សេតវិមានបានយល់ព្រមផ្អាក ក៏ដូចជាកាត់បន្ថយការដំឡើងពន្ធលើទំនិញមួយចំនួនរបស់ចិន ជាថ្នូរនឹងការសន្យាថា ចិននឹងបង្កើនការទិញផលិតផលកសិកម្មរបស់អាមេរិក ចាប់ពីឆ្នាំ២០២០។ នេះបើតាមការដកស្រង់ការផ្សាយពីសារព័ត៌មាន CNA នៅព្រឹកថ្ងៃសុក្រ ទី១៣ ខែធ្នូ ឆ្នាំ២០១៩។
យោងតាមប្រភពដែលបានដឹងលឺ អំពីស្ថានភាពនៃកិច្ចចរចាពាណិជ្ជកម្ម រវាងទីក្រុងវ៉ាស៊ីនតោន និងទីក្រុងប៉េកាំង សហរដ្ឋអាមេរិកនឹងផ្អាកគម្រោងយកពន្ធលើទំនិញចិនទំហំ ១៦០ពាន់លានដុល្លារ ដែលត្រូវគេរំពឹងថា នឹងចាប់ផ្តើមអនុវត្តនៅថ្ងៃទី១៥ ខែធ្នូ ហើយកាត់បន្ថយការដំឡើងពន្ធ ដែលត្រូវបានដាក់ចេញនាពេលកន្លងមក។
ប្រភពដដែលបានបញ្ជាក់ថា ខាងអាមេរិកត្រូវបានស្នើឲ្យកាត់បន្ថយពាក់កណ្តាល នូវការដំឡើងពន្ធលើទំនិញចិន ព្រមទាំងផ្អាកគម្រោងដំឡើងពន្ធថ្មីថែមទៀត ដែលនឹងត្រូវអនុវត្តនៅថ្ងៃអាទិត្យសប្តាហ៍នេះ ដើម្បីព្យាយាមឆ្ពោះទៅរកការសម្រេចកិច្ចព្រមព្រៀងដំណាក់កាលទីមួយ ដែលត្រូវបានសន្យាកាលពីខែតុលា រវាងមន្ត្រីតំណាងជាន់ខ្ពស់នៃភាគីទាំងសងខាង។
គួរជម្រាបថា ជាការតបស្នងត្រឡប់មកកាន់ទីក្រុងវ៉ាស៊ីនតោនវិញនោះ ចិនបានយល់ព្រមទិញផលិតផលកសិកម្មអាមេរិកក្នុងទំហំ ៥០ពាន់លានដុល្លារដែលធ្វើឡើងនៅឆ្នាំ២០២០ ដែលនេះជាចំនួនពីរដងច្រើនជាងឆ្នាំ២០១៧ មុនពេលសង្រ្គាមពាណិជ្ជកម្មផ្ទុះឡើង។
