ក្រុមសិល្បករកម្ពុជានិងជប៉ុន សម្ដែងសិល្បៈរួមគ្នានៅវិទ្យាល័យពួក ដើម្បីស្វែងយល់ពីវប្បធម៌និងចំណងមិត្ដភាពនៃប្រទេសទាំងពីរ

លោក អោម សុផាណា នាយកប្រតិបត្ដិអង្គការម្លប់បៃតង បានមានប្រសាសន៍ថា កាលពីល្ងាច ថ្ងៃទី២៤ ខែធ្នូ ឆ្នាំ២០១៩ម្សិលមិញនេះ ក្រុមសិល្បៈនៃប្រទេសកម្ពុជា និងប្រទេសជប៉ុន បានសហការគ្នាសម្ដែងសិល្បៈរួមគ្នា នៅក្នុងសាលាបរិស្ថានមេត្រី វិទ្យាល័យពួក ដើម្បីសិក្សាស្វែងយល់ពីវិស័យសិល្បៈ វប្បធម៌ និងបន្ដពង្រឹង ពង្រីកចំណងមិត្តភាព សាមគ្គីរវាងប្រទេសទាំងពីរ និងផ្ដល់បទពិសោធន៍គ្នាទៅវិញទៅមករវាងវប្បធម៌នៃប្រទេសទាំងពីរ ព្រមទាំងលើកស្ទួយវិស័យទេសចរណ៍នៅកម្ពុជាផងដែរ ហើយកម្មវិធីសម្តែងសិល្បៈ រវាងប្រទេសយើងទាំងពីរកម្ពុជា-ជប៉ុននេះ ពិតជាទទួលបាននូវចំណីអារម្មណ៍ថ្មី ប្លែកដែលពុំទាន់ធ្លាប់បានទស្សនាពីមុនមក ដោយមានចម្រៀងជាភាសារជប៉ុន ចម្រៀងចាប៉ីដងវែង ការសម្ដែងក្បាច់គុនល្បុក្កតោ និង ការនិទានរឿងជាដើម ។

លោក ស៊ិន ចាន់ថុល អភិបាលស្រុកពួក មានប្រសាសន៍ថា ចំណងមិត្ដភាពរវាងរាជរដ្ឋាភិបាល និងប្រជាជនជប៉ុន ជាមួយប្រទេស កម្ពុជា ជាមិត្តភក្តិនឹងគ្នា ដោយក្នុងនោះមានការជួយកសាង និងអភិវឌ្ឍន៍លើវិស័យហេដ្ឋារចនាសម្ព័ន្ធ និងវិស័យអប់រំនៅប្រទេស កម្ពុជាជាច្រើនផងដែរ ដូចជាប្រទេសជប៉ុនបានទទួលនិស្សិតកម្ពុជាទៅឲ្យសិក្សារៀនសូត្រនៅប្រទេសនោះថែមទៀតផង។

លោក ស៊ិន ចាន់ថុល បញ្ជាក់បន្ថែមថា ការសម្ដែងសិល្បៈរួមគ្នានេះ វាជាផ្នែកមួយនៃវប្បធម៌រឹតចំណងមិត្ដភាពបន្ថែមទៀតរវាងវប្បធម៌ខ្មែរ និងវប្បធម៌ជប៉ុន ហើយតាមរយៈនៃការសម្ដែងសិល្បៈវប្បធម៌នេះ ក៏អាចជាផ្នែកមួយនៃទាក់ទាញអ្នកទេសចរណ៍ពីប្រទេសជប៉ុនមកកាន់ប្រទេសកម្ពុជាកាន់តែច្រើនថែមទៀត ៕

 

អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក លីវ សាន្ត