នៅថ្ងៃទី១០ ខែធ្នូ ឆ្នាំ២០១៩ម្សិលមិញនេះ លោកជំទាវ អ៊ឹង កន្ថាផាវី រដ្ឋមន្រ្តីក្រសួងកិច្ចការនារី បានដំណើរទស្សនកិច្ចស្វែងយល់អំពីស្រ្តីក្នុងសហគមន៍ទេសចរណ៍ ក្នុងខេត្តសៀមរាប រយៈពេលពេញ១ថ្ងៃ ដោយផ្ដោតទៅលើការរស់នៅ បណ្ដុះបណ្ដាលវិជ្ជាជីវៈ និងការប្រកបរបររបស់ស្រ្តីក្នុងវិស័យទេសចរណ៍។
ក្នុងដំណើរទស្សនកិច្ចស្វែងយល់អំពីស្រ្តីក្នុងសហគមន៍ទេសចរណ៍ ក្នុងឱកាសនោះ ក៏មានការអញ្ជើញចូលរួមពី លោកជំទាវ ហ៊ុន ដានី រដ្ឋលេខាធិការក្រសួងទេសចរណ៍ លោកស្រី យូ សុភា អភិបាលរងខេត្តសៀមរាប លោកជំទាវប្រធានសមាគមទីភ្នាក់ងារទេសចរណ៍កម្ពុជា និងប្រតិភូស្រ្តីជាច្រើនរូបទៀតផងដែរ។
ដំណើរទស្សនកិច្ចនេះ លោកជំទាវ រដ្ឋមន្រ្តីក្រសួងកិច្ចការនារី បានចុះទៅដល់ទីតាំងចំនួន ៤ រួមមាន សិប្បកម្មកែច្នៃកំប្លោក ភ្នំក្រោម ស្ថិតក្នុងសង្កាត់សៀមរាប ក្រុងសៀមរាប សិប្បកម្មផលិតសូត្រ ស៊ីលហ្វាម ស្ថិតនៅក្នុងឃុំពួក ស្រុកពួក សហគមន៍ទេសចរណ៍កំពង់ភ្លុក ស្ថិតនៅក្នុងឃុំកំពង់ភ្លុក ស្រុកសូទ្រនិគម និងសាលាបណ្ដុះបណ្ដាលវិជ្ជាជីវៈសណ្ឋាគារ និងភោជនីយដ្ឋាន សាលាបាយ ស្ថិតនៅក្នុងសង្កាត់សាលាកំរើក ក្រុងសៀមរាប។
ក្នុងដំណើរនោះ លោកជំទាវរដ្ឋមន្រ្តី បានវាយតម្លៃខ្ពស់ ចំពោះសាលាបាយ និងមានចំណាប់អារម្មណ៍ ថា សាលាបណ្ដុះបណ្ដាលវិជ្ជាជីវៈសណ្ឋាគារ និងភោជនីយដ្ឋាន មួយនេះ បានបានផ្ដោតសំខាន់ទៅលើយុវជនក្រីក្រ ខ្វះខាតជីវភាព ក្នុងការសិក្សាជំនាញ ជាពិសេសផ្ដល់អាទិភាព៧០ភាគរយ ដល់នារី ឲ្យបានទទួលការបណ្ដុះបណ្ដាល។ លើសពីនោះ សាលាបាយ ក្រៅពី បណ្តុះបណ្តាលជំនាញដល់សិស្សដោយឥតគិតថ្លៃ សាលានេះ ថែមទាំងបានធានាផ្គត់ផ្គង់ជីវភាពប្រចាំ ដោយផ្ដល់ប្រាក់ប្រចាំខែដល់សិស្ស និង អន្តេរវិសិកដ្ឋាន សម្រាប់សិស្សស្នាក់នៅផងដែរ។
លោក រីណៅ ហ្វីចិត (Renaud Fichet) នាយកគ្រប់គ្រង សាលាបាយ បានជម្រាបជូនលោកជំទាវរដ្ឋមន្រ្តី ថា បេសកកម្មនិងចក្ខុវិស័យ សាលាបាយ គឺធ្វើយ៉ាងណាប្រមូលយុវជន-យុវនារីរស់នៅមូលដ្ឋានជនបទ និង នៅក្នុងគ្រួសារក្រីក្រ ឲ្យមកទទួលយកនូវការបណ្តុះបណ្តាលជំនាញជាក់លាក់មួយ ដើម្បីជាទុនសម្រាប់អនាគតរបស់ពួកគេ
ជាពិសេសអាជីពក្នុងវិស័យបដិសណ្ឋារកិច្ចនិងទេសចរណ៍ ដែលជំនាញច្បាស់លាស់ទាំងនេះ អាចជួយទ្រទ្រង់ជីវភាពគ្រួសារ ហើយចៀសពីការធ្វើចំណាកស្រុក ទៅរកការងារធ្វើនៅក្រៅប្រទេសដោយខុសច្បាប់ ។
លោកនាយក បានបញ្ជាក់ថា កាលពីប៉ុន្មានឆ្នាំមុន សាលាបាយ មានផែនការជ្រើសរើសសិស្សក្រីក្រក្នុង១ឆ្នាំ តែចំនួន១០០នាក់ប៉ុណ្ណោះ តែក្រោយមកទៀត ដោយសារទីតាំងសាលាត្រូវបានពង្រីក សាលាបានបន្ថែមការជ្រើសរើសរហូតដល់១៥០នាក់ ក្នុង១ឆ្នាំ។ ទន្ទឹមនោះ ក្នុងរយៈពេលនៃការសិក្សាពេញមួយឆ្នាំនេះ សាលាធានាការចំណាយនិងផ្គត់ផ្គង់ដល់សិស្ស គិតជាមធ្យមក្នុងសិស្សម្នាក់ ប្រហែលជា ៤,៣០០ដុល្លារ ។
គួរបញ្ជាក់ថា សាលាបាយ បង្កើតឡើងនៅក្នុងឆ្នាំ១៩៩៨ ដោយអង្គការបារាំងដើម្បីជួយកម្ពុជា ( Agir Pour le Cambodge ) និងចាប់ផ្តើមដំណើរការបណ្តុះបណ្តាលសិស្សនៅក្នុងឆ្នាំ ២០០២ លើមុខជំនាញចំនួន៥ គឺ ជំនាញការិយាល័យជួរមុខ គេហកិច្ច ចុងភៅ សេវាកម្មម្ហូបអាហារនិងភេសជ្ជៈ និងថែទាំសម្ផស្ស និងទទួលសិស្សចាប់ពីអាយុ១៧ ដល់២៣ឆ្នាំ។
អត្ថបទ និង រូបភាព៖ ងិន គឺមឡេង
កែសម្រួលអត្ថបទ៖ សេង ផល្លី
