ធនធានជលផលតាមវាលស្រែ រួមមានក្ដាម ត្រី កង្កែប ជាដើម គឺជាប្រភពចំណីអាហារ ដែលប្រជាកសិករបានអាស្រ័យផល ស្ថិតនៅក្នុងកម្រិតទី២បន្ទាប់ពីស្រូវ ដូច្នេះ អាជ្ញាធរមូលដ្ឋាន មន្រ្តីជំនាញ និងអង្គការដៃគូត្រូវរួមគ្នា ជំរុញដល់ពលរដ្ឋក្នុងមូលដ្ឋាន ថែរក្សាធនធានជលផលតាមវាលស្រែឱ្យបានកាន់តែមានប្រសិទ្ធភាព។
នេះបើតាមប្រសាសន៍ លោក ង៉ាន់ ភិរុណ អភិបាលរងខេត្តសៀមរាប បានថ្លែងនៅក្នុងសិក្ខាសាលាឆ្លុះបញ្ជាំងស្ដីពីការអនុវត្តន៍ផែនការគ្រប់គ្រងប្រព័ន្ធជលផលតាមវាលស្រែ នៅព្រឹកថ្ងៃទី ១១ខែ ធ្នូ ឆ្នាំ២០១៩នេះ។
លោកអភិបាលរងខេត្ត បានបញ្ជាក់ថា ការបង្កើនធនធានជលផលតាមវាលស្រែ តាមរយៈការពង្រឹង និងពង្រីកសហគមន៍ស្រះជម្រកត្រី គឺកត្តាមួយដ៏ចាំបាច់ ក្នុងការចូលរួមចំណែក ការអនុវត្តគោលនយោបាយរដ្ឋបាលជលផលថ្នាក់ជាតិ របស់ក្រសួងកសិកម្ម រុក្ខាប្រមាញ់ និងនេសាទ នាពេលបច្ចុប្បន្ននេះ។ សម្រាប់ខេត្តសៀមរាប គោលនយោបាយថ្នាក់ជាតិនេះ បានកំណត់ឱ្យរៀបចំបង្កើតសហគមន៍ស្រះជម្រកត្រីឱ្យបានចំនួនបាន ១២០០ សហគមន៍ ក្នុងឆ្នាំ២០១៩ និងរំពឹងថា នឹងកើនធនធានជលផលរហូតដល់៥០ម៉ឺនតោន នៅក្នុងឆ្នាំ២០១៩នេះ ។
ព័ត៌មានជាតិ ថ្មីៗ
លោកអភិបាលរងខេត្ត បានបញ្ជាក់បន្ថែមថា ការបង្កើនចំនួនស្រះសហគមន៍នេះ នឹងរួមចំណែកលើកកម្ពស់ជីវភាព ប្រជាជន នៅតាមសហគមន៍ជនបទ ជុំវិញបឹងទន្លេសាប ជាពិសេសក្នុងខេត្តសៀមរាប។ លើសពីនេះទៀត គម្រោងនេះ នឹងផ្តល់នូវចំណេះដឹងបន្ថែមក្នុងការដាំដុះដំណាំរួមផ្សំ និងអនាម័យទៅដល់ប្រជាជនក្នុងសហគមន៍គោលដៅផងដែរ។
លោកស្រី ចេប ម៉ាលីបុប្ផា ប្រធានកម្មវិធីនៃអង្គការអ្នកត្រួសត្រាយកម្ពុជា បានថ្លែងថា ជាការពិតណាស់ធនធានជលផលតាមវាលស្រែ គឺពិតជាបានផ្តល់ផលប្រយោជន៍យ៉ាងច្រើនដល់ពលរដ្ឋកម្ពុជា ហើយការជួបជុំសហគមន៍នៅថ្ងៃនេះ គឺមានសារៈសំខាន់ណាស់ក្នុងការបង្កើនការយល់ដឹងអំពីធនធានជលផល និងការគ្រប់គ្រងធនធានជលផលតាមវាលស្រែ ដល់សហគមន៍ អាជ្ញាធរមូលដ្ឋាន ជាពិសេសដើម្បីបន្តកិច្ចសហប្រតិបត្តិការណ៍ រវាងស្ថាប័នជំនាញ និងស្ថាប័នរាជរដ្ឋាភិបាល ដែលបានកំពុង នឹងធ្វើការពាក់ព័ន្ធវិស័យជលផលនៅក្នុងប្រទេសកម្ពុជា។
លោកស្រីបានបញ្ជាក់ថា បច្ចុប្បន្ននេះ នៅខេត្តសៀមរាប គម្រោងនេះបានកំពុងគាំទ្រទៅលើសហគមន៍ស្រះជម្រកត្រីចំនួន៤៤ សហគមន៍ នៅក្នុងឃុំចំនួន២៧ ដែលស្ថិតនៅក្នុងស្រុកចំនួន៧ គឺស្រុក ជីក្រែង សូទ្រនិគម អង្គរធំ អង្គរជុំ ពួក ក្រឡាញ់ និងស្រុកស្រីស្នំ។ គម្រោងនេះដែរ ក៏មានគោលបំណង ចងក្រងនូវវិធីសាស្រ្តសមស្រប ក្នុងការគ្រប់គ្រងសហគមន៍ស្រះជម្រកត្រី ដើម្បីយកទៅអនុវត្តបន្តនូវបរិស្ថានធនធានជលផលតាមវាលស្រែដទៃទៀត៕
អត្ថបទ និង រូបភាព៖ ឃុត សៅ
កែសម្រួលអត្ថបទ៖ សេង ផល្លី
