នៅរសៀលថ្ងៃទី១៣ ខែធ្នូ ឆ្នាំ២០១៩នេះ លោក នាក់ ណេរ៉ុន អភិបាលរងខេត្ដសៀមរាប តំណាងឯកឧត្តម ទៀ សីហា អភិបាលខេត្តសៀមរាប បានទទួលជួប ប្រតិភូទីភ្នាក់ងារសារព័ត៌មាន នៃសាធារណរដ្ឋសង្គមនិយមវៀតណាម ហៅកាត់ថា VNA ដើម្បីបង្កើនកិច្ចសហប្រតិបត្តិការណ៍លើការផ្សព្វផ្សាយព័ត៌មាន ជាពិសេសតំបន់ទេសចរណ៍ក្នុងខេត្តសៀមរាប ទៅកាន់ប្រទេសវៀតណាម។
មានប្រសាសន៍ក្នុងឱកាសនោះ លោក នាក់ ណេរ៉ុន បានជម្រាបដល់ប្រតិភូVNA ថា នាប៉ុន្មានចុងឆ្នាំចុងក្រោយនេះ ភ្ញៀវទេសចរវៀតណាម បានឈរនៅចំណាត់ថ្នាក់ទី២ បន្ទាប់ពីភ្ញៀវទេសចរចិន ដែលបានជួយជំរុញដល់កំណើនភ្ញៀវទេសចរណ៍អន្តរជាតិសម្រាប់ប្រទេសកម្ពុជា ក៏ដូចជាខេត្តសៀមរាបផងដែរ។ ក្រៅពីទេសចរណ៍ ប្រទេសវៀតណាមក៏បានជួយដល់កម្ពុជា លើវិស័យសំខាន់ៗជាច្រើន ដែលនេះបានបង្ហាញអំពី ចំណងមិត្តភាព សាមគ្គីភាព និងកិច្ចសហប្រតិបត្តិការ យ៉ាងរឹងមាំ រវាងប្រជាជន និងប្រទេសទាំងពីរ។
មានចំណាប់អារម្មណ៍ក្នុងឱកាសនោះ លោក ឡឺ កុកមីញ អគ្គនាយករងទីភ្នាក់ងារសារព័ត៌មានវៀតណាម និងជាប្រធានប្រតិភូ បានមើលឃើញពីភាពរីកចម្រើន និងសោភណ្ឌភាពក្នុងខេត្តសៀមរាបប្រកបដោយភាពស្រស់បំព្រង។ ក្នុងដំណើរទស្សនកិច្ចក្នុងខេត្តសៀមរាបក្នុងឱកាសនេះ លោកក៏មានបំណងធ្វើកិច្ចសហប្រតិបត្តិការលើវិស័យព័ត៌មានរវាងទីភា្នក់ងារ VNA និងរដ្ឋបាលខេត្តសៀមរាបដោយផ្ទាល់ផងដែរ។ ដោយកិច្ចការនេះ នឹងធ្វើឲ្យការផ្សព្វផ្សាយព័ត៌មានរវាងប្រទេសទាំងពីរកាន់តែបានទូលំទូលាយ ជាពិសេសតំបន់ទេសចរណ៍ក្នុងខេត្តសៀមរាប ដែលមានប្រាសាទអង្គរវត្ត ជាសម្បត្តិបេតិកភណ្ឌរបស់មនុស្សជាតិ ដែលមិនអាចកាត់ថ្លៃបាន។
សូមជម្រាបថា ប្រតិភូទីភ្នាក់ងារសារព័ត៌មានវៀតណាម បានធ្វើទស្សនកិច្ចក្នុងខេត្តសៀមរាបរយៈពេល២ថ្ងៃ ចាប់ពីថ្ងៃទី១៣ ដល់ ទី១៤ ខែធ្នូ ឆ្នាំ២០១៩ ដែលក្នុងដំណើរទស្សនកិច្ចនេះ ប្រតិភូវៀតណាម នឹងទៅទស្សនាសិប្បកម្មផលិតសូត្រនៅស្រុកពួក រមណីដ្ឋានបារាយណ៍ទឹកថ្លា ទន្លេសាប ប្រាសាទមួយចំនួនក្នុងតំបន់រមណីដ្ឋានអង្គរ។
អាជ្ញាធរខេត្តសៀមរាប និងប្រតិភូសារព័ត៌មានវៀតណាម សហការផ្សព្វផ្សាយ
អាជ្ញាធរខេត្តសៀមរាប និងប្រតិភូសារព័ត៌មានវៀតណាម សហការផ្សព្វផ្សាយព័ត៌មាន និងវិស័យទេសចរណ៍នៅកម្ពុជា#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Monday, December 16, 2019
អត្ថបទ និង រូបភាព ៖ បូ សាវី
កែសម្រួលអត្ថបទ៖ សេង ផល្លី
