នាព្រឹកថ្ងៃទី១២ ខែធ្នូ ឆ្នាំ២០១៩នេះ ឯកឧត្តម ទៀ សីហា អភិបាលនៃគណះអភិបាលខេត្តសៀមរាប បានអញ្ជើញជួបពិភាក្សាការងារជាមួយគណៈប្រតិភូក្រុមហ៊ុន Beijing Jingneng Power Co.,Ltd វិនិយោគរោងចក្រផលិតថាមពលអគ្គិសនី ដោយមានការអញ្ជើញចូលរួមពីសំណាក់លោក ង៉ាន់ ភិរុណ អភិបាលរងខេត្ត នាយករងរដ្ឋបាលសាលាខេត្ត នាយកទីចាត់ការអន្តរវិស័យសាលាខេត្ត នាយកទីចាត់ទំនាក់ទំនងសាធារណ: និងសហប្រតិបត្តិការអន្តរជាតិសាលាខេត្ត តំណាងទីចាត់ការផែនការ និងវិនិយោគសាលាខេត្ត ប្រធានមន្ទីរបរិស្ថានខេត្ត តំណាងមន្ទីររ៉ែ និងថាមពលខេត្ត និងមន្រ្តីជំនាញពាក់ព័ន្ធនានាផងដែរ ។
ក្នុងកិច្ចពិភាក្សាការងារនោះដែរ គណៈប្រតិភូក្រុមហ៊ុន Beijing Jingneng Power Co.,Ltd វិនិយោគរោងចក្រផលិតថាមពលអគ្គិសនី បានធ្វើការស្នើសុំអោយរដ្ឋបាលខេត្តសៀមរាប ជួយរកដី ឬ ជួលដី ដែលមានតម្លៃទាប ប្រសិនបើក្រុមហ៊ុនទិញ ឬ ជួលដី ដែលមានតម្លៃថ្លៃពេក ក្រុមហ៊ុនក៏លក់អគ្គិសនីក្នុងតម្លៃថ្លៃដែរ ហើយនឹងត្រូវវិនិយោគរយៈពេលយូរទើបក្រុមហ៊ុនអាចទទួលបានផលចំណេញ ជួយគាំទ្រគម្រោងរបស់ក្រុមហ៊ុន និងជួយសម្របសម្រួលបន្ធូរបន្ថយពន្ធ និងជួយទិញអគ្គិសនីពេលក្រុមហ៊ុនផលិតបាន ។
មានប្រសាសន៍ក្នុងឱកាសនោះដែរ ឯកឧត្តមទៀ សីហា បានមានប្រសាសន៍ទៀតថា នៅខេត្តសៀមរាប ការប្រើប្រាស់អគ្គិសនី បានគ្របដណ្តប់ប្រហែល ៨០% ដែលមានបណ្តាញខ្សែមកពីប្រទេសថៃចំនួន ១១៥ មេកាវ៉ាត់ និងមកពីវារីអគ្គិសនីខេត្តពោធិ៍សាត់ទំហំ ២៣០ មេកាវ៉ាត់ ហើយនឹងមានថាមពលអគ្គិសនីមកពីសេសានទំហំ ៤០០ មេកាវ៉ាត់ ក្នុងពេលខាងមុខ ។ ហើយទោះបីជាយ៉ាងនេះក្តី ការប្រើប្រាស់អគ្គិសនីនាពេលបច្ចុប្បន្ន មានការខ្វះខាតដោយតម្រូវការនៃការប្រើប្រាស់អគ្គីសនីមានការកើនឡើងជារៀងរាល់ឆ្នាំ ។
ឯកឧត្តម អភិបាលខេត្ត ប្រសាសន៍ទៀតថា ជាការឆ្លើយតបនឹងការស្នើសុំខាងលើនេះ ឯកឧត្តម ក៏ដូចជាអាជ្ញាធរខេត្ត បានគាំទ្រលើគម្រោងវិនិយោគបង្កើតរោងចក្រផលិតអគ្គិសនី ចំពោះក្រុមហ៊ុន ដែលមិនធ្វើឱ្យប៉ះពាល់បរិស្ថាននៅក្នុងខេត្តសៀមរាប ហើយឯកឧត្តម ក៏ដូចជាអាជ្ញាធរខេត្តនឹងជួយសម្របសម្រួលនីតិវិធីច្បាប់នៅពេលដែលក្រុមហ៊ុនទទួលបានការអនុញ្ញាតលើគម្រោងវិនិយោគពីក្រុមប្រឹក្សាអភិវឌ្ឍន៍កម្ពុជា និងទទួលបានគោលការណ៍ពីរាជរដ្ឋាភិបាល ហើយរដ្ឋបាលខេត្តនឹងចុះអនុស្សារណៈជាមួយក្រុមហ៊ុននៅពេលទទួលបានសិទ្ធិពីថ្នាក់ជាតិ ៕
អត្តបទនិងរូបភាព៖រដ្ឋបាលខេត្តសៀរាប
