នារសៀលថ្ងៃទី១០ខែធ្នូឆ្នាំ២០១៩ រោងចក្រប្រព្រឹត្តកម្មទឹកស្អាត ទឹកវិលទី២ របស់រដ្ឋាករទឹកស្វយ័តសៀមរាប ស្ថិតនៅសង្កាត់ទឹកវិល ក្រុងសៀមរាប ត្រូវបានសម្ពោធដាក់ឲ្យប្រើប្រាស់ជាផ្លូវការ ក្រោមអធិបតីភាព ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម លោកជំទាវ អេវ៉ា ង្វៀនប៊ិញ ឯកអគ្គរដ្ឋទូតសាធារណរដ្ឋបារាំង ប្រចាំនៅកម្ពុជា និងឯកឧត្តម ទៀ សីហា អភិបាលនៃគណៈអភិបាលខេត្តសៀមរាប។
រោងចក្រប្រព្រឹត្តកម្មទឹកស្អាត ទឹកវិលទី២នេះ ចាប់ផ្ដើមសាងសង់នៅថ្ងៃទី១៩ ខែធ្នូ ឆ្នាំ២០១៧ ប្រើរយៈពេលចំនួន២ឆ្នាំ និងប្រើថវិកាអស់១២,៧៧៨,០៣៩ដុល្លាអាមេរិក គ្របដណ្តប់លើការសាងសង់រោងចក្រប្រព្រឹត្តកម្មទឹកស្អាត និងដំឡើងបំពង់មេនាំទឹក សេវាទីប្រឹក្សានិងសេវាសវនកម្មគម្រោង និងស្ថិតក្រោមក្របខណ្ឌឥណទានពីទីភ្នាក់ងារបារាំងសម្រាប់កាតអភិវឌ្ឍ ហៅកាត់ថា AFD។
ព័ត៌មានជាតិ ថ្មីៗ
តាមការឲ្យដឹងពី ឯកឧត្តម ទៀ សីហា ក្នុងពិធីនោះ បច្ចុប្បន្ននេះតម្រូវការប្រើប្រាស់ទឹកស្អាតក្នុងក្រុងសៀមរាប ជាមធ្យមប្រមាណ ៦ម៉ឺនម៉ែត្រត្រីគុណក្នុង១ថ្ងៃ ខណៈពេលដែលរដ្ឋាករទឹកស្វយ័តសៀមរាប មានសមត្ថភាពផ្គត់ផ្គង់ទឹកស្អាតត្រឹមតែ ៣ម៉ឺនម៉ែត្រត្រីគុណក្នុង១ថ្ងៃ រួមទាំងរោងចក្រប្រព្រឹត្តកម្មទឹកស្អាតទឹកវិល២នេះប៉ុណ្ណោះ។
មានប្រសាសន៍ក្នុងឱកាសនោះ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ បានលើកឡើងថា តម្រូវការទឹក គឺជាតម្រូវការមូលដ្ឋានប្រចាំថ្ងៃក្នុងជីវភាពរបស់យើងទាំងអស់គ្នា និងជាសិទ្ឋ ទទួលបានក្នុងការរស់នៅ ព្រមទាំងសម្រាប់កិច្ចអភិវឌ្ឍសេដ្ឋកិច្ចជាតិផង។ ហេតុនេះ ការងារផ្គត់ផ្គង់ទឹកស្អាត គឺជាកិច្ចការចម្បងមួយ សំដៅបំពេញតម្រូវការទាំងនេះ ស្របទៅនឹងការរីកចម្រើននៃសេដ្ឋកិច្ចជាតិ។
ឯកឧត្តម បានបញ្ជាក់ថា នៅក្នុងនីតិកាលទី៦នេះ រាជរដ្ឋាភិបាលបានបន្តផ្តោតការយកចិត្តទុកដាក់លើវិស័យអាទិភាពទី៤ គឺ “មនុស្ស និងទឹក “ ហើយបានកំណត់គោលនយោបាយលើវិស័យទឹកស្អាត ដោយពង្រីកវិសាលភាពនៃការផ្គត់ផ្គងទឹកស្អាតនៅទីក្រុង ទីប្រជុំជនឱ្យបាន៩០ភាគរយ នៅឆ្នាំ២០២៣ និង១០០ភាគរយ ត្រឹមឆ្នាំ២០២៥ សម្រាប់តម្រូវការចាំបាច់របស់ប្រជាជន ក៏ដូចជាសម្រាប់ផលិតកម្ម និងសេវាកម្មនានា។
ឯកឧត្តមរដ្ឋមន្ត្រី ក៏បានអំពាវនាវដល់ប្រជាពលរដ្ឋក្នុងនៅក្រុងសៀមរាប ពិសេសអ្នកប្រកបរបរអាជីវកម្មផ្ទះសំណាក់ សណ្ឋាគារ សូមបង្វែរការប្រើប្រាស់ទឹកអណ្តូងក្រោមដី មកប្រើប្រាស់ទឹកស្អាត តាមបំពង់ចែកចាយរបស់រដ្ឋាករទឹកស្វយ័តសៀមរាបវិញ ប្រសិនបើតំបន់ទាំងនោះ បានដាក់បណ្តាញទឹកស្អាតចូលទៅដល់ហើយនោះ។
សូមជម្រាបថា រោងចក្រប្រព្រឹត្តកម្មទឹកស្អាត ក្នុងក្រុងសៀមរាបមានចំនួន២ទីតាំង ស្ថិតនៅក្នុងសង្កាត់ទឹកវិល ក្រុងសៀមរាប។
អត្ថបទ និង រូបភាព៖ យូ វង្ស
កែសម្រួលអត្ថបទ៖ សេង ផល្លី
