង្គភាពជុំវិញខេត្ត និងអង្គភាពដែលពាក់ព័ន្ធមួយចំនួនទៀត ធ្វើការពិភាក្សា និងដោះស្រាយ ៕
អត្ថបទ និង រូបភាព ៖ លោក បូ សាវី
កែសម្រួលអត្ថបទ ៖ លោក សេង ផល្លី
