រសៀលថ្ងៃទី១១ ខែធ្នូ២០១៩នេះ កិច្ចប្រជុំពេញអង្គលើកទី២៦ របស់គណៈកម្មាធិការអន្ដរជាតិអាយស៊ីស៊ី-អង្គរ បានចុះកិច្ចព្រមព្រៀង ស្ដីពីគម្រោងប្រព័ន្ធស្វ័យប្រវត្តិជំនួយឱ្យការគ្រប់គ្រងទឹកក្នុងតំបន់សៀមរាប-អង្គរ ហៅកាត់ថា SDGERA ដើម្បីកាត់បន្ថយទឹកជំនន់ក្នុងរដូវវស្សា ក្នុងតំបន់ប្រាសាទបុរាណ និងភូមិដ្ឋានក្នុងខេត្តសៀមរាប។
យោងតាមសេចក្ដីប្រកាសព័ត៌មាន នៅលើហ្វេសប៊ុកផ្លូវការ របស់អាជ្ញាធរជាតិអប្សរា SDGERA គឺជាកិច្ចសហការរវាងអាជ្ញាធរជាតិអប្សរា ជាមួយភាគីបារាំង មានគោលបំណងចម្បង ឲ្យការគ្រប់គ្រងប្រព័ន្ធលំហូរទឹក ក្នុងផ្ទៃអាងរងទឹកភ្លៀង តំបន់សៀមរាប កាន់តែមានប្រសិទ្ធភាព កាត់បន្ថយទឹកជំនន់ ក្នុងតំបន់រមណីយដ្ឋានអង្គរ ដែលជាបេតិកភណ្ឌពិភពលោករបស់អង្គការយូណេស្កូ។
ក្នុងនោះគម្រោងនេះ ក៏នឹងធ្វើការគ្រប់គ្រងធនធានទឹក នៅក្នុងរដូវប្រាំង សម្រាប់កសិករ ក្រុងសៀមរាប និងការអភិរក្សប្រាង្គប្រាសាទ។ លើសពីនេះ គម្រោង SDGERA នេះ នឹងឈានដល់ការគ្រប់គ្រងបរិស្ថាន និងសុខុមាលភាពសាធារណៈ ដូចជាការគ្រប់គ្រងទឹកស្អាត ទឹកកខ្វក់ ថាមពល សំរាម និងកសិកម្មដោយចីរភាព សម្រាប់ប្រជាពលរដ្ឋដែលរស់នៅក្នុងតំបន់អង្គរ និងតំបន់ពាក់ព័ន្ធ។
សេចក្ដីប្រកាសព័ត៌មានដដែលនេះ បានឲ្យដឹងទៀតថា គម្រោងនេះមានគោលដៅបំពាក់ឧបករណ៍បិទបើកដោយប្រើប្រាស់ម៉ាស៊ីនស្វ័យប្រវត្តិ ដើម្បីធានាការគ្រប់គ្រងធនធានធម្មជាតិក្នុងតំបន់អង្គរដោយចីរភាព។
គួរជម្រាបថា កាលពីដើមខែធ្នូ ឆ្នាំ២០១៣ ជំហានទី១ នៃគម្រោងប្រព័ន្ធស្វ័យប្រវត្តិជំនួយឱ្យការគ្រប់គ្រងទឹកក្នុងតំបន់សៀមរាប-អង្គរនេះ ធ្វើឡើងរួចម្ដងមកហើយ សម្រាប់រយៈពេល៥ឆ្នាំ គឺឆ្នាំ២០១៤-២០១៨ ដោយផ្តោតអំពីគម្រោងសុវុឌ្ឍិកម្ម នៃការសម្អាត និងការគ្រប់គ្រងទឹកក្នុងតំបន់អង្គរ៕
អត្ថបទ និង រូបភាព៖ បូ សាវី
កែសម្រួលអត្ថបទ៖ សេង ផល្លី
