កាលពីថ្ងៃទី២៧ ខែវិច្ឆិកា ឆ្នាំ២០១៩នេះ ប្រតិភូសមាជិក បណ្ឌិត សភា វិទ្យាសាស្ត្រសង្គមនិងបច្ចេកវិទ្យានៃប្រទេសវៀតណាម ដឹកនាំដោលលោក NGUYEN GIANG HAI បានចូលរួមធ្វើបាឋកថាស្ដីពី«វិស័យស្រាវជ្រាវបុរាណវិទ្យានិងការរកឃើញថ្មីៗនៅប្រទេសវៀតណាម»ព្រមទាំងបានចែករំលែកចំណេះដឹងទាក់ទងនឹងវិស័យបុរាណវិទ្យាដល់ មន្ត្រី បុគ្គលិក និងសាធារណជនដែលសរុបប្រមាណ៥០នាក់នៅអាជ្ញាធរជាតិអប្សរា ។
ក្នុងបាឋកថានោះ លោក NGUYEN GIANG HAI បានបែងចែកជា៧ផ្នែកផ្សេងៗគ្នា នៃការស្រាវជ្រាវថ្មីៗរបស់វៀតណាម ចាប់ពីសម័យបុរេប្រវត្តិ , ការរកឃើញនូវស្ថានីយ៍បុរេប្រវត្តិដែលចំណាស់ជាងគេនៅតំបន់អាស៊ី ដែលមានអាយុរហូតដល់ជិត១លានឆ្នាំនៅតំបន់ AnKe ជិតខេត្តរតនគិរី ដែលជាស្ថានីយ៍យុគថ្មចាស់ដំបូងគេ , បង្ហាញពីការរកឃើញឧបករណ៍តន្ដ្រីដែលធ្វើពីថ្ម និងស្រាវជ្រាវបុរាណវិទ្យាក្រោមទឹក ក៏ដូចជាការស្រាវជ្រាវ DNA ជាដើម។
លោក NGUYEN GIANG HAI បានបញ្ជាក់បន្ថែមថា ការស្រាវជ្រាវទាំងនោះមានទាំងគម្រោងរបស់ជាតិ និងគម្រោងសហប្រតិបត្តិការជាមួយអន្ដរជាតិ ដែលផ្នែកបុរេប្រវត្តិសហការជាមួយប្រទេសរុស្ស៊ី ផ្នែកខ្លះជាមួយចិន និងផ្នែកប្រវត្តិសាស្ដ្រសហការជាមួយប្រទេសនៅអាស៊ីអាគ្នេយ៍មាន កម្ពុជា ឡាវ និងថៃ ខណៈកិច្ចសហការជាមួយកម្ពុជា ចាប់ផ្តើមពីឆ្នាំ២០០៧មក គឺតែងតែមានការផ្លាស់ប្ដូរបទពិសោធន៍គ្នាទៅវិញទៅមក លើវិស័យបុរាណវិទ្យា ។
លោក អ៊ឹម សុខរិទ្ធី អនុប្រធានមជ្ឈមណ្ឌលអន្ដរជាតិ ស្រាវជ្រាវ និងតម្កល់ឯកសារអង្គរ ដែលជាស្ថាប័នធ្វើការជាមួយបណ្ឌិត សភា វិទ្យា សាស្ត្រសង្គមនិងបច្ចេកវិទ្យានៃប្រទេសវៀតណាម បានឱ្យដឹងថា ភាគីទាំងពីរបានធ្វើការជាមួយគ្នាច្រើនឆ្នាំមកហើយ និងបានចែករំលែកការងារជាច្រើនជាមួយគ្នា ខណៈពេលនេះ គណៈប្រតិភូវៀតណាម បានចុះមកស្វែងយល់ពីកិច្ចការមួយចំនួន ដើម្បីបន្តកិច្ចសហការជាមួយគ្នានាពេលអនាគត ៕
អត្ថបទ និង រូបភាព ៖ នាយកដ្ឋានផ្សព្វផ្សាយ នៃអាជ្ញាធរជាតិអប្សរា
កែសម្រួលអត្ថបទ ៖ លោក លីវ សាន្ត
