នៅថ្ងៃទី២៤ ខែធ្នូ ឆ្នាំ២០១៩ លោកស្រី ម៉ននី រង្សី អភិបាលស្រុកក្រឡាញ់ មន្ត្រីសាលាស្រុក អាជ្ញាធរមូលដ្ឋាន សហការជាមួយសហភាពសហព័ន្ធយុវជនកម្ពុជាស្រុកក្រឡាញ់ បាននាំយកអំណោយ សម្ភារៈសិក្សាជំនួយដល់ការបង្រៀនដូចជា ក្តារខៀន ប៊ិច សៀវភៅ រួមនិងថវិកាមួយចំនួន ប្រគល់ជូន យុវតី ច្រាច់ នី សិស្សថ្នាក់ទី១២ នៃវិទ្យាល័យក្រឡាញ់។
អស់រយៈពេល ៣ឆ្នាំមកហើយ ដែលយុវតី ច្រាច់ នី បានចំណាយពេលវេលាពីការសិក្សា មកបង្រៀនភាសាអង់គ្លេស ដល់ក្មេងៗ នៅក្នុងឃុំស្រណាល ស្រុកក្រឡាញ់ ខេត្តសៀមរាប ចំនួន៥៣ នាក់។ យុវតីរូបនេះ ចាប់ផ្ដើមបង្រៀន ក្មេងៗ ពីម៉ោងមួយរសៀល ដល់ម៉ោងបីរសៀល នៅរៀងរាល់ចុងសប្ដាហ៍។ ទោះបី នៅឆ្នាំនេះ ជាឆ្នាំប្រឡងបញ្ចប់ថ្នាក់ទី១២ ឬ មធ្យមសិក្សាទុតិយភូមិក៏ដោយ ក៏ប្អូនស្រី នៅតែខិតខំបែងចែកពេលបង្រៀននេះដដែល។
យុវតី ច្រាច់ នី បាននិយាយថា ក្នុងការបង្រៀនភាសារអង់គ្លេស ដោយមិនគិតកម្រៃនេះ វាបានបង្កើនចំណេះដល់ខ្លួនឯងផ្ទាល់ផង និង បានចែករំលែកនូវចំណេះដឹងដែលខ្លួនមាន ទៅដល់ក្មេងៗក្នុងភូមិ ដែលពួកគេពុំមានលទ្ធភាពរៀនភាសាបរទេស និងជាសិស្សក្រីក្រនៅតាមជនបទ។
ព័ត៌មានជាតិ ថ្មីៗ
សូមជម្រាបថា យុវតី ច្រាច់ នី រស់នៅភូមិខ្នារជើង ឃុំក្រូចគរ ស្រុកក្រឡាញ់ ខេត្តសៀមរាប ជារៀងរាល់ថ្ងៃ នាងត្រូវធ្វើដំណើរពីផ្ទះ ទៅរៀននៅ វិទ្យាល័យក្រឡាញ់ មានចម្ងាយ ៣០ គីឡូម៉ែត្រ។
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
